“Pehaʼanga umi ojerovia ha ipasiénsiavape, umíva orresivíta umi mbaʼe porã oñepromete vaʼekue.” (HEBREOS 6:12)

1, 2. ¿Mbaʼérepa iñimportánte koʼág̃ama jajerovia mbarete? Emoĩ peteĩ ehémplo.

JEROVIA. ¡Ajépa tuichaite mbaʼe upéva! Ñahendúvo ko ñeʼẽ, katuete ñanemanduʼa iñimportantetereiha. Upévare oiméramo ndajajeroviái, pyaʼe jahecha vaʼerã mbaʼépa ikatu jajapo, ha oiméramo jajerovia ñande pyʼaite guive, jasegi vaʼerã ñamombarete ha ñañatende ani hag̃ua ikangy ñandehegui. ¿Mbaʼérepa tekotevẽ koʼág̃ama jajerovia mbarete?

2 Epensamína rehoha hína peteĩ desiérto tuichaitereívare ha ndeyʼuheieterei, upeichaháguinte retopa sapyʼa peteĩ ykua, pyaʼe voi rekarga ne mbaʼyru ha reñatende nde ýre ani hag̃ua opa térã hypa ndehegui. Ha ndahaʼéi upéva añónte, rehecha vaʼerã avei mbaʼéichapa rerrekarga jeýta jepi rehóvo reg̃uahẽ meve upe rehosehápe. Ko múndo ikatu ñambojoja pe desiértore, ha pe y ijakasoháicha pe desiértore, saʼi oĩ ojerovia añetéva Ñandejárare ko múndope. Upévare tekotevẽ ñañangareko ñande jeroviáre ha siémpre jarrekarga ani hag̃ua opa térã hypa ñandehegui. Ha ñaikotevẽháicha pe ýre jaikove hag̃ua, tekotevẽ jajerovia mbarete Jehováre jaikove hag̃ua opa árare (Rom. 1:17).

3. ¿Mbaʼéichapa Jehová ñanepytyvõ ñamombarete hag̃ua ñande jerovia, ha mbaʼépa oñehaʼarõ ñandehegui?

3 Jehová oikuaa tekotevẽtereiha jajerovia mbarete, péro oikuaa avei ijetuʼuha upéva koʼã tiémpope. Ha jahupytýramo katu ñañangareko vaʼerã hese ha koʼẽ koʼẽre ñamombareteve. Upearã Ñandejára ohaika Iñeʼẽme umi ehémplo ikatúva ñanepytyvõ. Apóstol Pablo rupive haʼe heʼi: “Pehaʼanga umi ojerovia ha ipasiénsiavape, umíva orresivíta umi mbaʼe porã oñepromete vaʼekue” (Heb. 6:12). Upévare Jehová organisasión ñanemokyreʼỹ jasegi hag̃ua umi kuimbaʼe ha kuña ojeroviaitéva ehémplo, umíva apytépe umi ñahesaʼỹijo vaʼekue ko lívrope. ¿Mbaʼépa oñehaʼarõ jajapo koʼág̃a? Primero, jasegi ñamombarete ñande jerovia, ha segundo jajesareko meme umi mbaʼe porã oñeprometévare ñandéve.

4. ¿Mbaʼépa ojapo Satanás ani hag̃ua jajerovia Ñandejárare, péro mbaʼérepa ndajakyhyjéi vaʼerã chugui?

4 Jasegíkena ñamombarete ñande jerovia. Upéva ningo iñimportánte, péro Satanás oñemoĩ mbarete ñanderehe ha ojapo ko múndogui peteĩ desiérto, upévare saʼieterei oĩ umi ojerovia mbaretéva Ñandejárare. Péro Satanás ipoderosovéramo jepe ñandehegui, ndajakyhyjéi vaʼerã chugui. Jajeroviáramo Jehováre, Haʼe katuete oĩta ñande ykére ha ñanepytyvõta. Jehová opromete ñandéve ñañemoag̃uíramo hese, ñandepuʼakataha Satanás rehe ha ikatu voi odipara ñandehegui (Sant. 4:7). Péro upearã káda día ñañehaʼã vaʼerã ñamombareteve  ñande jajerovia. ¿Mbaʼépa ñanepytyvõta upearã?

5. ¿Mbaʼéichapa Ñandejára siervokuéra yma guare omombarete ijerovia?

5 Jahecháma haguéicha, pe jerovia nañagueronaséi. Ñandejára siervokuéra rembiasakue oĩva la Bíbliape, ohechauka porã ñandéve pe jerovia ouha Ñandejára espíritu sántogui (Gál. 5:22, 23). Umi kuimbaʼe ha kuña iñeʼẽrenduetéva, oñemboʼe vaʼekue Ñandejárape oipytyvõmi hag̃ua chupekuéra, ha haʼe omombarete chupekuéra ijerovia ogueropuʼaka hag̃ua opa mbaʼe. Ñande avei ndajakyhyjéi vaʼerã jajerure hag̃ua Jehovápe ijespíritu sánto, haʼe ningo vyʼápe omeʼẽta ñandéve jajeruréramo chupe ha jajapóramo haʼe ohaʼarõva ñandehegui (Luc. 11:13). Péro, ¿mbaʼépa ikatu jajapove?

6. ¿Mbaʼépa jajapo vaʼerã ideprovécho hag̃ua ñandéve Ñandejára siervokuéra yma guare ehémplo?

6 Ko lívrope ñahesaʼỹijo heta kuimbaʼe ha kuña ojerovia mbaretéva rembiasakue, péro hetaitereive oĩ (elee Hebreos 11:32). Iporãta ñahesaʼỹijóramo umíva peteĩteĩ jastudia jave ñaneañohápe. ¡Hetaiterei mbaʼe ningo ikatu ñaaprende chuguikuéra! Ñahesaʼỹijóramo péicha péichante ndaideprovechomoʼãi ñandéve. Upévare, jastudia porãve hag̃ua, iporãta jaheka informasión ohechaukáva mbaʼeichahápepa oiko vaʼekue hikuái ha mbaʼe tiémpopepa. Jajapóramo upéicha, jahechakuaáta koʼã kuimbaʼe ha kuña haʼe hague “yvypóra ñandeichaguánte avei” ha ikatuha jasegi iñehémplo (Sant. 5:17). Ñañemoĩramo ilugarpekuéra, haʼetéta voi ñaiméva upépe ha jaikuaáva mbaʼéichapa oñeñandu hikuái ohasa jave umi provléma ñande jahasavaichagua.

7-9. a) ¿Mbaʼépa ojapóne Ñandejára siervokuéra yma guare ojeʼéramo chupekuéra mbaʼéichapa omombaʼeguasu vaʼerã Jehovápe koʼág̃a? b) ¿Mbaʼérepa jasegi vaʼerã ñamombarete ñande jerovia?

7 Ikatu hag̃uáicha ñamombareteve ñande jerovia, tekotevẽ avei ñakumpli Jehová ojeruréva ñandéve. La Biblia heʼi voi: “Ñande jerovia omano hína ndajajapóiramo tembiapo iporãva” (Sant. 2:26). ¡Ñapensamíntena mbaʼeichaitépa ovyʼa vaʼerãmoʼã Ñandejára siervokuéra yma guare ikatúrire ojapo pe tembiapo ñande jajapóva koʼág̃a!

8 Por ehémplo, ñapensamína Abrahán rehe. Haʼe ningo omombaʼeguasu vaʼekue Jehovápe peteĩ altár renondépe, ojejapóva itágui ha isensillomíva. ¿Mbaʼéichapa oñeñandúta ojeʼéramo chupe koʼág̃a oñembyaty vaʼerãha ermanokuérandi peteĩ Salón del Réinope térã asambleahápe? ¡Mbaʼeichaite piko ovyʼáne avei ohendúvo oñemyesakã umi promésa haʼe ohecha vaʼekue ‘mombyry guivénte’! (Elee Hebreos 11:13.) Térã ñapensami Elías rehe. Haʼe oservi vaʼekue Ñandejárape ogovernárõ guare peteĩ rréi apóstata iñañaitereíva ha Jehová heʼi chupe okondena ha ojuka hag̃ua Baal profetakuérape. ¡Mbaʼeichaitépa ovyʼáta ojeʼérõ chupe koʼág̃a oho vaʼerãha umi hénte rendápe hogaitépe omombeʼu hag̃ua peteĩ notísia ombopyʼaguapýva chupekuéra ha omeʼẽva esperánsa! Katuete ningo haʼekuéra vyʼápe ha pyaʼe voi ojapóta Jehová omandáva chupekuéra.

 9 Upéicharõ, jasegíkena ñamombarete ñande jerovia jajapóvo Jehová ojeruréva. Upéicha jahechaukáta jasegiha hína umi kuimbaʼe ha kuña iñeʼẽrenduetéva ehémplo oĩva la Bíbliape. Jajapóramo upéicha, jarekóta chupekuéra ñane amígoramo, jahecha haguéicha ko lívro oñepyrũvo. Ha iporãveha katu, koʼẽrõitéma oĩta hikuái ñanendive.

10. ¿Mbaʼérepa javyʼaitéta ág̃a múndo pyahúpe?

10 Jajesareko memékena umi mbaʼe porã oñeprometévare ñandéve. Ñandejára siervokuéra yma guare siémpre ojesareko vaʼekue Jehová oprometévare chupekuéra. ¿Ndépa rejapo avei upéicha? Epensamína mbaʼeichaitépa javyʼáta oñemoingove jey vove múndo pyahúpe koʼã kuimbaʼe ha kuña hekojojaitévape (elee Hechos 24:15). ¿Repensámavapa mbaʼépa reporandúta chupekuéra?

11, 12. ¿Mbaʼépa nde reporanduse a) Abélpe b) Noépe c) Abrahánpe d) Rútpe e) Abigaílpe f) Estérpe, oñemoingove jey vove?

11 Rejotopa vove Abel ndive ikatu reporandu chupe mbaʼéichapa raʼe ituvakuéra ha oñemongetápa rakaʼe umi keruvín oĩva ndive hardín de Edén entrádape. Noépe katu reporandukuaa okyhyjépa raʼe umi nefilímgui ha mbaʼéichapa oñangareko raʼe umi animál rehe pe árkape hetaite tiémpore. Ha ¿mbaʼépa ikatu reporandu Abrahánpe? Ikatu reporandu ijetuʼúpa raʼe chupe oheja hag̃ua Ur ha oimépa rakaʼe Sem upe oipytyvõva chupe oikuaa hag̃ua Jehovápe.

12 Oime vaʼerã rembaʼeporanduséta avei umi kuña yma guare oñemoingove jeýtavape. Por ehémplo, Rútpe ikatu reporandu mbaʼérepa odesidi raʼe oservi Jehovápe. Abigaílpe katu reporandukuaa okyhyjépa raʼe omombeʼu hag̃ua Nabálpe umi mbaʼe omeʼẽ vaʼekue Davídpe. Ikatu avei reporandu Ester ha Mardoquéope mbaʼe mbaʼépa oiko raʼe Ñandejára osalva rire ipuévlope.

13. a) ¿Mbaʼépa ikatu oikuaase umi oñemoingove jeýva? b) ¿Mbaʼéichapa nde reñeñandu ikatúta haguére reikuaa umi kuimbaʼe ha kuña yma guarépe?

13 Katuete Jehová siervokuéra yma guare oporanduséta avei ñandéve heta mbaʼe. ¡Ajépa javyʼaitéta ñamombeʼúvo chupekuéra mbaʼéichapa raʼe koʼã ára paha ha mbaʼéichapa Jehová ñanepytyvõ umi situasión ijetuʼuvévape! Ovyʼaitereíta ningo hikuái oikuaávo Jehová okumplipaite hague opa mbaʼe opromete vaʼekue. Haʼekuéra oikove jey vove, natekotevẽmoʼãvéima ñañeimahina mbaʼéichapa rakaʼe hikuái, síno jahechátama voi chupekuéra. Péro ñahaʼarõ aja upéva, ikatu jalee hembiasakue ha ñaaprendeve chuguikuéra. Jasegíkena koʼã kuimbaʼe ha kuña ehémplo ha ñañehaʼã jajerovia mbarete haʼekuéraicha, upéicha ñamombaʼeguasúta hendivekuéra Jehovápe opa árare.