Jairo ohecha Jesús omongueraha pe kuña hasy vaʼekuépe heta áñore. Katuete ningo Jesús ikatu avei omonguera pe mitãkuñaʼípe. Péro Jairo opensa oiméne hag̃ua “omanóma raʼe” itajyraʼi (Mateo 9:18). Upéicharõ, ¿ikatúitipa Jesús oipytyvõ chupe?

Jesús oñeʼẽ aja gueteri pe kuñándi, og̃uahẽ oúvo unos kuánto kuimbaʼe Jairo rógagui ha heʼi chupe: “Nde rajy oime omanóma. ¿Maʼerã piko remolesta reíta Mboʼehárape?” (Marcos 5:35).

¡Ajépa ivaiete pe notísia oñemeʼẽva chupe! Ko karai ningo oreko tuicha autorida pe puévlo oikohápe, péro koʼág̃a opyta yvýre, ndoikuaái anga mbaʼépa ojapóta. Itajýra peteĩmi omano chugui. Péro Jesús ohendu ojeʼéva Jáirope ha ojere omokyreʼỹ chupe heʼívo: “Ani rekyhyje, ejeroviánte” (Marcos 5:36).

Jesús oho hendive hógape, ha og̃uahẽvo ohecha umi hénte ojaheʼoha hína. Umi oúva oñandu chupekuéra hasẽmbánte avei ha ombyasyeterei hikuái la oikóva. Jesús oike pe ógape ha heʼi: “Pe mitãkuñaʼi ningo nomanói, okénte hína” (Marcos 5:39). Umi hénte ohendúvo upéva, opuka hese. Haʼekuéra oikuaa porã pe mitãkuñaʼi omanomaha. Péro Jesús oipurúta Ñandejára podér ohechauka hag̃ua ikatuha oñemoingove jey umi omanóvape, ku oñemombayrõguáicha peteĩ persóna oketévape.

Jesús ojerure enterovépe osẽ hag̃ua okápe, péro oheja hendive Pedro, Santiago, Juan ha Jairo ha hembireko. Ogueraha chupekuéra pe koty oĩháme pe mitãkuñaʼi retekue. Upéi Jesús ojagarra pe mitãkuñaʼi po ha heʼi: “‘Tálita cúmi’, heʼiséva ‘Mitãkuña, ndéve haʼe: ¡Epuʼã!’” (Marcos 5:41). Upepete ningo haʼe opuʼã ha oguata. ¡Epensamíntena mbaʼeichaitépa oiméne Jairo ha hembireko ovyʼa ohechávo upéva! Upéi Jesús heʼi ojeʼukami hag̃ua álgo pe mitãkuñaʼípe ohechauka hag̃ua añetehápe oikove jeymaha.

Jesús ningo heʼi jepi umi persóna omonguerávape ani hag̃ua omombeʼu avavépe la ojapo vaʼekue hesehapekuéra. Ha koʼág̃a heʼi avei upéva Jairo ha hembirekópe. Upéicharõ jepe, haʼekuéra ha umi ótra hénte ovyʼaiterei pe mitãkuñaʼi oikove jey haguére, ha ndaikatúi oguerokirirĩ. Upéicha rupi “opa siuda ha puévlo oĩvape upe jerére” ojekuaa la oiko vaʼekue (Mateo 9:26). Ajépa hasy vaʼerã voi jaguerokirirĩ jahecháramo oikove jeyha peteĩ persóna jahayhúva. Kóva hína pe segunda rresurreksión Jesús ojapo vaʼekue.