Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 33

Okumpli pe profesía Isaías oskrivi vaʼekue

Okumpli pe profesía Isaías oskrivi vaʼekue

MATEO 12:15-21 MARCOS 3:7-12

  • UMI HENTEITA OJOPYPA JESÚSPE

  • OKUMPLI ISAÍAS OPROFETISA VAʼEKUE

Jesús oikuaávo umi fariséo ha Herodes segidorkuéra ojukaseha chupe, haʼe ha idisipulokuéra osẽ oho mar de Galilea gotyo. Upépe oñemboja hendápe heta hénte oúva opáguio: Galiléagui voi, Tiro ha Sidóngui, umi siuda opytávagui éste gotyo rrío Jordángui, Jerusaléngui ha Iduméagui, opytáva sur gotyove. Jesús ningo omongueráma hetápe. Upévare hetaiterei hasýva ouve hendápe ha ijatypa hese. Hiʼarive nohaʼarõi hikuái Jesús oho hendapekuéra, síno oñembojántema opoko hag̃ua hese (Marcos 3:9, 10).

Hetaiterei rupi umi hénte, Jesús heʼi idisipulokuérape okonsegi hag̃ua chupe peteĩ kanóa. Péicha haʼe ojupíta pype ha ojerretiraʼimíta pe kóstagui ani hag̃ua umi henteita ojopypa chupe. Upe kanóa guive, Jesús ikatúta omboʼe chupekuéra, térã ohóta ótro lugárpe pe mar kóstare oipytyvõ hag̃ua umi oikóvape umírupi.

Disípulo Mateo ohechakuaa umi mbaʼe Jesús ojapóva okumpliha “Ñandejára heʼi vaʼekue iproféta Isaías rupive” (Mateo 12:17). ¿Mbaʼe profesíapa okumpli hína Jesús?

“¡Péina! ¡Kóva hína che rembiguái aiporavo vaʼekue, upe ahayhu ha aguerohorýva! Amoĩta che espíritu hiʼári, ha haʼe ohechaukáta opa tetãme mbaʼépa heʼise tekojoja. Haʼe noñorairõmoʼãi, ndosapukaimoʼãi ha avave nohendumoʼãi iñeʼẽ umi tape guasúre. Nomopẽmoʼãi ni peteĩ takuára ojepepýmava ha nomboguemoʼãi ni peteĩ lámpara oguepotáva, omoĩ meve tekojoja opárupi. Añetehápe, umi tetãnguéra orekóta esperánsa hérare.” (Mateo 12:18-21; Isaías 42:1-4.)

Jesús hína pe tembiguái Ñandejára oiporavo vaʼekue. Upe tiémpope umi hudío osegi heta kostúmbre rrelihiósa noĩporãiva, ha umíva oreko chupekuéra pytũmbýpe. Umi fariséo nokumpliporãi Ñandejára Léi ha upévare ni umi hasývape noipytyvõi sabadokue. Péro Jesús ohechaukávo mbaʼépa añetehápe heʼise pe hustísia, oipytyvõ umi héntepe oheja hag̃ua koʼã kostúmbre oreko asýva chupekuéra. Upévare umi líder rrelihióso ojukase chupe. ¡Ajépa iñañaite hikuái!

¿Mbaʼérepa pe téxto heʼi: “Haʼe noñorairõmoʼãi, ndosapukaimoʼãi ha avave nohendumoʼãi iñeʼẽ umi tape guasúre”? Pórke Jesús oporomonguera jave, omanda umi héntepe ha umi demóniope “ani hag̃ua ni mbaʼevéicharõ omombeʼu mávapa haʼe” (Marcos 3:12). Haʼe ndoipotái umi hénte ojerovia hese oĩgui ombopy ha omoakãva  umi milágro ojapóva, ni oikógui omopropagánda chupe ápe ha pépe.

Jesús okonsola avei heta persóna ohasa asývape. Haʼekuéra ningo oñekompara peteĩ takuára ojepepýmavare, térã peteĩ lámpara oguepotávare. Péro Jesús nomopẽi pe takuára ojepepýva ni nomboguéi pe lámpara oguepotáva. Upéva rangue, mborayhu ha pyʼaporãme okonsola umi hénte ohasa asyetévape. Añetehápe umi tetãnguéra ikatu oreko esperánsa hese.