Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 38

Juan oipota Jesús okonfirma chupe haʼeha pe Mesías

Juan oipota Jesús okonfirma chupe haʼeha pe Mesías

MATEO 11:2-15 LUCAS 7:18-30

  • JUAN OPORANDUKA JESÚSPE MBAʼÉPA HEʼISE UMI MBAʼE OJAPÓVA

  • JESUS OMBOTUICHA JUÁNPE

Ojapóma un áñorupi Juan el Bautista oĩ hague kárselpe. Upéicharõ jepe, ohendu umi mbaʼe porãite Jesús ojapóva. Epensamína mbaʼeichaitépa oiméne oñeñandu raʼe Juan, idisipulokuéra omombeʼúrõ guare chupe Jesús orresusita hague peteĩ viúda Naingua membykariaʼýpe. Péro Juan oipota Jesús heʼi porã chupe mbaʼépa heʼise umi mbaʼe ojapóva. Upévare omondo mokõi idisípulo oporandu hag̃ua Jesúspe: “¿Nde piko hína pe Ñandejára opromete vaʼekue omboutaha, térãpa oúta ótro kuimbaʼe?” (Lucas 7:19).

Ko porandu haʼete iñextráñova, pórke oime vaʼerã ñanemanduʼa dos áño upe mboyve, Juan ovautisa hague Jesúspe ha ohecha Ñandejára espíritu oguejýrõ guare hiʼári. Avei ohendu Ñandejára heʼírõ guare oguerohoryha Jesúspe. ¿Ikatúpa jaʼe Juánpe ofalta hague fe? Nahániri. Jesús ningo oñeʼẽ porãiterei hese, ha haʼe ndojapói vaʼerãmoʼã upéva Juan odudárire. ¿Mbaʼérepa upéicharõ Juan oporanduka Jesúspe oimépa hína haʼe pe kuimbaʼe ohaʼarõva hikuái?

Oime vaʼerã Juan oipotánte raʼe Jesús oasegura chupe haʼeha pe Mesías. Upéva tuichaiterei omombaretéta Juánpe, hiʼarive haʼe ohasa asy hína pe kárselpe. Péro amalisia ndahaʼéi upéva añónte la Juánpe oipyʼapýva. Haʼe oikuaa porã pe profesía heʼiha Ñandejára rembiporavo haʼetaha rréi ha livertadór. Ha oikuaase oútapa ótro Jesús rekoviarã, okumplipátava opa mbaʼe ojeʼe vaʼekue pe Mesíasre.

Jesús ndeʼíri Juan disipulokuérape: “Si, che hína pe kuimbaʼe Ñandejára opromete vaʼekue omboutaha”. Upéva rangue ohechauka chupekuéra Ñandejára oipytyvõha chupe ikatu hag̃uáicha omonguera umi héntepe opaichagua mbaʼasýgui. Jesús heʼi Juan disipulokuérape: “Tapeho pemombeʼu Juánpe koʼã mbaʼe pehecha ha pehendúva: Umi siégo ohecha jey, ndoguatáiva oguata, iléprava okuera, ohenduʼỹva ohendu, omanóva oñemopuʼã jey ha umi imboriahúvape ojekuaauka marandu porã” (Mateo 11:4, 5).

Oiméne ningo Juan oipota Jesús ojapo hetave mbaʼe, ha oguenohẽ chupe kárselgui. Péro Jesús ontendeka Juánpe nohaʼarõi vaʼerãha hetave milágro.

Juan disipulokuéra oho rire, Jesús heʼi umi héntepe Juan tuichaveha umi profétagui. Heʼi hese haʼeha pe “mensahéro” Jehová opromete vaʼekue, oĩva Malaquías 3:1-pe (NM). Ha avei heʼi hese haʼeha proféta Elías, oñeñeʼẽha Malaquías 4:5 ha 6-pe. Jesús heʼi: “Añetehápe haʼe peẽme: Ndaipóri ko yvy ape ári ni peteĩ tuichavéva Juan el Bautístagui; péro pe michĩvéva pe Rréino yvagapeguápe, tuichave chugui” (Mateo 11:11).

¿Mbaʼérepa Jesús heʼi Juánre: “Pe michĩvéva pe Rréino yvagapeguápe, tuichave chugui”? Upéicha Jesús ohechauka Juan noĩmoʼãiha pe Rréino yvagapeguápe. Juan ningo oprepara Jesús raperã, péro haʼe omano jepe Jesús oavri mboyve pe tape ojeho hag̃ua yvágape (Hebreos 10:19, 20). Juan haʼe vaʼekue peteĩ proféta iñeʼẽrendúva, upévare oikóta ko yvy ape ári Ñandejára Rréino poguýpe.