JUAN 6:48-71

  • HEʼI IKATUHA OJEʼU HOʼO HA HUGUY

  • HETA OĨ OTROPESÁVA HA OHEJÁVA CHUPE

Peteĩ sinagógape Capernáumpe, Jesús heʼi haʼeha pe pan oguejýva yvágagui. Upe mboyve, oñepyrũma voi kuri oñeʼẽ koʼã mbaʼére umi hénte oĩ vaʼekuépe pe mar de Galilea kóstape, ha hoʼu vaʼekue umi pan ha pira Jesús omboheta vaʼekue peteĩ milágro rupive.

Jesús osegi heʼi: “Umi pende rukuéra ypykue hoʼu vaʼekue mana pe desiértope ha upéicharamo jepe omano”. Péro upéi Jesús heʼi avei: “Che hína pe pan oporomoingovéva oguejýva yvágagui, oĩramo hoʼúva ko pan oikovéta opa ára g̃uarã. Pe pan che ameʼẽtava ko múndo oikove hag̃ua haʼe hína che roʼo” (Juan 6:48-51).

Áño 30-pe, pe primavérape Jesús heʼíma vaʼekue Nicodémope Ñandejára ohayhuetereiha ko múndo ha upévare ombou hague Itaʼýrape osalva hag̃ua yvyporakuérape. Koʼág̃a Jesús ohechauka peteĩ persóna ohupyty hag̃ua jeikove opaveʼỹva, tekotevẽha hoʼu hoʼo, térã ojerovia pe sakrifísio haʼe ojapótavare.

Péro umi hénte oñeofende ohendúvo upéva. Heʼi hikuái: “¿Mbaʼéicha piko ko kuimbaʼe hoʼukáta ñandéve hoʼo?” (Juan 6:52). Jesús ningo oipota umi hénte ontende noñeʼẽiha ikuérpore, síno ojaponteha peteĩ komparasión. ¿Mbaʼéichapa haʼe oipytyvõ chupekuéra ontende hag̃ua upe heʼíva?

Jesús heʼi: “Ndapeʼúiramo pe Yvypóra Raʼy roʼo ha napemboyʼúiramo huguy, ndapeikovemoʼãi. Pe hoʼúva che roʼo ha omboyʼúva che ruguy ohupytýta jeikove opaveʼỹva [...]. Che roʼo ha che ruguy ningo iporãiteve ótro tembiʼu ha vevídagui. Pe hoʼúva che roʼo ha omboyʼúva che ruguy, akóinte oĩ chendive” (Juan 6:53-56).

Katuete ningo umi hudío oñeofendéne raʼe ohendúvo Jesús heʼiha ojeʼu vaʼerãha hoʼo. Haʼekuéra ikatu opensa oñeʼẽha umi hoʼúvare umáno roʼo ha ndorrespetáiva Ñandejára Léi heʼíva pe tuguýre (Génesis 9:4; Levítico 17:10, 11). Péro añetehápe Jesús ndeʼiséi voi ojeʼu vaʼerãha hoʼo ni huguy. Haʼe ohechaukánte umi ohupytyséva jeikove opaveʼỹva, ojerovia vaʼerãha pe sakrifísio haʼe ojapótavare omeʼẽ vove ikuérpo perfékto ha oñohẽ vove huguy. Upéicharõ jepe, oĩ heta idisípulo nontendéiva koʼã mbaʼe, ha oĩ voi heʼíva: “Koʼã mbaʼe heʼíva ningo ivaieterei, ¿máva piko ohenduséta chupe?” (Juan 6:60).

Jesús ohechakuaa oĩha heta disípulo oñeʼẽ ñemíva, ha upémarõ heʼi chupekuéra: “¿Penembopochy piko koʼã mbaʼe? ¿Mbaʼe piko oikóta upéicharõ pehecháramo pe Yvypóra Raʼy ojupiha yma oĩ haguépe? [...] Umi mbaʼe che haʼe vaʼekue peẽme henyhẽ espíritu sántogui ha oporomoingove. Péro oĩ pende apytépe ndogueroviáiva”. Upéicharõ jepe, heta disípulo ipochy ha oheja chupe (Juan 6:61-64).

Upéi Jesús heʼi umi 12 apóstolpe: “Peẽ ndapehoséi avei, ¿ajépa?”. Pedro ombohovái: “Ore Ruvicha, ¿máva rendápe piko rohóta? Ne ñeʼẽ ningo omeʼẽ jeikove opaveʼỹva. Ha ore roguerovia ha roikuaa nde haʼeha Ñandejára remimbou Marangatu” (Juan 6:67-69). ¡Ajépa iporãite la ojapóva Pedro ha umi ótro apóstol! Haʼekuéra nontendeporãiramo jepe Jesús heʼíva upe okasiónpe, osegi omoirũ chupe.

Ogustáramo jepe Jesúspe Pedro ombohováiva, haʼe heʼi: “Peẽ dócepe, che poiporavo, ¿ajépa? Upéicharamo jepe pende apytépe oĩ peteĩ otakýva cherehe” (Juan 6:70). Haʼe oñeʼẽ hína Judas Iscariótere. Oiméne upérõ Jesús ohechakuaáma Judas oñepyrũha oho tape vaíre.

Péro Jesús ovyʼa ohechávo Pedro ha umi ótro apóstol odesidiha osegi hendive, ha ombaʼapo meme pe tembiapo oporosalvávape.