Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 95

Oñeʼẽ pe divórsiore ha ohechauka ohayhuha umi mitãme

Oñeʼẽ pe divórsiore ha ohechauka ohayhuha umi mitãme

MATEO 19:1-15 MARCOS 10:1-16 LUCAS 18:15-17

  • JESUS OHECHAUKA MBAʼÉPA ÑANDEJÁRA OPENSA PE DIVÓRSIORE

  • MBAʼÉREPA OĨ NOMENDÁIVA

  • MBAʼÉREPA JAJOGUA VAʼERÃ UMI MITÃME

Jesús ha idisipulokuéra osẽ Galiléagui, okrusa pe rrío Jordán ha oho sur gotyo, pe tape ohasávare Peréarupi. Pe última ves oĩrõ guare Peréape, haʼe oñeʼẽma kuri umi fariséondi pe divórsiore ha ohechauka mbaʼépa Ñandejára opensa upévare (Lucas 16:18). Koʼág̃a haʼekuéra oñehaʼã jey omoñuhã Jesúspe.

Pe Léi Ñandejára omeʼẽ vaʼekue Moisés rupive heʼi vaʼekue peteĩ kuimbaʼe ikatuha ojedivorsia hembirekógui “ojuhúgui hese mbaʼe vai” (Deuteronomio 24:1, ÑÑB). Umi ohendúva Jesúspe opensa diferentepa pe divórsiore. Oĩ voi opensáva ikatuha umi omendáva ojedivorsia oimeraẽ fállare, michĩramo jepe. Upévare umi fariséo oporandu Jesúspe: “¿Ovale piko peteĩ kuimbaʼe ojedivorsia hembirekógui oimeraẽ mbaʼérente?” (Mateo 19:3).

Péro Jesús heʼi rangue yvypóra opensáva, imanduʼa Ñandejára omomenda hague Adán ha Évape, ha heʼi: “¿Ndapeleéiva piko Ñandejára Ñeʼẽme haʼe ojapo hague iñepyrũmbýpe kuimbaʼe ha kuñáme, ha heʼi: ‘Upévare pe kuimbaʼe ohejáta itúva ha isýpe, ojoajúta hembirekóre, ha mokõivégui oikóta peteĩntema’? Upéicha rupi, haʼekuéra ndahaʼevéima mokõi, síno peteĩntema. Upévare, avave ndoipeʼái vaʼerã ojuehegui Ñandejára omoĩ vaʼekue oñondive peteĩ júgo guýpe” (Mateo 19:4-6). Ñandejára omomendárõ guare Adán ha Évape, ndeʼíri vaʼekue haʼekuéra ikatuha ojopoi.

Umi fariséo ohendúvo upéva, osẽ heʼi Jesúspe: “¿Mbaʼére piko upéicharõ Moisés heʼi peteĩ kuimbaʼe ikatuha opoi hembirekógui omeʼẽma guive chupe peteĩ dokuménto heʼíva ojedivorsiaha?” (Mateo 19:7). Jesús orresponde: “Pendepyʼahatãgui Moisés opermiti peẽme pejedivorsia pene rembirekógui. Péro yma iñepyrũmbýpe ndaupéichai vaʼekue” (Mateo 19:8). Jesús heʼívo “iñepyrũmbýpe” noñeʼẽi kuri Moisés tiémpore, síno Jehová omomendárõ guare Adán ha Évape pe hardín de Edénpe.

Upéi Jesús heʼi peteĩ mbaʼe iñimportantetereíva: “Che katu haʼe peẽme: Oimeraẽ ojedivorsiáva hembirekógui, ndahaʼéiramo hekovai haguére [griégope pornéia] ha upéi omenda jey ótrare, upéva oporomoakãratĩ hína” (Mateo 19:9). Upéicharõ, Ñandejára Ñeʼẽ ohechauka umi omendáva ikatuha ojedivorsia sólamente oúramo peteĩva ombotavy iména térã hembirekópe.

Umi disípulo heʼi: “Upéichataramo pe kuimbaʼe hembirekóndi, iporãvéta nomendaiete voi” (Mateo 19:10). Añetehápe, umi omendaséva opensa porã vaʼerã, pórke pe matrimónio odura vaʼerã pára siémpre.

Upéi Jesús oñeʼẽ umi soltérore. Heʼi oĩha umi ndaikatúiva omenda pórke ojekapa vaʼekue, térã onase voi upéicha ha ndaikatúi oreko rrelasión sexuál. Ha oĩ avei umi odesidíva nomendái ikatu hag̃uáicha ombaʼapo porãve Ñandejára Rréino rehehápe. Upéi Jesús omeʼẽ ko konsého: “Pe odesidíva ojapo upéicha [opyta soltéro], oĩ porã ojapóramo upéicha” (Mateo 19:12).

Koʼág̃a umi hénte ogueru umi mitãme Jesús rendápe. Péro umi disípulo ojaʼo chupekuéra, pórke ndoipotái umi mitã omolesta Jesúspe. Péro haʼe ohechávo upéva, heʼi chupekuéra: “Pehejána umi mitã mimíme tou che rendápe, ha ani pejokosétei. Ñandejára Rréino ningo oñemeʼẽ koʼãichaguápe. Añetehápe haʼe peẽme: Pe ndorresivíriva Ñandejára Rréino peteĩ mitãicha, ni mbaʼevéicharõ ndoikemoʼãi upépe” (Marcos 10:14, 15; Lucas 18:15).

¡Ajépa iporãite pe Jesús omboʼéva! Jaike hag̃ua Ñandejára Rréinope, tekotevẽ ñaneumílde ha jaheja ótro ñanerekomboʼe, ojapoháicha umi mitã. Upéi Jesús ohupi umi mitãme ijyva ári ha ovendesi chupekuéra. Péicha ohechauka ohayhuetereiha umi mitãme. Avei haʼe ohayhueterei umi persóna orresivívape “Ñandejára Rréino peteĩ mitãicha” (Lucas 18:17).