Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 5

¿Moõpa onase raʼe Jesús, ha arakaʼépa?

¿Moõpa onase raʼe Jesús, ha arakaʼépa?

LUCAS 2:1-20

  • JESÚS ONASE BELÉNPE

  • UMI PASTÓR OVISITA JESÚSPE

Pe mburuvicha Romagua, César Augusto, oguenohẽ peteĩ léi heʼíva opavave oho vaʼerãha ivállepe oñeanota hag̃ua. Upéicha rupi, José ha María oviahámante vaʼerã Belénpe, pe siuda José onase haguépe, opytáva sur gotyo Jerusaléngui.

Hetaiterei hénte ningo oho Belénpe oñeanota hag̃ua, ha ndaiporivéima lugár ikatu hag̃uáicha José ha María opytami. Upévare opytámante hikuái peteĩ galpónpe, oñemoingehápe umi vúrro ha ótro animalkuéra. Upépe onase Jesús. María olia porã imemby peteĩ télape ha omoñeno pe lugár oñemoĩhápe umi animálpe hembiʼurã.

Oime vaʼerã Ñandejára ogia César Augústope omoĩ hag̃ua pe léi heʼíva káda persóna oñeanota vaʼerãha ivállepe. ¿Mbaʼérepa jaʼe upéva? Pórke upéicha rupi Jesús onase Belénpe, pe puévlo oiko haguépe rréi David, haʼéva hína iñantepasádo. Ha Ñandejára Ñeʼẽme ojeprofetisa voi upe siudápe onase vaʼerãha pe Governánte oñepromete vaʼekue (Miqueas 5:2).

Upe pyharépe ningo oiko peteĩ mbaʼe iñimportantetereíva. Pe ñúre oĩ heta pastór, ha peichaháguinte Jehová ohesape ijererekuéra. Avei ojeaparese peteĩ ánhel ha heʼi chupekuéra: “Ani pekyhyje, che aju amombeʼu hag̃ua peẽme marandu porã ombovyʼaitereítava opavave umi héntepe. Koestedía David vállepe onase upe pendesalvátava, upéva hína Cristo ñande Ruvicha. Ha kóicha pepilláta mávapa: petopáta peteĩ mitãʼi ojeliáva télape ha oñenóva peteĩ pesévrepe”. Upéi ojeaparese avei hetaiterei ánhel ha opuraheijoa: “Toñembotuicha Ñandejárape yvágape, ha ko yvy ape ári taipyʼaguapy umi hénte Ñandejára oguerohorýva” (Lucas 2:10-14).

Ohopa rire umi ánhel, umi pastór heʼi: “Jaháke koʼag̃aite Belénpe jahecha hag̃ua ko mbaʼe oikóva ha Jehová oikuaaukáva ñandéve” (Lucas 2:15). Pyaʼe porã oho hikuái ha otopa Jesúspe, pe ánhel heʼi haguepete chupekuéra. Umi pastór omombeʼúvo umi héntepe mbaʼépa heʼi raʼe pe ánhel, entéronte ijurujaipa opytávo. María katu omombaʼeterei koʼã mbaʼe ohendúva ha ojepyʼamongeta hese.

Koʼág̃arupi hetaiterei hénte oguerovia Jesús onase hague el 25 de diciembre. Péro Belénpe ningo roʼy ha okyeterei jepi diciémbrepe, ha sapyʼánte katu hoʼa voi niéve. Péicha jave umi pastór ni mbaʼevéicharõ ndopytamoʼãi pyharekue umi ñúre hymbakuéra reheve. Avei upe tiémpope umi hénte ndaijaʼevéima kuri oikóvo pe goviérno rrománore, ha César Augusto ojerurérire chupekuéra oviaha hag̃ua roʼy tiémpope ikatu hag̃uáicha oñeanota, katuete haʼekuéra opuʼãta kuri hese. Upéicharõ, ñapensáramo koʼã mbaʼére, jaʼekuaa Jesús onase hague mes de octúbrepe.