Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 46

Okuera opoko rupi Jesús aóre

Okuera opoko rupi Jesús aóre

MATEO 9:18-22 MARCOS 5:21-34 LUCAS 8:40-48

  • PETEĨ KUÑA OKUERA OPOKO RUPI JESÚS AÓRE

Jesús ou jeýma Decápolisgui ha upéva oikuaáma umi hudío oikóva mar de Galilea kóstare, noroéste gotyo. Haʼekuéra ohendúne raʼe Jesús okalma hague pe torménta ha omonguera hague pe endemoniádope. Koʼág̃a Jesús og̃uahẽma, ha “hetaiterei hénte” oñembyaty pe mar kóstape orresivi hag̃ua chupe, posívlemente Capernáumpe (Marcos 5:21). Umi hénte ohaʼarõjoa chupe ha oikuaasetereíma mbaʼépa ojapóta.

Peteĩva umi oúva Jesús rendápe haʼe hína Jairo, peteĩ mburuvicha sinagogapegua, amalisia pe oĩva Capernáumpe. Jairo oñesũ Jesús renondépe ha ojerure asy chupe: “Che rajyʼi ningo oime hasyete. Ejumína emoĩ nde po hiʼári okuera ha oikove hag̃ua” (Marcos 5:23). Pe mitãkuñaʼi ningo itúva resaʼỹi hína, pórke haʼe itajýra peteĩmi, ha hiʼarive 12 áñonte oreko (Lucas 8:42). ¿Mbaʼépa ojapo Jesús?

Jesús osẽ oho Jairo rógape. Umi hénte ohóva hendive ohechaseterei jeýma mbaʼéichapa haʼe ojapóta ótro milágro. Péro tapére oiko peteĩ mbaʼe osorprendéva enterovépe. Peteĩ kuña oĩva pe hénte atýpe ojepyʼapyeterei peteĩ mbaʼasy orekóvare.

Ojapóma 12 áño ko kuña hudía oikoha iñemorrahiaháre. Ohóma ningo kuánto doktór oikuaamívape, ha ogastapa ipláta umi tratamiéntope. Péro ndokuerái, “ivaive guei la ipórte” (Marcos 5:26).

Ajépa ivaiete pe mbaʼasy orekóva, ndahaʼéi voi omokangypánteva chupe, síno otĩeterei omombeʼu hag̃ua. Ndahaʼeiete peteĩ mbaʼasy jaikótava ñamombeʼu oimeraẽvape rei. Hiʼarive Ñandejára Léi heʼi pe kuña huguýva naipotĩriha Jehová renondépe, ha oimeraẽ ojáva hese térã opokóva ijao kyʼáre, ojahu vaʼerãha, péro osegiha ikyʼa kuarahy oike peve (Levítico 15:25-27).

Pe kuña ‘ohendu umi mbaʼe ojeʼéva Jesús rehe’, ha upévare oheka chupe. Haʼe ikyʼa rupi, okirirĩmínte pe hénte atýpe ani hag̃ua avave opilla chupe. Upe aja okalkula: “Apokóramo ijaóre jepe akuerátama”. Ha ojapóvo upéva, “upepete opyta pe huguy ha haʼe oñandu okueramaha pe mbaʼasy ombohasa asyetévagui chupe” (Marcos 5:27-29).

Jesús katu osẽ heʼi: “¿Máva piko opoko cherehe?”. ¡Oiménepa tuichaite oñemondýi pe kuña ohendúvo upéva! Pedro osẽ heʼi Jesúspe: “Mboʼehára, umi hénte ningo ojerepa nderehe ha ndejopypa”. Jesús katu heʼi: “Oĩ voínte la opokóva cherehe, añandu osẽha chehegui podér” (Lucas 8:45, 46). Pe kuña okuerávo, Jesús oñandu osẽha chugui podér.

Pe kuña ohechámarõ ojepilla hague, oryrýi osusũ ha ou oñesũ Jesús renondépe. Haʼe omombeʼúmante entéro rovake la imbaʼasy, ha mbaʼéichapa okuera. Jesús katu oiporiahuvereko ha okonsola chupe heʼívo: “Che rajy, rejerovia rupi ningo rekuera ko mbaʼasy nembohasa asyetévagui. Tereho katu pyʼaguapýpe” (Marcos 5:34).

¡Ajépa javyʼaite jaikuaágui Ñandejára oiporavo hague peichagua Rréi imbaʼeporãitéva ogoverna hag̃ua ko yvy! Jesús oporohayhu, ha hiʼarive ndahaʼéi ojepyʼapýnteva umi héntere, síno oreko avei podér oipytyvõ hag̃ua enterovévape.