Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 42

Jesús omongavaju umi fariséope

Jesús omongavaju umi fariséope

MATEO 12:33-50 MARCOS 3:31-35 LUCAS 8:19-21

  • JESÚS OÑEʼẼ ‘PE MILÁGRO OIKO VAʼEKUÉRE PROFÉTA JONÁSRE’

  • OVALORAVE PE AMISTA OREKÓVA IDISIPULOKUÉRANDI

Umi mboʼehára leipegua ha umi fariséo norrekonoseséi Jesús omosẽha umi demóniope Ñandejára podér rupive. Péicha haʼekuéra opeka vaieterei, ha ikatu voi opeka hína pe espíritu sánto kóntrape. ¿Máva favórpepa ohechauka oĩha hikuái? ¿Ikatúpa jaʼe oĩha Ñandejára favórpe, térãpa oapojaha Satanáspe? Jesús heʼi: “Peñangarekóramo pe yvyramátare, hiʼa iporãta, napeñangarekóiramo hese katu hiʼa vaíta. Hiʼáre ningo ojekuaa iporãpa pe yvyramáta” (Mateo 12:33).

Ndaikatúi ningo peteĩ mbaʼe ivaívagui osẽ peteĩ mbaʼe iporãva. Upéicharõ, umi heʼíva Jesús omosẽha umi demónio oservi rupi Satanáspe, tuichaiterei ojavy. Jesús heʼi vaʼekue pe Sermón del Móntepe pe yvyramáta iporãramo, hiʼa katuete iporãtaha avei. Upéicharõ, ¿mbaʼépa ohechauka umi fariséo otakývo Jesúsre? Haʼete hikuái umi yva itujupáva. Upévare Jesús heʼi chupekuéra: “Peẽ mbói ñemoñare, ¿mbaʼéicha piko pejéta iporãva, ko peẽ voi peneñañáva? Umi mbaʼe omyenyhẽva ñane korasõ ningo osẽ ñande jurúrupi” (Mateo 7:16, 17; 12:34).

Jahechaháicha, umi mbaʼe jaʼéva ohechauka mbaʼépa oĩ ñande pyʼapýpe, ha upéi jajehusgáta upévare. Jesús heʼi: “Yvyporakuéra ojecháta Ñandejárandi pe Huísio Árape opa vyrorei heʼi vaʼekuére. Cháke ne ñeʼẽre Ñandejára heʼíta nderekoporãha, térã ndekastigáta” (Mateo 12:36, 37).

Jesús ojapómaramo jepe heta milágro, umi mboʼehára leipegua ha fariseokuéra heʼi chupe: “Mboʼehára, rohechase rejapórõ peteĩ milágro”. Ikatu ningo haʼekuéra ndohechái raʼe umi milágro Jesús ojapóva, péro oĩ heta persóna ohecháva. Upévare Jesús heʼi chupekuéra: “Umi hénte oikóva ko tiémpope iñaña, oporomoakãratĩ, ha milágronte voi ohechase. Péro ndojehechaukamoʼãi chupekuéra mbaʼeve, pe milágro oiko vaʼekue proféta Jonás rehe añoite ohecháta hikuái” (Mateo 12:38, 39).

Jesús ndohejái chupekuéra oporandu mbaʼépa osignifika la heʼíva, ha osegi: “Jonás opyta vaʼekue pe pira ryepýpe tres día ha tres pyhare; upéicha avei pe Yvypóra Raʼy oĩta pe sepultúrape tres día”. Jonáspe omokõ vaʼekue peteĩ pira tuichaitereíva, ha osẽ rire pe pira ryepýgui, haʼete voi ku orresusitáva. Péicha Jesús opredesi kuri haʼe omanotaha, ha tres día haguépe oñemoingove jeytaha chupe. Péro Jesús orresusita rire, umi líder rrelihióso hudío ndoaseptái oñekumpliha Jesúsre “pe milágro oiko vaʼekue proféta Jonás rehe”. Upéva heʼise haʼekuéra noñarrepentíri ha nokambiái hague (Mateo 27:63-66; 28:12-15). Ndojoguaiete hikuái ‘umi Niniveguápe’, oñarrepenti vaʼekue Jonás opredika rire chupekuéra. Upévare umi Ninivegua oheja vaíta umi hudíope. Jesús heʼi avei pe rréina de Seba jepe oheja vaitaha chupekuéra. ¿Mbaʼérepa? Pórke haʼe ou vaʼekue mombyrýgui ohendu hag̃ua Salomón ñeʼẽ arandu, ha ohendúvo chupe ohecharamoiterei upéva. Upéi Jesús heʼi: “Koʼápe oĩ hína peteĩ tuichavéva Salomóngui” (Mateo 12:40-42).

Jesús okompara umi hudío situasión peteĩ kuimbaʼe ojeliverávape peteĩ demónio poguýgui (Mateo 12:45). Péro upéi pe kuimbaʼe nomoingéi iñakãme umi mbaʼe iporãva, ha upévare pe demónio osẽ vaʼekue chugui, ou jey siete demónio iñañavévandi ha odomina chupe. Péicha oiko vaʼekue tetã Israel rehe. Ñepyrũrã oñemopotĩ ha ojekorrehi chupe, oiko haguéicha pe kuimbaʼe ojeliverávare pe demóniogui. Péro upéi umi isrraelíta orrechasa Jehová profetakuérape ha hiʼarive opersegi Crístope, pe kuimbaʼe orekóva Ñandejára espíritu. Upéva ohechauka Israel iñañave ha oĩ vaiveha ymave guarégui.

Jesús oñeʼẽ aja gueteri umi héntepe, og̃uahẽ isy ha iñermanokuéra, ha oñemboʼy ohaʼarõ chupe. Upéi oĩ heʼíva Jesúspe: “Oime nde sy ha ne ermanokuéra oñemboʼy okápe ha nderechase hikuái”. Péro Jesús oipyso ipo idisipulokuéra oĩha gotyo, ha heʼi: “Che sy ha che ermanokuéra ningo koʼã ohendúva Ñandejára Ñeʼẽ ha ojapóva” (Lucas 8:20, 21). Chupe g̃uarã haʼekuéra haʼete voi iñermáno, iñermána ha isy. Péicha Jesús ohechauka ovaloraitereiha pe amista orekóva idisipulokuérandi, ohayhúramo jepe ihentekuérape. Ajépa javyʼaite ñande avei jareko haguére ñande ykére ñane ermanokuéra ñanderayhuetéva. Koʼýte ñamombaʼe iñamista oĩ jave ndojeroviáiva ñanderehe, térã ndoguerohorýiva umi mbaʼe porã jajapóva.