Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 54

“Che hína pe pan omeʼẽva jeikove opaveʼỹva”

“Che hína pe pan omeʼẽva jeikove opaveʼỹva”

JUAN 6:25-48

  • JESÚS HAʼE “PE PAN OÚVA YVÁGAGUI”

Mar de Galiléagui éste gotyove, Jesús omongaru kuri hetaiterei persónape peteĩ milágro rupive. Upéi osẽ okañy upe lugárgui pórke umi hénte omoĩse chupe irreikuerarã. Upe pyhare haʼe oguata trankílamente pe mar pochy ári, ha osalva Pédrope ojahogamoʼãrõ guare oduda rupi. Jesús okalma avei pe yvytu atã ikatu hag̃uáicha osalva idisipulokuérape.

Koʼág̃a Jesús oĩ jeýma oéste gotyo pe márgui, sóna de Capernáumpe, ha umi hénte haʼe omongaru vaʼekue milagrósamente, ou hendápe ha oporandu chupe: “¿Arakaʼe piko reg̃uahẽ raʼe?”. Péro Jesús opilla haʼekuéra ouha hendápe okaruségui reínte. Upévare heʼi chupekuéra: “Ani pembaʼapo tembiʼu oñehundi vaʼerãre, pembaʼapo guei pe tembiʼu oñehundiʼỹvare ha omeʼẽva jeikove opaveʼỹva”. Umi hénte oporandu Jesúspe: “¿Mbaʼépa rojapo vaʼerã Ñandejára oreguerohory hag̃ua?” (Juan 6:25-28).

Oime vaʼerã haʼekuéra opensa tekotevẽtaha ojapo álgo oĩva pe Léipe. Péro Jesús heʼi chupekuéra ojapo vaʼerãha peteĩ mbaʼe iñimportantevéva: “Ñandejára oipota pejerovia pe Haʼe ombou vaʼekuére”. Péro umi hénte ndojeroviái hese. Jesús ojapóramo jepe umi milágro núnka ndojehecháiva, haʼekuéra ojerure jey peteĩ señál ikatu hag̃uáicha okonfia hese. Haʼekuéra heʼi: “¿Mbaʼe milágro piko nde rejapo rohecha ha roguerovia hag̃ua? ¿Mbaʼe rejapóta? Ñande rukuéra ypykue hoʼu vaʼekue mana desiértope, ojehai haguéicha Ñandejára Ñeʼẽme: ‘Omeʼẽ chupekuéra pan oúva yvágagui hoʼu hag̃ua’” (Juan 6:29-31; Salmo 78:24).

Péro Jesús heʼi chupekuéra moõguipa añetehápe ou umi milágro: “Moisés nomeʼẽi peẽme pe pan oúva yvágagui, péro koʼág̃a che Túva omeʼẽ pe pan teete oúva yvágagui. Pe pan oúva Ñandejáragui oguejy yvágagui ha omoingove ko múndope”. Péro haʼekuéra ndopillái mbaʼépa la Jesús heʼiséva. Upévare osẽ heʼi hikuái: “Ore Ruvicha, akóintekena emeʼẽ oréve upe pan” (Juan 6:32-34). ¿Mbaʼeichagua “pan” rehe oñeʼẽ Jesús?

Haʼe heʼi: “Che hína pe pan omeʼẽva jeikove opaveʼỹva. Pe oúva che rendápe ni mbaʼevéicharõ naiñembyahyimoʼãi, ha pe ojeroviáva cherehe ni mbaʼevéicharõ ndaijyʼuheimoʼãi arakaʼeve. Péro che haʼe peẽme: Cherecháramo jepe, peẽ ndapegueroviái. [...] Che aguejy yvágagui ndahaʼéi ajapo hag̃ua che rembipota, síno upe chembou vaʼekue rembipota. Pe chembou vaʼekue ndoipotái oñehundi ni peteĩva umi haʼe omeʼẽ vaʼekue chéve, oipota guei amoingove jey chupe pe ára pahápe. Che Ru oipota opavave oikuaáva pe Taʼýrape ha ojeroviáva hese, oikove opa ára g̃uarã” (Juan 6:35-40).

Péro umi hudíope ndogustaiete voi la Jesús heʼíva. Upémarõ oñepyrũ oñeʼẽ vai hese hikuái ñemiháme, heʼi haguére: “Che hína pe pan oguejýva yvágagui” (Juan 6:41). Chupekuéra g̃uarã ningo Jesús peteĩ persóna haʼekueraichaguánte, ha oikuaa hikuái isy ha itúva haʼeha Nazaretgua. Upévare heʼijoa hikuái: “¿Kóva piko ndahaʼéi Jesús, José raʼy? Ñande ningo jaikuaa itúva ha isýpe, ¿ajépa?” (Juan 6:42).

Péro Jesús osẽ heʼi chupekuéra: “Anive peñeʼẽ ñemi. Avave ndaikatúi ou che rendápe, che Ru chembou vaʼekue ndoguerúiramo chupe, ha che amoingove jeýta chupe pe ára pahápe. Péicha ojehai umi Proféta kuatiañeʼẽme: ‘Jehová ohekomboʼéta opavavépe’. Entéro ohendúva pe Túvape ha oaprendéva chugui, ou che rendápe. Kóva ndeʼiséi oĩha yvypóra ohecháva pe Túvape, síno pe ou vaʼekue Ñandejáragui añoite, upéva ohecha pe Túvape. Añetehápe haʼe peẽme, pe ogueroviáva ohupyty jeikove opaveʼỹva” (Juan 6:43-47; Isaías 54:13).

 Jesús oñemongetárõ guare Nicodémondi, heʼíma kuri umi ohupytyséva pe jeikove opaveʼỹva tekotevẽha ojerovia hese. Jesús heʼi kuri: “Opaite umi hese ojeroviáva [pe Taʼýra peteĩetére] ohupyty [...] jeikove opaveʼỹva” (Juan 3:15, 16). Péro ko vuéltape Jesús oñeʼẽ hetave héntepe, ha heʼi pe jeikove opaveʼỹva odependeha hese. Ha upéva ndaikatúi ojehupyty pe mana rupive ni pe pan rupive, ikatúva oimeraẽva okonsegi Galiléape. Upéicharõ, ¿mbaʼéichapa ikatu ojehupyty pe vída etérna? Jesús heʼi: “Che hína pe pan omeʼẽva jeikove opaveʼỹva” (Juan 6:48).

Koʼág̃a Jesús oho peteĩ sinagógape oĩva Capernáumpe oporomboʼe hag̃ua, ha upépe osegi oñeʼẽ upe témare.