Ehecha oĩva pype

Ehecha oĩva pype

 KAPÍTULO 25

Oiporiahuvereko peteĩ kuimbaʼe ilépravape

Oiporiahuvereko peteĩ kuimbaʼe ilépravape

MATEO 8:1-4 MARCOS 1:40-45 LUCAS 5:12-16

  • JESÚS OMONGUERA PETEĨ KUIMBAʼE ILÉPRAVAPE

Jesús ha umi cuatro disípulo “oho Galilea tuichakuére opredika umi sinagogahárupi”. Péro umi mbaʼe porãita Jesús ojapóva, ojekuaáma hetaitereive hendárupi (Marcos 1:39). Avei pe notísia og̃uahẽ peteĩ siuda oĩháme peteĩ kuimbaʼe iléprava. Lucas, haʼéva doktór, heʼi pe kuimbaʼe ‘henyhẽha lépragui’ (Lucas 5:12). Ko mbaʼasy ningo ivaieterei, pórke ohasávo pe tiémpo oñepyrũma okaru upe persóna roʼóre.

Ko kuimbaʼe mbaʼasy ningo igraveterei, upévare oikómante vaʼerã apartádo umi héntegui. Oĩramo oñemoag̃uíva hese, haʼe osapukái vaʼerã: “¡Cherasy, cherasy!”. Péicha ndovamoʼãi avavére pe mbaʼasy (Levítico 13:45, 46, NM). Péro, ¿mbaʼépa ojapo ko lepróso? Oñemboja Jesús rendápe, oñesũ henondépe ha ojerure asy chupe: “Karai, nde reipotáramo ningo ikatu chemonguera” (Mateo 8:2).

¡Ajépa ojeroviaite Jesúsre pe kuimbaʼe! Hiʼarive oime vaʼerã pe mbaʼasy ombyaipaitéma chugui la hete. Péro, ¿mbaʼépa ojapo Jesús? ¿Mbaʼépa nde rejapóne reimérire ilugárpe? Jesús oiporiahuverekoiterei anga chupe. Upévare opoko hese ha heʼi: “Si, romonguerase” (Mateo 8:3). Upepete pe kuimbaʼe okuera. Umi ohecháva ni ndoroviaséi la oikóva.

Añetehápe Jesús ombyasyeterei umi osufrívape. Mbaʼégui voi piko ndajaipotamoʼãi chupe ñane governanterã. Haʼe ningo otrata porãiterei pe leprósope, upévare jaʼekuaa haʼe ogoverna vove okumplitaha ko profesía heʼíva: “Haʼe oiporiahuverekóta umi hénte umíldepe ha umi imboriahúvape, ha katuete osalváta chupekuéra” (Salmo 72:13, NM). Upe tiémpo og̃uahẽ vove, Jesús oipytyvõta entéro ohasa asývape. Haʼe ningo oipotaitereíma og̃uahẽ upe tiémpo.

Jesús omonguera mboyvéma voi ko kuimbaʼe ilépravape, umi hénte oparupigua imanduʼajoa hese, ha entéronte oikuaase chupe. Koʼág̃a katu ko milágro oñemombeʼu jeýta hína opárupi. Péro Jesús ndoipotái umi hénte ojerovia hese ohendúgui reínte umi milágro ojapóva. Haʼe oikuaa oĩha peteĩ profesía heʼíva pe Mesías ‘noñehendukamoʼãiha’ kállere, térã ndoikomoʼãiha oñemopropagánda (Isaías 42:1, 2, ÑÑB). Upévare heʼi pe kuimbaʼe omonguera vaʼekuépe: “Ani remombeʼu avavépe. Ha tereho ejechauka pe saserdótepe, ha Moisés Léi heʼiháicha, eikuaveʼẽ peteĩ jopói rekuera haguére” (Mateo 8:4).

Péro pe kuimbaʼe ovyʼaiterei ha ndaikatúi oguerokirirĩ okuera hague, ha opárupi oho omombeʼu. Upéva koʼýte ombokurióso umi héntepe ha oikuaasetereíma Jesúspe. Amo ipahápe Jesús ndaikatuvéima oike trankílamente umi siudápe, upévare peteĩ tiémpore opytánte ndaiporihárupi hénte. Upéicharõ jepe, opáguio ou hendápe umi hénte ohendu hag̃ua chupe ha ikatu hag̃uáicha omonguera chupekuéra.