Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 93

Pe Yvypóra Raʼy ojechauka vove

Pe Yvypóra Raʼy ojechauka vove

LUCAS 17:20-37

  • PE RRÉINO OĨ IJAPYTEPEKUÉRA

  • ¿MBAʼÉPA OIKÓTA JESÚS OJECHAUKA VOVE?

Jesús oĩ aja gueteri Samáriare térã Galiléarupi, umi fariséo oporandu chupe arakaʼépa oúta Ñandejára Rréino. Haʼekuéra oimoʼã pe Rréino oúvo ojefestehataha tuichaháicha ha oñemombeʼutaha opárupi. Jesús katu heʼi: “Ñandejára Rréino ou vove, ndahaʼemoʼãi enterove ohechakuaátava. Ndaiporimoʼãi heʼíva: ‘¡Pemañami, koʼápe oĩ!’, térã: ‘¡Pemañami, namoite hína!’. Ñandejára Rréino oĩ hína pende apytépe” (Lucas 17:20, 21).

Oĩ oimoʼãva Jesús heʼiseha pe Rréino oĩha Ñandejára siervokuéra korasõme. Péro upérõ Jesús oñeʼẽ kuri umi fariséope, ha haʼekuéra ningo ndojeroviái hese, upévare pe Rréino ndaikatúi oĩ ikorasõmekuéra. Péro pe Rréino oĩ ijapytepekuéra pórke Jesús oĩ upépe. Haʼe hína pe Rréi Ñandejára oiporavo vaʼekue (Mateo 21:5).

Oiméne umi fariséo oho riremi, Jesús osegi oñemongeta idisipulokuérandi pe Rréinore. Oñeʼẽvo umi mbaʼe oikótavare haʼe ogoverna vove, Jesús heʼi: “Og̃uahẽta umi ára peẽ pehechasetaha peteĩ jepe pe Yvypóra Raʼy ára, péro ndapehechamoʼãi” (Lucas 17:22). Péicha Jesús ohechauka pe Yvypóra Raʼy ogovernataha amo gotyove. Og̃uahẽ mboyve upe tiémpo, oĩta heta idisípulo ohechasétamava chupe, péro ohaʼarõ vaʼerã hikuái Ñandejára heʼi peve pe Yvypóra Raʼy ikatumaha ogoverna.

Jesús heʼi avei: “Umi hénte heʼíta peẽme: ‘¡Pemañami, namoite hína!’, térã: ‘¡Pemañami, koʼápe oĩ!’. Aníke pesẽ ni peho hapykuerikuéra. Pe aratiri ohesapeháicha pe yvága, peteĩ púnta guive ótro púnta peve, upéichata avei pe Yvypóra Raʼy” (Lucas 17:23, 24). ¿Mbaʼépa ojapo vaʼerã umi disípulo ani hag̃ua ombotavy chupekuéra umi heʼíva ijehe haʼeha pe Mesías? Jesús heʼi entéro umi oĩva alérta ikatutaha opilla haʼe ogoverna vove pe Rréinope, haʼete pe aratiri ojehecháva mombyry guive.

Upéi Jesús imanduʼa heta mbaʼe oiko vaʼekuére yma, ohechauka hag̃ua mbaʼéichapa oñekomportáta umi hénte haʼe ogoverna vove. Haʼe heʼi: “Oiko haguéicha Noé tiémpope, upéichata avei pe Yvypóra Raʼy tiémpope. [...] Upéicha avei, oiko haguéicha Lot tiémpope, upérõ umi hénte okaru, omboyʼu, ojogua, ovende, oñemitỹ ha ojogapo. Péro Lot osẽrõ guare Sodómagui, hoʼa yvágagui tatarendy asúfre reheve, ha ohundipaite chupekuéra. Upéichata avei pe ára Yvypóra Raʼy ojechauka vove umi héntepe” (Lucas 17:26-30).

Jesús ndeʼíri umi hénte oñehundi hague okaru, omboyʼu, ombaʼejogua, ovende, oñemitỹ ha ojogapo haguérente. Noé, Lot ha ifamiliakuéra ningo ojapónte avei koʼã mbaʼe. Péro umi ótra hénte ojepyʼapyve kuri koʼã mbaʼére ha ndoikuaaséi mbaʼeve Ñandejáragui, upéicha  rupi oñehundi chupekuéra. Upévare Jesús heʼi avei idisipulokuérape ombaʼapo jejopy vaʼerãha ojapo hag̃ua Ñandejára volunta. Péicha ikatúta ojesalva hikuái Ñandejára ohundi vove umi hénte añáme.

Jesús heʼi isegidorkuérape ndohejái vaʼerãha mbaʼeve ohesarea chupekuéra. Haʼe heʼi: “Upe árape, pe oĩva hína terrásape aníkena oguejy ombyaty ikosakuéra oĩva kotýpe. Upéicha avei pe oĩva hína ñúme ani ojevy ikosakuéra piári. Penemanduʼákena Lot rembirekóre” (Lucas 17:31, 32). ¿Mbaʼépa oiko vaʼekue Lot rembirekóre? Chugui ningo oiko vaʼekue peteĩ estátua de sal.

Jesús osegi omombeʼu mbaʼépa oikóta haʼe oĩ vove Rréiramo: “Upe pyharépe oĩta mokõi oñenóva peteĩ tupápe; peteĩva ojegueraháta ha pe ótro ojeheja reíta” (Lucas 17:34). Upéva heʼise oĩtaha ojesalváva ha avei oñehundítava.

Umi disípulo oikuaase moõpa ojegueraháta umi ojesalvátava, upévare oporandu: “¿Moõ piko ore Ruvicha?”. Jesús heʼi: “Pe teʼongue oĩháme, upépe avei ijatýta umi ágila” (Lucas 17:37). Jesús heʼi oĩtaha ojoguáva umi ágila hesapysóvape, ha haʼekuéra omoirũta pe Yvypóra Raʼýpe. Upe tiémpope Jesús disipulokuéra omboʼéta umi héntepe pe añetegua ikatu hag̃uáicha umi ojeroviáva ojesalva.