Departaménto de Rredaksión (Estados Unidos)

Corea del Sur

Armenia

Burundi

Sri Lanka

Ikatu hag̃uáicha oñemombeʼu pe “marandu porã [...] entéro tetã, trívu, puévlo ha umi oñeʼẽvape opaichagua idiómape”, rotradusi ore puvlikasionkuéra más de 750 idiómape (Apocalipsis 14:6). ¿Mbaʼéichapa rojapo ko tembiapo tuichaitéva? Oĩ ermáno opa tetãygua ohaíva umi puvlikasión ha umi grúpo otradusíva. Umíva enterove testígo de Jehová.

Umi puvlikasión ñepyrũrã ojehai ingléspe. Pe Kuérpo Governánte omoakã umi tembiapo ojejapóva Departaménto de Rredaksiónpe. Umi ohaíva puvlikasionkuéra ombaʼapo ofisína sentrál ha ambue sukursálpe, ha pe Departaménto de Rredaksión omeʼẽ chupekuéra hembiaporã. Heta tetãygua ombaʼapo hendivekuéra upe Departaméntope, ha upéicha rupi umi puvlikasiónpe oñeñeʼẽ diferénte téma ha kostúmbre rehe. Upévare opa tetãyguápe ogustaiterei ore puvlikasión.

Umi ojehai vaʼekue oñemondo traduktorkuérape. Ojehaipávo pe informasión osẽtava, oñemondo Internet rupive umi traduktórpe, oĩva opárupi ko yvy ape ári. Upéi haʼekuéra oñepyrũ otradusi, orrevisa ha omoĩ porã oĩ vaihápe oñeimprimi hag̃ua. Umi traduktór oñehaʼãmbaite oiporu umi “ñeʼẽ añeteguáva” ikatu hag̃uáicha otradusi hendaitépe iñidiómape umi mbaʼe heʼíva ingléspe (Eclesiastés 12:10).

Tuicha orepytyvõ umi komputadóra. Peteĩ komputadóra ndaikatúi omyengovia peteĩ ohaíva térã otradusívape. Upéicharõ jepe, tuicha oipytyvõ ojejapo pyaʼeve hag̃ua umi tembiapo. Ikatu ojekarga pype umi diksionário ha ambue prográma oipytyvõva umi traduktórpe oinvestiga pyaʼeve hag̃ua. Oĩ ótro prográma ore testígo de Jehová ropreparáva, hérava Sistema Electrónico de Edición Plurilingüe (MEPS, ingléspe). Upéva rupive ikatu hetaiterei idiomapegua informasión oñemoĩ ko prográmape, oñemohenda opyta porã hag̃uáicha umi taʼanga ndive ha ojejapopa rire oñeimprimi.

Ore roñehaʼãmbaite rotradusi heta idiómape, ndahetáiramo jepe umi oñeʼẽva upe idiómape. ¿Mbaʼérepa rojapo upéicha? Jehová ningo “oipota opaichagua tapicha ojesalva ha oikuaa porã pe añetegua” (1 Timoteo 2:3, 4).

  • ¿Mbaʼe mbaʼépa ojejapo ojehai hag̃ua ore puvlikasionkuéra?

  • ¿Mbaʼérepa hetaite idiómape rotradusi ore puvlikasionkuéra?