Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 86

Pe taʼýra ofalla vaʼekue ou jey

Pe taʼýra ofalla vaʼekue ou jey

LUCAS 15:11-32

  • PETEĨ ISTÓRIA OÑEʼẼVA PE TAʼÝRA OFALLA VAʼEKUÉRE

Jesús omoĩ kuri umi ehémplo oñeʼẽva peteĩ ovecha ha peteĩ monéda okañy vaʼekuére. Amalisia upérõ oĩ kuri Peréape, opytáva éste gotyo rrío Jordángui. Koʼã mokõi ehémplo ñanemboʼe javyʼa vaʼerãha peteĩ pekadór oñarrepentíramo ha oñemoag̃ui jey Ñandejárare. Umi fariséo ha mboʼehára leipegua okritika kuri oikóvo Jesúspe pórke haʼe oguerohory koʼãichagua héntepe. Péro, ¿oaprendépa hikuái álgo koʼã mokõi ehémplogui? ¿Ontendépa mbaʼéichapa Ñandejára oñeñandu oĩ vove oñarrepentíva? Jesús omoĩ ótro ehémplo omyesakãve hag̃ua ko mbaʼe iñimportantetéva.

Ko ehémplope oñeʼẽ peteĩ túvare orekóva mokõi itaʼýra. Ko istóriape oñeñeʼẽve pe itaʼýra imitãvévare. Umi mboʼehára leipegua, fariseokuéra ha umi ótra persóna oaprende vaʼerã mbaʼépa Jesús omboʼese oñeʼẽvo pe taʼýra imitãvévare. Péro ñaanalisávo ko ehémplo, ñañatende porã vaʼerã avei umi mbaʼe ojapóvare pe túva ha pe taʼýra ypykue, pórke ikatu avei ñaaprende chuguikuéra peteĩ mbaʼe iñimportánteva. Jahechamína mbaʼéichapa Jesús omombeʼu ko istória.

Haʼe heʼi: “Peteĩ kuimbaʼe mokõi itaʼýra. Ha pe imitãvéva heʼi itúvape: ‘Che ru, emeʼẽna chéve la che párte umi ne mbaʼerepýgui’. Upémarõ haʼe ombojaʼo chupekuéra umi mbaʼerepy oguerekóva” (Lucas 15:11, 12). Ko taʼýra ningo ndojeruréi pe párte otokáva chupe omano rupi itúva, síno ojeiségui ipoguýgui ha oikoségui iñakãre. ¿Mbaʼépa oiko upe rire?

Jesús heʼi: “Upe riremínte, pe itaʼýra imitãvéva ombyatypa la ikosakuéra ha osẽ oho mombyry, tetã ambuépe. Upépe oho oiko iñakãre ha hoʼupaite la oguerekomíva” (Lucas 15:13). Pe mitãrusu ningo oiko porãiterei kuri hógape. Upépe itúva oñangareko hese ha omeʼẽ chupe opa mbaʼe oikotevẽva. Péro haʼe odesidi oho oiko ótro ládo, ogastapa la orekomíva ha hekovai, ha upéi ijetuʼúma hendive ha ohasa asy.

Jesús omombeʼu: “Ogastapaite rire ipláta, ou peteĩ ñembyahýi tuichapa jepéva upe tetãme, ha haʼe oñepyrũ oiko asy. Upémarõ haʼe oho ojerure ombaʼapo hag̃ua peteĩ karai upepeguápe,  ha haʼe omondo chupe ñúme oñangareko hag̃ua hymba kurekuérare. Upépe avave nomeʼẽi chupe mbaʼeve ha haʼe hoʼuse asy umi kure rembiʼu” (Lucas 15:14-16).

Ñandejára Léi heʼi umi kure ikyʼaha. Upéicharõ jepe, pe mitãrusu ohómante oñatende umi kurére. Ha ndahaʼéi voi upévante, la ivaiveha ningo haʼe iñembyahyieterei ha umi kure rembiʼu jepe hoʼuse. Péicha ojecha vai rire, pe mitãrusu “oñepyrũ opensa porã jey”. Ha heʼi: “Mboy piko umi ombaʼapóva che túvandi oime vaʼerã hembypa chupekuéra la hoʼu vaʼerã, ha che katu koʼápe amanótama ñembyahýigui. Apuʼãta aha che ru rendápe, ha haʼéta chupe: ‘Che ru, tuichaitereíko afalla Ñandejárandi ha nendive avei. Upévare nameresevéima aiko nde raʼýramo. Tapytántena tambaʼapo ndéve g̃uarã koʼápe’. Upémarõ haʼe opuʼã ha oho itúva rendápe” (Lucas 15:17-20).

¿Mbaʼéichapa orreaksionáta pe túva ohechávo itaʼýrape? ¿Ndorresivimoʼãipa chupe? ¿Ipochýtapa hendive ha ojaʼo vaipáta chupe osẽ haguére oho hógagui? Oimérire nde pe túva, ¿mbaʼéichapa rerreaksiona vaʼerãmoʼã? Ha oimérire nde pe taʼýra, ¿mbaʼéichapa reipotáne nde túva nderresivi?

 PE TAʼÝRA OFALLÁVA OU JEY

Jesús omombeʼu mbaʼépa ojapo pe túva: “Oĩ aja gueteri mombyry, itúva ohecha sapyʼa chupe ha oiporiahuverekógui, odipara oho hendápe, ha hatã oañuã ha ohetũ chupe” (Lucas 15:20). Itúva oikuaáramo jepe itaʼýra ikondúkta vai hague, orresivi porã chupe. Umi mboʼehára leipegua ha fariseokuéra ningo heʼi oikuaa ha oadoraha Jehovápe. Péro ohendu rire ko istória, ¿ontendépa raʼe hikuái mbaʼépa opensa Jehová umi oñarrepentívare? ¿Orrekonosétapa hikuái Jesús nomboykeiha umi hembiapo vaívape oñarrepentíramo ipyʼaite guive?

Katuete pe túva ohechakuaa itaʼýra oñarrepentiha. Oiméne oúvo, ohecha mbaʼéichapa itaʼýra hova ñembyasy ha oñeñandu vai. Péro haʼe ndopytái ohaʼarõ itaʼýrape, síno odipara voi ohug̃uaitĩ chupe. Upéicha rupi ifasilve avei pe mitãrusúpe omombeʼu hag̃ua ipekádo. Jesús heʼi: “Upépe pe taʼýra heʼi itúvape: ‘Che ru, tuichaitereíko afalla Ñandejárandi ha nendive avei. Upévare nameresevéima aiko nde raʼýramo’” (Lucas 15:21).

Upéi pe túva heʼi umi hembiguáipe: “‘¡Pyaʼéke! Peguenohẽ peteĩ ao puku, pe iporãvéva tomonde, pemoĩ ikuãre peteĩ kuãirũ ha sandália ipýre. Pegueru pe tororaʼy ikyravéva, pekarnea ñandéve, jakaru ha javyʼa. Ko che raʼymi ningo omanóma kuri ha oikove jey, okañy kuri ha ou jey’. Ha oñepyrũ ovyʼa hikuái” (Lucas 15:22-24).

Upe aja, itaʼýra ypykue oĩ hína ñúme. Jesús heʼi hese: “Og̃uahẽmbotávo pe ógape, ohendu músika pu ha ojejerokyha hína. Upémarõ ohenói peteĩ tembiguáipe, ha oporandu mbaʼépa la oikóva. Haʼe heʼi chupe: ‘Ne ermáno ningo ou jey kuri, ha nde túva ohechávo hesãi ha ndojehúi hague chupe mbaʼeve, okarnea pe tororaʼy ikyravéva’. Péro haʼe ipochy ha ndoikeséi. Upémaramo osẽ hendápe itúva ha oñepyrũ ojerure asy chupe oike hag̃ua. Haʼe katu ombohovái itúvape: ‘Hetaite áñorema ambaʼapo ndéve peteĩ tembiguáicha,  ha katuete ajapopa la nde reipotáva. Upéicharõ jepe, neremeʼẽiva chéve ni peteĩ kavararaʼymi, avyʼa hag̃ua che amigokuérandi. Péro og̃uahẽre ko nde raʼy, hoʼupa vaʼekue ndehegui nde pláta kuña rekovai rapykuéri, rekarneáma voi chupe pe tororaʼy ikyravéva’” (Lucas 15:25-30).

¿Mávapa umi ojoguáva pe taʼýra ypykuépe ha ndoipotáiva ojeporiahuvereko umi pekadórpe? Umi mboʼehára leipegua ha fariseokuéra. Haʼekuéra okopi Jesúsre orresivi haguére umi pekadórpe, ha upévare haʼe omombeʼu ko ehémplo. Añetehápe, oimeraẽva ipochyséva Ñandejára oiporiahuvereko haguére umi oñarrepentívape, ojepyʼamongeta porã vaʼerã ko ehémplore.

Omohuʼã hag̃ua ko istória Jesús omombeʼu mbaʼépa heʼi pe túva itaʼýra ypykuépe: “Che raʼy, nde ningo reikóva voínte chendive tapiaite, ha opa mbaʼe che arekóva nembaʼénte voi. Péro koʼág̃a javyʼa ha ñandepyʼarory vaʼerã, ko ne ermáno ningo omanóma kuri ha oikove jey, okañy vaʼekue ha ou jey” (Lucas 15:31, 32).

Ko istóriape noñemombeʼúi mbaʼépa ojapo upe rire pe taʼýra ypykue. ¿Mbaʼépa ikatu jaʼe umi ohendúvare ko istória? Jesús omano ha oikove jey rire “heta saserdóte oñepyrũ ojerovia” (Hechos 6:7). Upéva ohechauka hesekuéra jepe opoko hague ko rreláto, upévare oñarrepenti ha oñemoag̃ui hikuái Ñandejárare.

Jesús disipulokuéra oaprende heta mbaʼe ko istóriagui ha oñehaʼãmbaite vaʼerã omoĩ en práktika koʼã mbaʼe. ¿Mbaʼe mbaʼépa omboʼese raʼe Jesús ko ehémplo rupive? Primero, iporãveha siémpre ñaime umi oservívandi Ñandejárape, jaiko rangue ñaneakãre. Jehová ningo ñanderayhu ha omeʼẽ ñandéve opa mbaʼe ñaikotevẽva, upévare ndovaléi ñañemomombyry chugui.

Segundo, ñanemboʼe avei jajúramo japeka Ñandejára kóntrape, ñaneumílde vaʼerãha ha pyaʼe ñañemoag̃ui jey hese, ikatu hag̃uáicha haʼe ñanderresivi jey.

Ha tercero, jahecha pe túva idiferenteha pe taʼýra ypykuégui. Pe túva operdonakuaa, péro itaʼýra ypykue katu ipyʼaro ha ndorresiviséi iñermánope. Upéva ñanemboʼe javyʼa vaʼerãha oĩramo peteĩ ñane ermáno oñarrepentíva ha ou jeýva kongregasiónpe. Haʼéngo haʼete ku ‘omanómava kuri ha oikove jey, okañýva péro ou jey’.