Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jajeroviave hag̃ua

 KAPÍTULO 11

Ohaʼarõkuaa ha oñatende porã

Ohaʼarõkuaa ha oñatende porã

1, 2. ¿Mbaʼe tembiapo ijetuʼúvapa ojapo vaʼerã Elías, ha mbaʼérepa Elías ha Acab ndojojoguaiete?

ELÍAS opytasetereíma haʼeño pe sérro Carmélope oñemboʼe hag̃ua Itúva yvagapeguápe. Péro oĩ gueteri ijerére umi hénte ohecha vaʼekue mbaʼéichapa Jehová ombohovái chupe iñemboʼe omboúvo tata yvágagui. Upéicha rupi oiméne heta oĩ oñembojaséva raʼe hendápe haʼe ovendesi hag̃ua chupekuéra. Avei Elías oñemohaʼeño mboyve oñemboʼe hag̃ua Ñandejárape, oñeʼẽ vaʼerã rréi Acab ndive, ha upéva oiméne ijetuʼueterei raʼe chupe.

2 Elías ha Acab ningo ni michimĩ ndojojoguái. Rréi Acab omonde umi ao iporãmba jepéva, oiporúva jepi voi umi rréi, nomombaʼéi Jehovápe, itaryrýi ha oheja ótro odesidi hese. Elías katu oñemonde umi proféta oñemondeháicha jepi voi, oiméne oiporu peteĩ ao sensillomi ojejapóva kaméllo térã kavara raguekuégui térã ótro animál pirekuégui. Haʼe ojerovia mbarete, ipyʼaguasu ha iñeʼẽrendu Ñandejárape ipyʼaite guive. Ko díape ojekuaa porã mbaʼeichagua persónapa Acab ha Elías.

3, 4. a) ¿Mbaʼérepa oñemotĩ Acab ha umi omombaʼeguasúva Baálpe? b) ¿Mbaʼe porandúpa oñembohováita?

3 Hetáma ningo oñemotĩ Acab ha umi omombaʼeguasúva Baálpe. Rréi Acab ha hembireko Jezabel omboliga vaʼekue umi 10 trívu Israelguápe omombaʼeguasu hag̃ua pe diós guaʼu Baálpe, ha koʼág̃a opyta vaieterei upe rrelihión. Entéronte ohechakuaa Baal ndovaleiha mbaʼeverã. Iprofetakuéra ningo ojerure asy, ojeroky ha ojekutu saʼipa hesehápe, upéicharamo jepe ni peteĩ tata ndaikatúi ombojepota ko diós guaʼu ni ndosalvái umi 450 saserdóte japu  ojejukapa vaʼekuépe. Ha ndahaʼéi upéva añónte, tres áñorema iprofetakuéra ojerure Baálpe omongymínte hag̃ua, ha mbaʼevete ndoikói. Péro Jehová ohechauka porãta haʼe añoiteha Ñandejára añetegua ha omboúta peteĩ ama ndetuichapa jepéva (1 Rey. 16:30–17:1; 18:1-40).

4 Péro, ¿arakaʼépa Jehová ojapóta upéva? ¿Mbaʼépa ojapo Elías ohaʼarõ aja pe ama? ¿Mbaʼépa ñande ikatu ñaaprende ko kuimbaʼe ojeroviaitévagui? Ñambohovái hag̃ua koʼã porandu jahechami mbaʼépa heʼi la Biblia (elee 1 Reyes 18:41-46).

Haʼe siémpre oñemboʼe

5. ¿Mbaʼépa Elías heʼi Acábpe, ha oñarrepentípa raʼe ko rréi?

5 Elías heʼi Acábpe: ‘Tereho ekaru ha heyʼu, cháke oñehendúma hína ama ryapu’. ¿Oñarrepentípa pe rréi ñañaite ohecha rire umi mbaʼe oikóva? La Biblia nomombeʼúi upéva, ndeʼíri Acab oñarrepenti ni ojerure hague Elíaspe oñemboʼe hag̃ua Jehovápe hesehápe, ikatu hag̃uáicha oñeperdona chupe. Omombeʼúnte Acab oho hague ‘okaru ha  hoyʼu’ (1 Rey. 18:41, 42). Péro, ¿mbaʼépa ojapo Elías upe aja? ¿Mbaʼépa heʼi Ñandejára Ñeʼẽ hese?

6, 7. ¿Mbaʼépa Elías ojerure Jehovápe, ha mbaʼérepa?

6 La Biblia omombeʼu: ‘Elías ojupi sérro Carmelo ruʼãme, ha oñesũ pe yvýpe ha omoĩ hova henypyʼã paʼũme’. Acab ni michĩmi ndojepyʼapýi mbaʼevére ha okarúnte oikóvo. Proféta Elías katu oaprovecha itiémpo oñemboʼe hag̃ua Itúva yvagapeguápe. ¿Jahechakuaápa mbaʼéichapa Elías oñemoĩ oñemboʼe hag̃ua? Haʼe oñesũ, ojayvy ha ombojalénto hova yvýre, upéva ohechauka iñumildetereiha. ¿Mbaʼépa haʼe ojerure Jehovápe? Santiago 5:18-pe, la Biblia omombeʼu Elías peteĩ jey oñemboʼe hague Jehovápe ombou hag̃ua peteĩ ama, ha oiméne upérõ haʼe oĩ raʼe sérro Carmélope.

Elías ñemboʼére jahechakuaa oipotaitereiha oñekumpli Ñandejára rembipota

7 Elías oikuaa Jehová heʼi hague: ‘Amongýta hína yvy ári’ (1 Rey. 18:1). Upéicharõ, Elías ojerurénte hína oiko hag̃ua Ñandejára rembipota. Ha mil áñorupi upe rire, Jesús omboʼe avei hemimboʼekuérape ojerure hag̃ua tojejapo Ñandejára rembipota (Mat. 6:9, 10).

8. ¿Mbaʼépa ikatu ñaaprende Elías ñemboʼégui?

8 Heta mbaʼe ningo ikatu ñaaprende Elías ñemboʼégui. Chupe g̃uarã iñimportanteve vaʼekue oñekumpli Jehová rembipota. Upéicha avei ñande ñañemboʼe jave, ñanemanduʼa vaʼerã ko téxto heʼívare: “Oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta” (1 Juan 5:14). Péro jaikuaa hag̃ua mbaʼe mbaʼépa ikatu jajerure ñane ñemboʼépe, jaikuaa raẽ vaʼerã mbaʼépa Ñandejára rembipota, ha upearã tekotevẽ káda día jastudia Iñeʼẽ. Avei Elías oñemboʼéne raʼe Jehovápe omongy hag̃ua ohechágui mbaʼéichapa umi isrraelíta ohasa asy, ha upe rire oagradese chupe ombou haguére upe ama. Upéicha avei ñañemboʼe jave jahechauka vaʼerã jajepyʼapyha ñande rapichakuérare ha jaagradeseha Jehovápe ñande pyʼaite guive imbaʼeporãiterei  haguére ñanendive (elee 2 Corintios 1:11 ha Filipenses 4:6).

Ojerovia ha oñatende porã

9. ¿Mbaʼépa heʼi Elías hembiguáipe, ha mbaʼe iñimportántevapa ñanemboʼe?

9 Elías oikuaa porã Jehová omboutaha pe ama, péro ndoikuaáinte arakaʼetépa. ¿Mbaʼépa ojapo ko proféta ohaʼarõ aja og̃uahẽ upe día? La Biblia omombeʼu: ‘[Elías] heʼi hembiguáipe: “Terehomína emaʼẽ mar gotyo”. Haʼe oho omaʼẽ ha heʼi: “Ndaipóri mbaʼeve”. Elías katu heʼi chupe: “Tereho jey”, siete vése’ (1 Rey. 18:43). Péicha Elías ñanemboʼe tekotevẽha jajerovia Jehováre ha siémpre ñañatende porã, koʼã mbaʼe ningo iñimportanteterei.

Elías ojerovia Jehová okumplitaha ipromésa ha ohechaseterei oimeraẽ señál ohechaukáva chupe oikotamaha

10, 11. a) ¿Mbaʼéichapa Elías ohechauka ojeroviaha Jehová promésare? b) ¿Mbaʼérepa ñande avei ikatu jajerovia Elías ojerovia haguéicha?

10 Proféta Elías ojerovia Jehová okumplitaha katuete ipromésa ha ohechaseterei oimeraẽ señál ohechaukáva chupe oikopotaitemaha. Upévare omondo hembiguáipe peteĩ lugár ijyvatevehápe omaña hag̃ua pe tiémpore, ndojekuaái mbaʼépa okytamaha. Péro káda oúnte heʼi chupe: “Ndaipóri mbaʼeve”. Omimbi pe ára, ndojekuaaiete voi okytaha. ¿Mbaʼérepa upéicharõ Elías heʼi raʼe rréi Acábpe oñehendumaha pe ama ryapu? ¿Mbaʼéicha piko heʼíta upéicha ndaipóriramo ni peteĩ arai?

11 Elías ningo peteĩ proféta oñeʼẽva Jehová rérape, ha oikuaa porã Ñandejára opromete hague omboutaha peteĩ ama ha ojerovia okumplitaha katuete iñeʼẽ. Haʼe ojeroviaiterei rupi haʼete voi ohendupámava pe ama ryapu. Upéva ñanemomanduʼa la Biblia heʼíva Moisés rehe: “Osegi ojerovia mbarete ohecharamoguáicha Upe ikatuʼỹvape jahecha”. ¿Ñandépa jajerovia avei péicha ñande pyʼaite guive Ñandejárare? Haʼe ningo hetaiterei hendáicha ohechaukáma ñandéve ikatuha jajerovia hese ha ipromesakuérare (Heb. 11:1, 27).

12. ¿Mbaʼéichapa Elías ohechauka oñatende porã hague, ha mbaʼépa ojapo oikuaávo opuʼãha peteĩ arai michĩva?

12 Jahechamína mbaʼérepa jaʼekuaa Elías oñatende  porã hague. Haʼe siete vése voi omondo hembiguáipe omaña hag̃ua pe tiémpore, ha haʼe heʼíramo jepe ndojekuaaiha ni peteĩ arai, Elías osegi ojerovia mbarete ha ojesareko porã ohecha hag̃ua umi señál. Oiméne pe hembiguái ikaneʼóma anga ou ha oho hague. Upéi, siete vése ohohápe, heʼi Elíaspe: ‘¡Péina amo ojupi hína márguio peteĩ arai, peteĩ kuimbaʼe popytéichante tuicháva!’. Ñañeimahinamína mbaʼéichapa hembiguái oipyso ijyva ha oavri ipo ohechauka hag̃ua chupe mbaʼéichapa michĩ upe arai ohecha vaʼekue. Ikatu chupe g̃uarã naiñimportanteguasúi upe arai, péro michĩramo jepe, Elíaspe g̃uarã tuichaiterei mbaʼéma upéva. Upe rire Elías heʼi jey hembiguáipe: “[Pyaʼe] tereho ere Acábpe tojupi ikárrope ha toho, ani ojoko chupe ama” (1 Rey. 18:44).

13, 14. a) ¿Mbaʼéichapa ikatu ñañatende porã Elías ojapo haguéicha? b) ¿Mbaʼérepa koʼág̃ama ñañatende porã vaʼerã?

13 ¿Mbaʼépa ikatu ñaaprendeve Elías ehémplogui? Ñane tiémpope avei Ñandejára koʼẽrõitéma okumplipaitéta ipromesakuéra. Ha Elías ohaʼarõ haguéicha opa pe séka puku, ñande avei koʼág̃a ñahaʼarõ hína opa ko múndo aña (1 Juan 2:17). Péro ñahaʼarõ aja upe día, tekotevẽ avei ñañatende porã, Elías ojapo haguéicha. Ñandejára Raʼy heʼi vaʼekue voi hemimboʼekuérape: “Peñatende porãke peikóvo, cháke ndapeikuaái hína mbaʼe díapa oúta pende Ruvicha” (Mat. 24:42). ¿Heʼisépa raʼe Jesús hemimboʼekuérape ndoikuaamoʼãiha hikuái arakaʼérupipa oñehundíta ko múndo aña? Nahániri, Jesús upe mboyvemi omombeʼu kuri mbaʼe mbaʼépa oikóta koʼã ára pahápe. Ha ñande koʼág̃a jahecháma mbaʼéichapa oñekumpli umi mbaʼe haʼe heʼi vaʼekue, ohechaukáva “ko múndo ára pahaite oñemoag̃uimaha” (elee Mateo 24:3-7).

¿Ovalémapa umi señál jahechakuaa hag̃ua tekotevẽha koʼág̃ama ñañatende porã? Elías peteĩ arai michĩmívante ohecha kuri, ha upéva ovaléma chupe g̃uarã ojerovia hag̃ua Jehováre

14 Jahechávo mbaʼéichapa oñekumpli ohóvo umi señál ohechaukáva ñaimemaha ára pahápe, jajeroviakuaa Jehová  okumplipotaiteha umi mbaʼe oprometéva. Péro, ¿ovalémapa umi señál jahechakuaa hag̃ua tekotevẽha koʼág̃ama ñañatende porã? Elías ningo peteĩ arai michĩmívante ohecha kuri, ha upéva ovaléma chupe g̃uarã ojerovia hag̃ua Jehová okumplipotaitemaha ipromésa. Péro, ¿oikópa raʼe Elías ohaʼarõ haguéicha?

Jehová oporopytyvõ ha oporovendesi

15, 16. ¿Mbaʼépa oiko raʼe, ha mbaʼépa oiméne Elías oñeporandu raʼe Acab rehe?

15 La Biblia osegi omombeʼu: ‘Ou pe arai yvytu reheve, iñypytũmba pe ára, ha ou peteĩ ama ndetuichapa jepéva. Ha Acab ojupi ikárrope ha oho Jezreélpe’ (1 Rey. 18:45, NM). Pe proféta rembiguái omombeʼu aja gueteri rréi Acábpe Elías heʼika vaʼekue chupe, tuichave ohóvo pe arai, upéi iñypytũmbáma katu ha hatã oipeju pe yvytu. Upéicha, hasýpe oky jey Israélpe, tres áño ha seis mése haguépe. Ha pe yvy isekoitereígui pyaʼeterei oipytepa pe y. Tuichaiterei oky, upévare pe rrío Cisón okakuaave ohóvo ha pe y oguerahapa Baal profetakuéra ruguykue. Umi isrraelíta koʼág̃a oguereko oportunida okambia hag̃ua ha omombaʼeguasu jey hag̃ua Jehovápe. ¿Oaprovecháta hikuái upéva?

“Ou peteĩ ama ndetuichapa jepéva”

16 Elías ningo oipota umi Israelgua omombaʼeguasu jey Ñandejára Jehovápe. Ha oiméne avei oñeporandu oñarrepentítapa koʼág̃a rréi Acab, térãpa osegíta omombaʼeguasu Baálpe. Umi mbaʼe oikóvare upe árape, pe rréi ohechakuaáma vaʼerã tekotevẽha okambia. Péro ndajaikuaái haʼépa opensa raʼe upéicha, la Biblia heʼínte Acab “ojupi [hague] ikárrope ha oho Jezreélpe”. ¿Oaprovechátapa pe oportunida oguerekóva koʼág̃a okambia hag̃ua? Upe oiko vaʼekue upe rire ohechauka ndaupeichaiete hague. Péro upe díape heta mbaʼe gueteri ohaʼarõ rréi Acab ha Elíaspe.

17, 18. a) ¿Mbaʼépa oiko Elías rehe ohokuévo Jezreélpe? b) ¿Mbaʼérepa jahecharamoiterei oiko vaʼekue Elías rehe tapére? (Ehecha avei pe nóta.)

17 Upéi proféta Elías oho avei rréi Acab ohoha gotyo. Mombyry oho vaʼerã, hiʼarive tiémpo vai ha tuicha oky. Péro upeichaháguinte oiko peteĩ mbaʼe ñaimoʼãʼỹva.

 18 La Biblia omombeʼu: “[Jehová] omombarete Elíaspe, ha haʼe ojekuʼajokua ha oñani Acab renonderã og̃uahẽ meve Jezreélpe” (1 Rey. 18:46). Jehová nomombaretéirire Elíaspe, ndojapói vaʼerãmoʼã upéva. Jezreel ningo opyta 30 kilómetrorupi upégui, ha Elías hiʼarive ndahaʼevéima peteĩ mitãrusu. * Tuichaiterei ningo oky ha Elías ohupi ijao ruguái ha oñapytĩ ikuʼáre ani hag̃ua ostorva chupe ha hatã odipara ohóvo pe amáme. Ni Elías noimoʼãi pyaʼeterei ohoha. Haʼe ohupyty rréi Acábpe, ohóva hína peteĩ kárrope, ha upéi ohasáma katu chupe mombyryeterei.

19. a) ¿Mbaʼe profesíarepa ñanemanduʼa jaikuaávo oiko vaʼekue Elías rehe? b) ¿Mbaʼépa oikuaa porã Elías odiparárõ guare ohóvo Jezreélpe?

19 ¡Oiménepa ovyʼaite rakaʼe Elías ohechakuaávo mbaʼéichapa imbarete, ikyreʼỹ, iñakuã ha mombyryeterei peve odipara! Ni imitãrusúpe noñeñanduichéne rakaʼe upéicha. Ko mbaʼe oiko vaʼekue ñanemomanduʼa umi profesía heʼívare Jehová siervokuéra iñeʼẽrendúva imbarete ha hesãi jeytaha oiko vove ko yvýgui peteĩ hardín neporãva (elee Isaías 35:6; Luc. 23:43). Péro pe iñimportantevéva, Elías kyreʼỹme odipara oikuaágui Ñandejára añetegua oĩha hendive.

20. ¿Mbaʼépa jajapo vaʼerã Jehová ñanevendesi hag̃ua?

20 Jehovápe ningo hiʼãiterei ñanevendesi, ha ñañehaʼã vaʼerã jajapo opa ikatúva jahupyty hag̃ua upéva. Umi mbaʼe oikóvare jahechakuaa koʼẽrõitéma Jehová okumplipaitetaha ipromesakuéra. Upévare, Elías ojapo haguéicha, ñañatende porã vaʼerã jaikóvo, ñaneñeʼẽrendu ha jajerovia “[Ñandejára] añetegua” katuete okumplitaha umi mbaʼe oprometéva (Sal. 31:5).

^ párr. 18 Oikopa riremi koʼã mbaʼe, Jehová heʼi Elíaspe ombokatupyry hag̃ua Eliséope profetarã. Haʼe ningo oiko vaʼekue “Elías rembiguáiramo” ha oñohẽmi chupe ipóre y ojepohéi hag̃ua (2 Rey. 3:11). Upéva ohechauka Elías itujáma hague ha oikotevẽ Eliseo oipytyvõ chupe.