MBAʼÉPA oikohína koʼápe? Koʼã hénte oguereko peteĩ karu guasu. Babiloniaygua rréi oinvita hetaiterei persóna iñimportántevape. Oiporuhína hikuái umi kópa de óro ha de pláta ha umi tasón oñeguenohẽvaʼekue Jehová témplogui, oĩvaʼekue Jerusalénpe. Upeichahágui, osẽ sapyʼa peteĩ kuimbaʼe po ha oñepyrũ oskrivi pe pare rehe. Enterove oñemondyipa.

Belsasar, Nabucodonosor niéto, haʼe koʼág̃a rréi. Haʼe osapukái ojegueru hag̃ua umi kuimbaʼe iñarandúvape. Pe rréi heʼi: ‘Oĩrõ peteĩ oleekuaáva ko ojeskrivíva ha heʼi chéve mbaʼépa heʼise, oñemeʼẽta chupe heta rregálo ha oguerekóta pe tercer lugár iñimportantevéva ogoverna hag̃ua ko rréino’. Péro ni peteĩ umi iñarandúva ndaikatúi olee pe pare rehe ojeskrivíva, ni ndoikuaái mbaʼépa heʼise upéva.

Pe rréi sy ohendu pe tyapu ha oike pe ojekaruhápe. ‘Anína reñemondyieterei’, heʼi pe rréipe. ‘Ne rréinope oĩ peteĩ kuimbaʼe oikuaáva umi diós sántope. Nde avuélo Nabucodonosor haʼérõ guare rréi, omoĩvaʼekue chupe omoakã hag̃ua umi kuimbaʼe arandu haʼe oguerekóvape. Héra Daniel. Ehenoiuka chupe, ha Daniel omombeʼúta ndéve mbaʼépa heʼise koʼã mbaʼe.’

Upévare pyaʼe porã ojegueru Daniélpe. Heʼi rire ndoipotaiha umi rregálo, Daniel oñepyrũ omombeʼu mbaʼérepa Jehová oipeʼavaʼekue Nabucodonosórgui, Belsasar avuélo, irréino. ‘Haʼe oñemombaʼeguasuetereivaʼekue’, heʼi Daniel. ‘Ha Jehová okastiga chupe.’

‘Péro nde reikuaa pe oikovaʼekue hese’, heʼi Daniel Belsasárpe, ‘ha reñemombaʼeguasu gueteri Nabucodonosor ojapohaguéicha. Regueru umi kópa ha tasón Jehová témplope guare ha reyʼureína pype. Remombaʼeguasu umi diós ojejapovaʼekue yvyra ha itágui, ha neremombaʼéi ñande Apohare Guasuetépe. Upévare Ñandejára ombou peteĩ po oskrivi hag̃ua koʼã ñeʼẽ.

‘Kóva haʼe pe ojeskrivíva’, heʼi Daniel: ‘MENÉ, MENÉ, TEKEL ha PARSÍN’.

‘MENÉ heʼise Ñandejára oipapahague pe tiémpo oguerekóva ne rréino ha omog̃uahẽmaha huʼãme. TEKEL heʼise rejepesahague valánsape ha rejetopa nanevuenoiha. PARSÍN heʼise ne rréino oñemeʼẽha médo ha persakuérape.’

Oñeʼẽmba mboyve Daniel, umi médo ha pérsa oñepyrũ oataka Babilóniape. Ojagarra hikuái pe siuda ha ojuka Belsasárpe. Pe pare rehe ojeskrivivaʼekue oñekumpli upe pyharépe voi! Péro mbaʼépa ojehúta umi isrraelitakuérape koʼág̃a? Jahecháta upe rire, péro koʼág̃a jahechami mbaʼépa oikóraʼe Daniel rehe.

Daniel 5:1-31.