Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 99

Jesús omonguera mokõi siégope ha oipytyvõ Zaquéope

Jesús omonguera mokõi siégope ha oipytyvõ Zaquéope

MATEO 20:29-34 MARCOS 10:46-52 LUCAS 18:35–19:10

  • JESÚS OMONGUERA MOKÕI SIÉGOPE JERICÓPE

  • PE IMPUÉSTO KOVRAHA HÉRAVA ZAQUEO OÑARREPENTI

Jesús ha umi oviaháva hendive og̃uahẽ Jericópe. Upégui ningo un díape oñeg̃uahẽma Jerusalénpe. Jericópe oĩ vaʼekue mokõi puévlo opytáva 1 kilómetro imédio rasami ojuehegui. Peteĩva ojapo vaʼekue umi hudío, ha pe ótro ipyahuvéva katu ojapo vaʼekue umi rrománo. Jesús ha umi omoirũva chupe osẽ peteĩva umi puévlogui, ha oñemoag̃ui ohóvo pe ótrore. Ha pe tapére oĩ kuri mokõi mendígo siégo ohendúva pe ayvu, ha péicha opilla oĩha ohasáva upérupi. Peteĩva héra Bartimeo.

Ohendúvo hikuái Jesús ohasaha ohóvo, Bartimeo ha iñirũ oñepyrũ osapukái: “¡Karai, David Raʼy, oreporiahuverekomína!” (Mateo 20:30). Umi hénte apytépe oĩ ojaʼóva chupekuéra ha heʼi okirirĩ hag̃ua. Péro haʼekuéra osapukái hatã hatãvéntema. Upémarõ Jesús opyta ha heʼi umi héntepe tojegueru hendápe umi osapukáivape. Haʼekuéra oho umi mendígo oĩháme ha heʼi peteĩvape: “Ani rekyhyje, epuʼã katu, haʼe nerenói hína” (Marcos 10:49). Upépe haʼe opo opuʼã, omombo ijao joʼaha ha oho Jesús rendápe.

Jesús oporandu: “¿Mbaʼépa peipota ajapo penderehe?”. Umi mokõi siégo ojerure asy: “Karai, rohechase jey ningo” (Mateo 20:32, 33). Jesús oiporiahuverekoiterei chupekuéra, opoko hesakuérare ha oñeʼẽvo peteĩvape heʼi: “Tereho katu, rejerovia rupi rekuera” (Marcos 10:52). Upepete mokõivéva okuera ha oñepyrũ omombaʼeguasu Ñandejárape. Umi hénte ohechávo upe oikóva ombotuicha avei Ñandejárape. Upe guive Bartimeo ha iñirũ omoirũ Jesúspe.

Jesús ohasávo Jericórupi, hetaiterei hénte oho hendive. Enterovénte ohechase mávapa pe omonguera vaʼekue umi siégope. Umi hénte ojopypa Jesúspe opáguio, ha oĩ ndaikatúiva ni ohecha chupe. Por ehémplo, peteĩva hína Zaqueo, umi impuésto kovraha hefekuéra. Haʼe ningo ikarapeterei ha upévare ndohechái la oikóva. Upémarõ oñemotenonde ha ojupi peteĩ ígo mátare, oĩva pe tape Jesús ohasatahárupi. Upe guive haʼe ohechapaite la oikóva. Ha Jesús ohasávo upérupi, omaña yvate gotyo ha heʼi chupe: “Zaqueo, pyaʼe eguejy upégui, koestedía apyta vaʼerã nde rógape” (Lucas 19:5). Haʼe pyaʼe voi oguejy ha odipara oho hógape, ikatu hag̃uáicha ojeprepara orresivi hag̃ua pe visíta iñimportantetévape.

Umi hénte ohechávo upéva, oñepyrũ oñeʼẽ ñemi. Chupekuéra g̃uarã ningo Zaqueo haʼe peteĩ pekadór, upévare opensa hikuái noĩporãiha Jesús ovisita chupe. Zaqueo ipláta heta vaʼekue pórke ipokarẽ ha ombotavy hapichakuérape okovrávo umi impuésto.

Jesús oikévo Zaqueo rógape, umi hénte ojeplageapa ha heʼi: “Oho opyta peteĩ pekadór rógape”. Jesús katu ohechakuaa Zaqueo ikatuha  oñarrepenti. Péro, ¿oikópa raʼe haʼe opensa haguéicha? Zaqueo ohechávo Jesúspe, oñemboʼy ha heʼi: “¡Péina!, che Ruvicha umi che kosakuéragui la mita ameʼẽ umi imboriahúvape, ha umi pláta aipeʼa vaʼekue pokarẽme che rapichágui, amyengovia cuatro vése” (Lucas 19:7, 8).

Zaqueo ohechauka oñarrepentiha ipyʼaite guive. Oiméne haʼe oreko peteĩ rrehístro oanota haguépe umi impuésto, ha oikuaa mboýpa okovra raʼe unos kuánto hudíope. Upévare oñekompromete omyengoviataha cuatro vése umi ombotavy vaʼekuépe. Ñandejára Léi heʼi vaʼekue mboýpa omyengovia vaʼerã peteĩ persóna ombotavýva hapichápe, péro Zaqueo oñekompromete voi omeʼẽtaha hetave upévagui (Éxodo 22:1; Levítico 6:2-5). Hiʼarive opromete avei orrepartitaha la mita ikosakuéra umi imboriahúvape.

Jesús ovyʼa Zaqueo ohechauka haguére oñarrepentiha, ha heʼi: “Koestedía Ñandejára osalva ko kuimbaʼe ha ifamíliape, haʼe rupi Abrahán raʼy avei. Pe Yvypóra Raʼy ou voi oheka ha osalva hag̃ua umi ohóvape tape vaíre” (Lucas 19:9, 10).

Ramoiténte Jesús omombeʼu pe ehémplo oñeʼẽva pe taʼýra ofalla vaʼekuére (Lucas 15:11-24). Péro koʼág̃a ohechauka ko kuimbaʼe ehémplo rupive, peteĩ persóna hembiapo vaíva ikatuha okambia ha oñepyrũ ojapo iporãva. Umi líder rrelihióso ha isegidorkuéra ojekeha Jesúsgui ha otaky hese, pórke haʼe oñeʼẽ avei umi pekadór ndive. Upéicharõ jepe, Jesús osegi oheka Abrahán raʼykuéra okañy vaʼekuépe, ha ogueru chupekuéra tape porãme.