Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jajeroviave hag̃ua

 KAPÍTULO 21

Oaprende ndovaleiha okyhyje ni ipyʼamokõi

Oaprende ndovaleiha okyhyje ni ipyʼamokõi

1-3. ¿Mbaʼépa Pedro ohecha Jesús ojapoha peteĩ milágro rupive, ha mbaʼépa ohasa upe pyharépe?

PEDRO osegi orrema pe pyhare rei ani hag̃ua oñapymi hikuái pe mar de Galiléape. Upeichaháguinte, ohecha hesakã sapyʼa éste gotyo. ¿Oime piko koʼẽtama mbaʼe? Upérõ ningo hatãiterei pe yvytu, pe mar ipochy ha umi oláda hatã hatã ombeti jepi pe kanóare. Pedro hykuesópa anga ha hete rasypáma, upéicharõ jepe osegínte orrema.

2 Péro haʼe noĩri haʼeño upe kanóape, oĩ avei hendive Jesús disipulokuéra, péro Jesús opytánte kuri. Upe díape haʼe omongaru kuri hetaiterei héntepe peteĩ milágro rupive. Upévare umi hénte omoĩse chupe rréiramo. Péro haʼe ndoikéi polítikape ha omboʼese hemimboʼekuérape ojapo hag̃ua avei upéicha. Upévare Jesús okañy umi héntegui ha heʼi ijapostolkuérape ojupi hag̃ua pe kanóape ha ohasa hag̃ua pe ótro ládo. Upe aja haʼe oho peteĩ sérrope oñemboʼe hag̃ua haʼeñohápe (Mar. 6:35-45; elee Juan 6:14-17).

3 Haʼekuéra osẽrõ guare, pe jasy yvate gueteri oĩ kuri, péro koʼág̃a okañýma ohóvo poniénte gotyo ha haʼekuéra katu mar mbytérupi ramo oho. ¿Mbaʼérepa? Hatãiterei pe yvytu ha pe mar ipochyeterei, upévare ni noñohenduvéima hikuái oñeʼẽvo ojupe. Enterovénte oñehaʼãmbaite ani hag̃ua oyguy hesevekuéra ikanóa. Oiméne upépe Pedro opensa raʼe heta mbaʼére.

Heta mbaʼéma Pedro oaprende Jesúsgui, péro heta mbaʼe gueteri ofalta chupe

4. ¿Mbaʼéichapa Pedro omoĩ ehémplo porã ñandéve g̃uarã?

 4 Upérõ ojapóma dos áño rasa Pedro omoirũ hague Jesúspe, ha katuete orekóne heta mbaʼe opensa hag̃ua. Ha oikuaámaramo jepe heta mbaʼe, ohechakuaa heta gueteri ofaltaha chupe. Pedro ningo omoirũ porãse Jesúspe, upévare oñehaʼãmbaite okambia anive hag̃ua okyhyje ha ipyʼamokõi. Péicha haʼe omoĩ peteĩ ehémplo iporãva ñandéve g̃uarã. Jahechavemína mbaʼépa ojapo raʼe.

“Rotopa pe Mesíaspe”

5, 6. ¿Mbaʼéichapa oiko vaʼekue Pedro, ha mbaʼépepa ombaʼapo?

5 Pedro arakaʼeve ndahesaraimoʼãi mbaʼéichapa oikuaa ypy vaʼekue Jesúspe. Iñermáno Andrés oho vaʼekue heʼi chupe: “Rotopa pe Mesíaspe”. Upérõ oiméne haʼe ni noñeimahinái tuicha okambiataha hekove (Juan 1:41).

6 Pedro oiko Capernáumpe, opytáva nórte gotyo mar de Galilea rembeʼýpe. Haʼe ningo ombaʼapo pira ñevendépe Andrés ndive ha avei Zebedeo raʼykuérandi, hérava Santiago ha Juan. Hógape katu oiko hendive hembireko, isuégra ha iñermáno Andrés. Upe tiémpope umi peskadór ikatupyry, imbarete ha ombaʼapo kyreʼỹ vaʼerã omantene hag̃ua ifamíliape. Sapyʼánte, peteĩ pyhare pukukue ombaʼapo vaʼerã hikuái. Oiporu mokõi kanóa guasu oity hag̃ua irredkuéra ha oguenohẽ umi pira. Upéi osegi ombaʼapo hikuái koʼẽmba rire: oiporavo ha ovende umi pira, ha avei omopotĩ ha orremenda irredkuéra.

7. ¿Mbaʼépa oñemombeʼu raʼe Pédrope, ha mbaʼérepa ombovyʼaiterei chupe upe notísia?

7 La Biblia omombeʼu mbaʼéichapa Pedro oñepyrũ vaʼekue omoirũ Jesúspe. Iñermáno Andrés haʼe vaʼekue Juan el Bautista disípulo, ha oiméne haʼe omombeʼu jepi Pédrope umi mbaʼe oaprendéva Juángui. Upéi, peteĩ díape Andrés ohendu imboʼehára heʼívo peteĩ mbaʼe iñimportantetereíva. Juan ohechávo Jesúspe, heʼi: “¡Pemañami, Ñandejára Ovecharaʼy!”. Ha ensegída Andrés omoirũ Jesúspe ha vyʼápe oho omombeʼu Pédrope oumaha pe Mesías ohaʼarõitéva hikuái (Juan 1:35-41). Upérõ ojapóma 4.000 áñorupi Jehová opromete hague omboutaha peteĩ osalva vaʼerã yvyporakuérape ha omeʼẽtava esperánsa (Gén. 3:15). ¡Og̃uahẽ sapyʼa pe  Mesías aretéma oñehaʼarõva! Ha Pedro oikuaávo upéva, pyaʼe porã oho ohecha hag̃ua chupe.

8. ¿Mbaʼérepa Jesús ohenói Simónpe Pedro, ha mbaʼérepa oĩ opensáva ndopytaporãiha hese upe téra?

8 Upérõ Pédrope oñehenói vaʼekue Simón, térã Symeón. Péro Jesús ohecha ypýrõ guare chupe, heʼi: “‘Nde hína Simón, Juan raʼy. Koʼág̃a nderérata Cefas’ (heʼiséva Pedro)” (Juan 1:42). “Cefas” ningo heʼise “ita”. Oiméne Jesús ombohéra chupe upéicha oprofetisa hag̃ua mbaʼépa oikóta Pédrogui amo gotyove. Ohechakuaáne raʼe Pedro ojoguataha peteĩ “itápe”, ojerovia mbarete rupi ha péicha tuichaiterei oipytyvõtaha pe kongregasiónpe. Péro, ¿opensápa Pedro upéicha ijehe? Nahániri. Heta tapicha olee rire la Bíbliape Pedro rembiasakue, opensa voi hese siémpre okyhyje, ipyʼamokõi ha ndojeroviái hague ijehe.

9. ¿Mbaʼépa Jehová ha Jesús ohecha ñanderehe, ha mbaʼérepa jajerovia vaʼerã haʼekuéra opensávare ñanderehe?

9 Pedro ningo oreko vaʼekue idefékto, ha Jesús oikuaa porã umíva. Upéicharõ jepe, Itúva ojapoháicha, haʼe ojesareko umi mbaʼe porã ojapóvare Pedro. Upévare haʼe ohechakuaa ko idisípulo ikatutaha ojapo heta mbaʼe porã ha oipytyvõse chupe okambia hag̃ua tekotevẽhápe. Koʼág̃arupi avei Jehová ha Jesús ojesareko umi mbaʼe porã jajapóvare. Péro, ¿mbaʼépa oikóta ñande voi ñaimoʼãramo avave ndohechamoʼãiha ñanderehe mbaʼeve iporãva? Upéicha jave jajerovia vaʼerã Jehová ha Itaʼýra opensávare ñanderehe, ha Pedro ojapo haguéicha, jaheja chupekuéra tañanerekomboʼe ha tañanepytyvõ (elee 1 Juan 3:19, 20).

“Anive rekyhyje”

10. ¿Mbaʼépa ohecha raʼe Pedro, péro mbaʼépa oho jey ojapo upe rire?

10 Oikuaa rire Jesúspe, Pedro oiméne oho rakaʼe hendive heta hendápe ohendu hag̃ua chupe opredika jave. Upéicha rupi oiméne ohecha raʼe pe primer milágro Jesús ojapo vaʼekue peteĩ kasamientohápe, upérõ haʼe ojapo ýgui víno. Ha iñimportanteveha, Pedro ohendu chupe omombeʼúvo pe notísia porãite oñeʼẽva Ñandejára Rréinore. Péro upe rire Pedro oho jey ombaʼapo pira ñevendépe. Tiémpo riréma,  ojotopa jey Jesús ndive ha upérõ haʼe heʼíma Pédrope omoirũ meme hag̃ua chupe.

11, 12. a) ¿Mbaʼépa oiko raʼe Pedro rehe pe pyhare ojotopa mboyve Jesús ndive? b) ¿Mbaʼépa oiméne Pedro opensa ohendúvo Jesúspe?

11 Upe pyhare ojotopa mboyve Jesús ndive, Pedro ha iñirũnguéra opeska kuri pyhare pukukue ha noguenohẽi mbaʼevete. Oity ha oguenohẽ jepi hikuái irredkuéra ha ndojagarrái ni peteĩ pira. ¿Mbaʼe piko oikopa umi pirágui? Pedro ningo ikatupyry peskádape ha oiméne otanteapáma raʼe umi lugár oikuaahápe oĩha heta pira, péro ni upeichavérõ mbaʼeve nokonsegíri. Oiméne hiʼãiterei chupe ohecha pe y ruguápe moõitépa oĩ umi pira, oity hag̃ua upépe irréd. Ñanemanduʼa vaʼerã avei Pedro ndopeskaiha ojediverti hag̃uánte, síno omantene hag̃ua ifamíliape. Ha opensaitereíramo upévare, ojepyʼapy ha oñeñandu vaítante voi. Péro amo ipahápe ikueráima otantea hague ha osẽ pe y rembeʼýpe. ¡Mbaʼevete voi anga noguenohẽi! Upémaramo oñemoĩ omopotĩ irredkuéra, ha upe javete og̃uahẽ oúvo Jesús.

Pedro ningo órare voi ohendúta Jesúspe oñeʼẽ jave Ñandejára Rréino rehe

12 Avei Jesús ndive ou heta hénte ha ojerepa voi hese hikuái ohendu hag̃ua chupe. Upémaramo haʼe ojupi pe kanóape ha ojerure Pédrope oguerahaʼimi hag̃ua chupe pe y rembeʼýgui. ¿Maʼerã piko Jesús ojapo upéicha? Pe y ári guive ningo oñehendu porãvéta chupe. Upéicha Pedro, ha avei umi hénte oĩva pe y oríllape, vyʼápe ohendu Jesúspe. Pedro ningo órare voi ohendúta chupe oñeʼẽ jave Ñandejára Rréinore. ¡Oiménepa hiʼãite chupe omoirũ Jesúspe omombeʼu hag̃ua opárupi pe marandu porã! ¿Péro ikatútapa ojapo upéva? ¿Mbaʼéichapa omantenéta ifamíliape omoirũramo Jesúspe? Oiméne Pedro imanduʼa raʼe pe ótro pyharépente noguenohẽi hague ni peteĩ pira ha tesaparápema ojecha (Luc. 5:1-3).

13, 14. ¿Mbaʼeichagua milágropa Jesús ojapo Pedro rehehápe, ha mbaʼéichapa haʼe oñeñandu?

13 Jesús oñeʼẽmba rire umi héntepe, heʼi Pédrope: “Errema hypyveha peve ha peity upépe pende rred pepeska hag̃ua”. Pedro ndojeroviapáiramo jepe, heʼi chupe:  “Mboʼehára, pyhare pukukue ningo roñehaʼã ha noronohéi mbaʼevete. Péro nde ere rupínte aitýta umi rred”. Oime vaʼerã Pedro ndohoseveietéma raʼe, ko angeténte omopotĩmbáva irréd ha ndahiʼoravéima avei ojepeska hag̃ua. Péro ojapónte Jesús heʼíva chupe, ha oiméne heʼi avei umi oĩvape umi ótro kanóape oho hag̃ua hendive (Luc. 5:4, 5).

14 Pedro ha iñirũnguéra ohupívo irredkuéra, oñandu sapyʼa ipohyiha, ha ojestira mbarete hese hikuái oguenohẽ hag̃ua. ¡Ni ndogueroviaséi hikuái hetaite pira ojagarraha! Upémarõ oseñea iñirũnguérape oĩva pe ótro kanóape, ou hag̃ua oipytyvõ chupekuéra. Haʼekuéra ou, ha mokõive kanóa henyhẽ chovi ha haimetemete oñapymi. Pedro oponderaiterei  upe oikóvare, ha ohechámaramo jepe heta milágro Jesús ojapóva, kóva opokoitereive hese ojapógui hesehápe. Pedro ohecha mbaʼeichaitépa Jesús ipoderóso ha okyhyjeterei, oñesũ henondépe ha heʼi chupe: “Ejeíntena che ypýgui che Ruvicha, chéngo pekadór”. Péicha jahechakuaa Pedro opensa hague nomereseiha omoirũ pe Mesíaspe, pe ojapóva opa mbaʼe Ñandejára podér rupive (elee Lucas 5:6-9).

“Ejeíntena che ypýgui che Ruvicha, chéngo pekadór”

15. ¿Mbaʼéichapa Jesús ohechauka Pédrope ndaiporiha ipyʼamokõi ha okyhyje hag̃ua?

15 Péro Jesús heʼi chupe: “Ani rekyhyje, koʼág̃a guive romboʼéta rejagarra hag̃ua hénte, rejagarraháicha pira” (Luc. 5:10, 11). Upéicha Jesús oinvita chupe ojapo hag̃ua peteĩ tembiapo ijojahaʼỹva. Upévare Pedro oñekonsentránte vaʼerã upe tembiapóre, ndaipóri ningo ipyʼamokõi ha okyhyje hag̃ua. Natekotevẽi ojepyʼapy mbaʼéichapa omantenéta ifamíliape. Haʼe oikuaa porã orekoha heta defékto ha ndaikatupyryiha, péro ndojepyʼapýi vaʼerã upévare oikuaágui oserviha Ñandejára ‘oporoperdonakuaávape’ (Is. 55:7). Haʼe ikatu ojerovia Jehová oipytyvõtaha chupe oñangareko hag̃ua ifamíliare ha ojapo porã hag̃ua hembiapo (Mat. 6:33).

16. ¿Mbaʼépa ojapo Pedro, Santiago ha Juan, ha mbaʼérepa jaʼekuaa odesidi porã hague hikuái?

16 Pedro ensegída voi omoirũ Jesúspe, ha upéicha avei ojapo Santiago ha Juan. La Biblia heʼi: “Haʼekuéra ogueru jey umi kanóa y rembeʼýpe, ha oheja opa mbaʼe ha omoirũ Jesúspe” (Luc. 5:11). Jahechakuaa Pedro odesidi porã hague ojeroviávo Jesús ha Jehová rehe. Péicha avei oĩ heta kristiáno ipyʼamokõi ha okyhyje vaʼekue oñemeʼẽmbaite hag̃ua Ñandejára servísiope, péro upéi ojerovia mbarete rupi odesidi porã, Pedro ojapo haguéicha. Koʼã ermáno ikatu avei ojerovia Jehová arakaʼeve ndohejareimoʼãiha chupekuéra (Sal. 22:4, 5).

“¿Mbaʼére piko péicha ndepyʼamokõi?”

17. ¿Mbaʼe mbaʼépa ohecha Pedro oikuaa ypy guive Jesúspe?

17 Ñanemanduʼami jeýna mbaʼépa oiko raʼe Pedro ha iñirũnguéra ohasátarõ guare mar de Galilea ha ojagarrárõ guare chupekuéra peteĩ torménta. Haʼekuéra orrema mbarete  ani hag̃ua oyguy chuguikuéra ikanóa. Upérõ ojapóma dos áño Pedro oikuaa hague Jesúspe ha oreko heta mbaʼe ojepyʼamongeta hag̃ua. Haʼe ohecháma mbaʼéichapa Jesús peteĩ milágro rupive omonguera isuégrape hasykatúrõ guare, avei ohendu chupe oñemoñeʼẽrõ guare pe Sermón del Móntepe ha oikuaa porã haʼeha pe Mesías, Jehová oiporavo vaʼekue. Pedro oikuaa ypy guive Jesúspe tuichaiterei okambia, upéicha rupi Jesús oiporavo chupe ijapostolrã. Yma Pedro ipyʼamokõi ha okyhyjetereími vaʼekue, koʼág̃a katu ndaupeichavéima. Upéicharõ jepe, sapyʼánte ikangy jey. ¿Mbaʼérepa jaʼe upéva?

18, 19. a) ¿Mbaʼépa ohecha raʼe Pedro oĩrõ guare mar de Galiléape? b) ¿Mbaʼépa Jesús heʼi Pédrope ohosérõ guare hendápe pe y ári?

18 Pedro ha iñirũnguéra oĩrõ guare gueteri mar de Galiléape, las trésrupi Pedro ohecha sapyʼa mbombyrymi peteĩ mbaʼe okuʼéva pe y ári. Upémarõ opoi irrémogui ha oñemboʼy ohecha porã hag̃ua mbaʼépa upéva. ¿Noiméi piko jasýnte ohesape pe oládare ha upéva ohecha Pedro? Nahániri. Haʼete ningo peteĩ oguatáva hína oúvo. Upéi ohecha porã sapyʼa mbaʼépa ha ndogueroviaséi pe ohecháva: ¡peteĩ kuimbaʼe oguata oúvo pe y ári ha haʼete ohasátava ijypyrupikuéra! Pedro ha iñirũnguéra tuichaiterei oñemondýi ha heʼijoa: “¡Mbaʼéiko pe oúva!”. Upépe pe kuimbaʼe heʼi chupekuéra: “Ani peñemondýi, chénteko; ani pekyhyje”. ¿Mávapa upe kuimbaʼe? Jesús (Mat. 14:25-28).

19 Pedro ohechávo ko milágro ipyʼaguasu ha ikyreʼỹ, upémarõ heʼi Jesúspe: “Ndéramo añete che Ruvicha, ere chéve aha hag̃ua ne rendápe y ári”. Jesús imbaʼeporã ha heʼi chupe: “¡Eju!”. Upémarõ Pedro pyaʼeterei oguejy pe kanóagui, ha oñepyrũ oguata pe y ári ha oho Jesús rendápe. ¡Epensamíntena mbaʼéichapa oiméne oñeñandu oguatávo ohóvo pe y ári ha noñapymíri! Ohecharamoiterei ha vyʼápe oho Jesús oĩha gotyo. Péro upeichaháguinte oiko peteĩ mbaʼe ñaimoʼãʼỹva (elee Mateo 14:29).

“Ohechávo pe torménta, okyhyje”

20. a) ¿Mbaʼépa oiko Pedro rehe? b) ¿Mbaʼépa Jesús heʼi Pédrope?

20 Jesús ohechakuaa Pedro ojerovia mbareteha, upévare Jehová podér rupive oheja chupe oguata pe y ári. Péro upeichaháguinte Pedro nomañavéi Jesús rehe ha ojesareko ótra kósare. La Biblia heʼi: “Ohechávo pe torménta, okyhyje ha oñepyrũ oñapymi”. Haʼe ohechávo mbaʼéichapa pe mar  ipochy ha umi oláda ombeti pe kanóa rehe, oñepyrũma okyhyje. Oiméne haʼe opensa ojahogataha upépe. Sapyʼaitérõ g̃uarã okyhyjeterei, ikangýma ijerovia ha peteĩ itáicha oñapymi. Ha hoʼytakuaáramo jepe, ndojeroviái ijehe ha osapukái Jesúspe: “Che Ruvicha, ¡chesalvamína!”. Upémarõ Jesús ojagarra Pédrope ipógui ha oguenohẽ chupe. Upéi heʼi: “Ajépa rejeroviaʼiete. ¿Mbaʼére piko péicha ndepyʼamokõi?” (Mat. 14:30, 31).

21. ¿Mbaʼérepa ipeligrosoite ñandepyʼamokõi, ha mbaʼépa ñanepytyvõta ani hag̃ua oiko ñanderehe upéva?

21 ¿Mbaʼépa ikatu ñaaprende Jesús heʼi vaʼekuégui Pédrope? Ipeligrosoha ñandepyʼamokõi, upéva káusa ikatu hína ndajajeroviavéi Jehováre ha ñañemomombyry chugui. Upévare aníkena jakyhyje ha ñandepyʼamokõi, síno siémpre jajesareko Jehová ha Jesús rehe, ha ani umi mbaʼe ikatu vaʼerãre ñanemokangy, ñanderesarea térã ñanedesanima. Jajesareko meme vaʼerã umi mbaʼe porãita haʼekuéra omeʼẽvare ñandéve koʼág̃ama voi, ha avei umi mbaʼe omeʼẽtavare ñandéve amo gotyove. Péicha jajapóramo, naikangymoʼãi ñande jerovia.

22. ¿Mbaʼérepa Pedro ehémplo porã ñandéve g̃uarã?

22 Pedro ha Jesús ojupi rire pe kanóape, oñekalmaite pe torménta, ha ndaipochyvéima pe mar. Pedro ha iñirũnguéra oponderaiterei upe oikóvare ha heʼijoa: “Añetehápe nde hína Ñandejára Raʼy” (Mat. 14:33). Pe kuarahy osẽma oúvo, ha oiméne Pedro ipyʼaite guive oagradese Jesúspe opa mbaʼére. Upe pyharépe oaprende ojeroviave vaʼerãha Jehová ha Jesús rehe, ha ndovaleiha okyhyje ni ipyʼamokõi. Péro heta mbaʼe gueteri ofalta chupe oiko hag̃ua chugui pe “ita” oipytyvõ mbaretétava pe kongregasiónpe. Upévare haʼe odesidi osegitaha oñehaʼã okambia tekotevẽhápe. ¡Ajépa iporãite Pedro ehémplo ñandéve g̃uarã! Ha ñande, ¿ñañehaʼãtapa jajapo avei upéicha?