Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 58

Omboheta umi pan ha oñeʼẽ pe levadúrare

Omboheta umi pan ha oñeʼẽ pe levadúrare

MATEO 15:32–16:12 MARCOS 8:1-21

  • JESÚS OMONGARU 4.000 KUIMBAʼÉPE

  • “PEÑEÑANGAREKÓKE UMI FARISÉO [...] LEVADÚRAGUI”

Jesús oĩ aja Decápolisrupi, opytáva mar de Galiléagui éste gotyo, heta hénte ou hendápe. Haʼekuéra ou ohendu hag̃ua chupe térã okuera hag̃ua imbaʼasykuéragui. Ogueru avei hikuái heta kanásto henyhẽva hiʼupýgui.

Unos kuánto día rire, Jesús ohenói idisipulokuérape ha heʼi: “Aiporiahuvereko koʼã héntepe, ojapóma ningo tres día opyta hague chendive, ha ndorekói hoʼu vaʼerã. Oĩ hóga mombyryetereíva ha ahejáramo oho hikuái pyʼa nandi ikatu ikangypa tapére”. Umi disípulo heʼi: “Koʼárupi ndaipóri mbaʼeve. ¿Moõgui piko roguenohẽta pan romoyg̃uatã hag̃ua koʼã henteitápe?” (Marcos 8:2-4).

Jesús oporandu: “¿Mboy pan piko peguereko?”. Haʼekuéra heʼi: “Roguereko siete pan, ha mbovymi piraʼi” (Mateo 15:34). Upéi Jesús heʼi umi héntepe oguapy hag̃ua. Ojagarra umi pan ha umi piraʼi, ha oagradese rire Ñandejárape ombohasa idisipulokuérape orreparti hag̃ua umi héntepe. ¡Enterovete ningo okaru hyg̃uatãha meve! Upéi oñembyaty umi tembiʼu hembýva siete kanásto guasu renyhẽte. ¡Hiʼarive okaru 4.000 kuimbaʼe, ha oĩ avei heta kuña ha mitãnguéra!

Upéi Jesús ojedespedi umi héntegui, ha haʼe ha idisipulokuéra ojupi peteĩ kanóape ha ohasa Magadán gotyo, opytáva mar de Galiléagui oéste gotyo. Upépe oñemboja umi fariséo ha saduseokuéra, ha oprova hag̃ua Jesúspe ojerure chupe tojapo peteĩ milágro Ñandejára rérape.

Jesús ohechakuaa haʼekuéra omoñuhãseha chupe, upévare ombohovái chupekuéra: “Kaʼarupytũ vove ningo peẽ peje jepi: ‘Tiémpo porãta hína, pe ára pytã asy rupi’. Pyharevete katu peje: ‘Pe ára ningo pytã asy, péro ijaraipa hína. Koestedía roʼy ha okýta’. Peẽ pemañávo pe ára rehe, peikuaáma tiémpo vaítapa, térãpa tiémpo porãta. Péro ndapehechakuaái mbaʼépa heʼise umi mbaʼe oikóva koʼág̃a” (Mateo 16:2, 3). Upéi Jesús heʼi chupekuéra pe milágro oiko vaʼekue Jonás rehe añoite ohechataha hikuái.

Upe rire haʼe ha idisipulokuéra ojupi kanóape ha oho Betsaida gotyo, opytáva pe mar de Galiléagui noréste gotyo. Tapérema umi disípulo imanduʼa ndogueruiha hoʼu vaʼerã. Peteĩ pan añónte la orekóva hikuái. Jesús imanduʼa umi mbaʼe angeténte heʼi vaʼekuére umi fariséo ha umi saduséope oapojáva Heródespe, ha heʼi: “Pejesareko meméke ha peñeñangareko umi fariséo ha Herodes levadúragui”. Umi disípulo oimoʼã Jesús imanduʼaha pe levadúrare haʼekuéra hesarái haguére umi pángui. Jesús ohechakuaávo nontendéi hague hikuái mbaʼépa la heʼiséva, heʼi: “¿Mbaʼére piko pejodiskuti ndapeguerúi haguére pan?” (Marcos 8:15-17).

Ramoiténte Jesús, peteĩ milágro rupive, omboheta umi pan omongaru hag̃ua hetaiterei persónape. Upévare umi disípulo ohechakuaa  vaʼerã kuri haʼe ndojepyʼapyiha umi pan rehe. Jesús heʼi: “¿Napenemanduʼái piko ambojaʼórõ guare cinco pan umi cinco mil kuimbaʼépe g̃uarã? ¿Mboy kanásto renyhẽ piko pembyaty raʼe umi pan hemby vaʼekuégui?”. Haʼekuéra heʼi: “Doce”. Upéi Jesús oporandu jey: “Ha ambojaʼórõ guare siete pan umi cuatro mil kuimbaʼépe g̃uarã, ¿mboy kanásto guasu renyhẽpa pembyaty raʼe umi pan hembývagui?”. Haʼekuéra ombohovái: “Siete” (Marcos 8:18-20).

Upémarõ Jesús oporandu: “¿Mbaʼéicha piko ndapepillái nañeʼẽi hague peẽme pan rehe? Peñeñangarekóke umi fariséo ha saduseokuéra levadúragui” (Mateo 16:11).

Hasypeve umi disípulo ontende. Pe levadúra ningo ombovu pe mása, ha orrepresenta peteĩ mbaʼe oñembyaíva. Péicha avei, umi fariséo enseñánsa ikatu ombyai chupekuéra. Upévare haʼe heʼi umi disípulope tojekuida ‘umi fariséo ha saduseokuéra omboʼévagui’ (Mateo 16:12).