Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 83

¿Mávapepa Ñandejára oinvita?

¿Mávapepa Ñandejára oinvita?

LUCAS 14:7-24

  • MBAʼÉREPA ÑANEUMÍLDE VAʼERÃ

  • UMI INVITÁDO OMOĨ EXKÚSA

Jesús oĩ gueteri pe fariséo rógape. Upépe haʼe omonguera kuri peteĩ kuimbaʼe hasývape. Ha koʼág̃a Jesús ohecha umi invitádo oiporavoha umi lugár iñimportantevéva. Upémarõ haʼe oaprovecha ko oportunida omboʼe hag̃ua mbaʼérepa ñaneumílde vaʼerã.

Jesús heʼi: “Reñeinvita jave peteĩ kasamientorã, ani reho reguapy pe lugár iñimportantevévape. Ikatu ningo oime oñeinvita hína peteĩ iñimportantevéva ndehegui, ha upe peneinvita vaʼekue oúta heʼi ndéve: ‘Epuʼã emeʼẽmi ne asiénto chupe’. Ha ñemotĩme rehóta reguapy amo huguaitépe” (Lucas 14:8, 9).

Upéi Jesús heʼive: “Reñeinvita jave, tereho eguapy pe asiénto oĩva huguaitépe. Péicha upe neinvita vaʼekue heʼíta ndéve: ‘Chamígo, ejúna eguapy koʼápe tenondeve’. Upéicharõ reñembotuicháta opavave umi ótro invitádo renondépe”. Jesús ndahaʼéi omboʼénteva oñekomporta porã vaʼerãha hikuái, síno ohechauka mbaʼépa oiko umi oñemoimportantesévare. Haʼe heʼi: “Enterove oñembotuichávape, ojeapoʼíta; ha pe oñemomirĩvape katu oñembotuicháta” (Lucas 14:10, 11). Péicha Jesús omboʼe hína iñimportanteha iñumílde hikuái.

Pe fariséo ningo oinvita kuri Jesúspe, pórke opensa péicha Ñandejára oguerohorytaha chupe. Péro upéi Jesús heʼi pe fariséope mbaʼépa ojapo vaʼerã Ñandejára oguerohory hag̃ua chupe: “Rejapo jave karu guasu térã séna, ani rehenói ne amigokuéra, ne ermáno, ne hentekuéra, térã umi ne vesíno ipláta hetávape. Haʼekuéra avei ikatu neinvita ha péicha omyengovia ndéve. Upévare, rejapo jave karu guasu reinvita vaʼerã umi imboriahúvape, umi ijyvaʼỹva, umi oguataʼỹva, ha umi siégope. Ha revyʼáta, haʼekuéra ndoguerekóigui omyengovia hag̃ua ndéve” (Lucas 14:12-14).

Jesús ndeʼíri oĩ vaiha ñainvita ñane amigokuéra, ñane hénte térã ñane vesinokuérape okaru hag̃ua ñanendive. Síno haʼe omboʼe javyʼavetaha ñainvitáramo umi oikotevẽvape, por ehémplo umi imboriahumívape, umi paralítikope ha umi ndohecháivape. ¿Mbaʼérepa? Jesús omombeʼu pe fariséope: “Oñemyengoviáta ndéve ág̃a oñemoingove jey vove umi hekojojávape”. Upe jave, umi invitádo apytégui peteĩva osẽ heʼi: “Ovyʼaite pe hoʼúva pan Ñandejára Rréinope” (Lucas 14:15). Añetehápe ningo upéva peteĩ priviléhio iporãitereíva. Péro ñambyasýramo jepe, naentéroi opensa upéicha. Upémarõ Jesús omoĩ peteĩ ehémplo omyesakãve hag̃ua.

Haʼe heʼi: “Peteĩ kuimbaʼe ojapo peteĩ karu guasu, ha oinvita hetápe. Ha [...] omondo hembiguáipe heʼi hag̃ua umi oñeinvita vaʼekuépe: ‘Peju katu, oĩmbáma la tembiʼu’. Péro enterove oñepyrũ heʼijoa ndaikatumoʼãiha oho. Pe tenondegua heʼi: ‘Anína ndepochy chendive, ajogua ramoite ningo peteĩ kokue ha ahámante vaʼerã ahecha’. Ha ótro heʼi: ‘Anína ndepochy chendive, ajogua kuri cinco júnta guéi, ha aháta ahecha’. Ha peteĩva heʼive: ‘Amenda ramoite ningo; ha upévaguinte ndaikatumoʼãi aha’” (Lucas 14:16-20).

Ko ehémplope umi kuimbaʼe omoĩnte exkúsa. Oiméne haʼekuéra ohóma kuri ohecha ojogua mboyve pe kokue ha umi guéi, ha ndaiporivéima apúro. Ha pe ótro kuimbaʼe katu ndahaʼéi ojepreparátava omenda hag̃ua, síno omendapáma. ¿Mbaʼére piko upéicharõ operdéta hikuái peteĩ invitasión iñimportantetéva? Upéicha rupi, pe kuimbaʼe ojapóva pe karu guasu ohendúvo iñinvitadokuéra omoĩha exkúsa, orrenegaiterei ha omanda hembiguáipe:

“‘Pyaʼe tereho umi tape guasúre, ha umi kálle oĩvare pe siudápe, ha egueru koʼápe umi imboriahúvape, umi ijyvaʼỹva, umi siégope ha umi oguataʼỹvape.’ Upe rire, ou pe tembiguái heʼi pe ogajárape: ‘Che jára, ojejapopáma upe remanda vaʼekue, péro oĩ gueteri lugár’. Pe ogajára heʼi hembiguáipe: ‘Tereho jey umi kállere, ha umi ojeguatahárupi, ha mbaretépe eru ñandéve umi héntepe, henyhẽ hag̃ua che róga. Che haʼe peẽme: Ni peteĩva umi kuimbaʼe oñeinvita vaʼekue, ndoʼumoʼãi che rembiʼu’” (Lucas 14:21-24).

¿Mbaʼépa ñanemboʼe ko ehémplo? Ohechauka Jehová oinvitaha Jesús rupive heta persónape oike hag̃ua pe Rréino yvagapeguápe. Tenondete oinvita vaʼekue umi hudíope, prinsipálmente umi líder rrelihióso. Péro haʼekuéra orrechasa upe invitasión. Jesús heʼi ojejapotaha peteĩ segunda invitasión umi isrraelíta iñumíldevape ha umi oikéva hudiokuéra rrelihiónpe. Por último, oñeinvitáta umi persóna umi hudiokuéra odespresiávape. Koʼã persónare ndochaʼéi hikuái, pórke opensa Ñandejára ndoaseptaiha umívape (Hechos 10:28-48).

Péicha jahecha siertoiteha pe invitádo heʼi vaʼekue: “Ovyʼaite pe hoʼúva pan Ñandejára Rréinope”.