Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 31

Oipoʼo hikuái trígo peteĩ sábado

Oipoʼo hikuái trígo peteĩ sábado

MATEO 12:1-8 MARCOS 2:23-28 LUCAS 6:1-5

  • UMI DISÍPULO OIPOʼO TRÍGO PETEĨ SÁBADO

  • JESÚS HAʼE HÍNA “SÁBADO RUVICHA”

Jesús ha idisipulokuéra koʼág̃a oviaha nórte gotyo Galiléape. Og̃uahẽma primavéra ha umi trigoty otyarõmbáma. Umi disípulo iñembyahýi ha oñepyrũ oipoʼo unas kuánta espíga ha hoʼu. Péro upérõ ningo sábado, ha umi fariséo ohecha la haʼekuéra ojapóva.

Oiméne ñanemanduʼa upe mboyvemínte umi hudío ojukase hague Jesúspe Jerusalénpe, heʼígui hikuái haʼe ndorrespetaiha pe sábado. Ha koʼág̃a umi fariséo oakusáma umi disípulope avei. Haʼekuéra heʼi Jesúspe: “¡Emañamína!, nde disipulokuéra piko ndoikuaái sabadokue ndovaleiha jajapo upéva” (Mateo 12:2).

Umi fariséo heʼi umi disípulo oipoʼóvo pe espíga, haʼetemaha okosecha ha ojykýiva pe trígo (Éxodo 34:21). Haʼekuéra oipuru vai Ñandejára Léi ha omoĩsénte rrégla ojopyve hag̃ua umi héntepe. Péro Ñandejára ningo omoĩ vaʼekue pe sábado pe puévlo ovyʼa ha omombarete hag̃ua ijerovia, ndahaʼéi ojopy hag̃ua avavépe. Upévare Jesús omoĩ mokõi ehémplo ohechauka hag̃ua umi fariséope tuicha ojavyha ha ifanatikoitereiha hikuái.

Jesús imanduʼa mbaʼépa ojapo vaʼekue David ha iñirũnguéra. Peteĩ vuéltape haʼekuéra iñembyahyieterei ha opyta pe tavernákulope, ha hoʼu umi pan oñemoĩ vaʼekue Jehová renondépe. Koʼã pan ojepeʼáma kuri Jehová renondégui, péro lomímonte sagrádo gueteri ha umi saserdóte añoite ikatu hoʼu. Upéicharõ jepe, David ha iñirũnguéra hoʼu ha noñekondenái chupekuéra, pórke oikotevẽ rupínte ojapo upéva (Levítico 24:5-9; 1 Samuel 21:1-6).

Upéi Jesús heʼi avei: “¿Ha ndapeleéi piko pe Léi heʼihápe umi saserdóte ombaʼapoha témplope  sabadokue? Ha upéicharamo jepe ndojeʼéi hesekuéra nokumpliriha pe Léi”. Upéicha haʼe ohechauka sabadokue jepe umi saserdóte ojukaha umi animál ojapo hag̃ua sakrifísio, ha ojapoha avei ambue traváho pe témplope. Jesús heʼi: “Peteĩ mbaʼe tuichavéva pe témplogui oĩ koʼápe” (Mateo 12:5, 6; Números 28:9).

Jesús oipuru jey Ñandejára Ñeʼẽ ha heʼi: “Peẽ ndapeikuaái mbaʼépa heʼise ko mbaʼe: ‘Aipota peiporiahuvereko pende rapichápe, pejapo rangue sakrifísio’. Upéva peikuaárire ndapetakýi vaʼerãmoʼã umi hembiapo vaiʼỹvare”. Upéi heʼi chupekuéra: “Yvypóra Raʼy haʼe [...] sábado Ruvicha”. ¿Mbaʼépa heʼise upéva? Jesús oñeʼẽ hína igoviérno de 1.000 áñore, oguerútava pyʼaguapy (Mateo 12:7, 8; Oseas 6:6).

Yvyporakuéra hetaiterei tiémporema ohasa asy Satanás, pe Aña Ruvicha poguýpe. Opárupi jahecha gérra ha violénsia. ¡Ajépa idiferentetéta ág̃a Jesús ogoverna vove 1.000 áño aja! Ojepytuʼu haguéicha sabadokue, upépe yvyporakuéra opytuʼúta avei opaichagua mbaʼe vai ha jehasa asýgui.