EMAÑAMI pe mitãkuimbaʼe oñeʼẽvahína umi karaikuéra ndive. Haʼekuéra mboʼehára Ñandejára témplope Jerusalénpe. Ha pe mitãkuimbaʼe katu Jesús. Tuicháma koʼág̃a. Oguerekóma 12 áño.

Umi mboʼeharakuéra noimoʼãi Jesús oikuaaha heta mbaʼe Ñandejáragui ha la Bíbliape oĩvagui. Péro, mbaʼére piko ndaipóri avei koʼápe José ha María? Moõ piko oime hikuái? Jahechami.

Káda áño José ogueraha ifamília Jerusalénpe ohasa hag̃ua pe arete guasu hérava Pascua. Pe viáhe ojejapóva Nazaret guive Jerusalén peve ipuku. Upérõ avave ndoguerekói kamiõ, ha ndaipóri avei trén. Heta oĩ oikóva yvýrupinte, ha tres díape og̃uahẽ hikuái Jerusalénpe.

Koʼág̃a g̃uarã José hetáma ifamília. Upévare haʼe oñangarekovaʼerã Jesús ermáno ha ermanakuéra imitãvéva rehe. Ko áñope José ha María oho jey hína ifamiliakuéra reheve Nazarétpe. Haʼekuéra oimoʼã Jesús ohoha umi ótro hentekuéra ndive. Péro opytávo hikuái opytuʼu hag̃ua upe kaʼaruetépe, ndotopái Jesús rehe. Oheka chupe ipariénte ha iñamigokuéra apytépe, péro ndaipóri hendivekuéra! Upévare ojevy hikuái Jerusalénpe oheka hag̃ua Jesúspe.

Hasy peve otopa hikuái Jesúspe koʼã mboʼehára ndive. Haʼe ojapysaka hesekuéra ha ombaʼeporandu chupekuéra. Ha enterove umi hénte noimoʼãi peichaite iñaranduha Jesús. Péro María heʼi chupe: ‘Che memby, mbaʼére piko rejapo péicha orerehe? Nde ru ha che rojepyʼapyetereíma nderehe ha roheka roikóvo’.

‘Mbaʼére piko pecherekavaʼerã peikóvo?’, okontesta Jesús. ‘Ndapeikuaái piko che aimevaʼerãha che Ru rógape?’.

Jesús oĩse pe lugár ikatuhápe oaprendeve Ñandejáragui. Ñande upéicha vaʼerã avei, ajépa? Nazarétpe, Jesús ohovaʼekue káda semána umi rreunión oñemeʼẽhápe adorasión. Haʼe oñatende porãgui umi rreunionhápe, oaprende heta mbaʼe la Bíbliagui. Ñande jajapovaʼerã avei Jesús ojapohaguéicha.