Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 68

Mokõi mitã oikove jey

Mokõi mitã oikove jey

REMANOMBAʼÉRAMO, mbaʼéichapa oñeñandúne nde sy reikove jeýramo? Haʼe ovyʼaitereíne! Péro ikatúpa oikove jey peteĩ omanovaʼekue? Oikomaparakaʼe upéva?

Emañami pe kuimbaʼe, pe kuñakarai ha pe mitã ko taʼangápe oĩvare. Pe kuimbaʼe haʼe proféta Elías. Pe kuñakarai haʼe peteĩ viúda oikóva pe siuda hérava Saréptape, ha pe mitãkuimbaʼe katu imemby. Upe rire, peteĩ árape pe mitã hasy katu. Ipahápe hasyeteve, ha omano. Upémaramo Elías heʼi pe kuñakaraípe: ‘Egueru chéve pe mitã’.

Elías ogueraha yvate pe mitã omanovaʼekue ha omoĩ tupápe. Upéi oñemboʼe: ‘Jehová, emoingovemi jeýna ko mitã’. Ha pe mitã oñepyrũ ipytuhẽ! Upémaramo Elías omboguejy pe mitã ha heʼi pe kuñakaraípe: ‘Emañamína, ne memby oikove!’. Upéva ombovyʼaiterei chupe.

Peteĩ Jehová proféta iñimportánteva avei héra Eliseo. Haʼe oipytyvõ Elíaspe. Péro, upe rire Jehová oiporu avei Eliséope ojapo hag̃ua heta milágro. Peteĩ árape haʼe oho pe siuda hérava Sunémpe, ha peteĩ kuñakarai ipyʼaporãiterei hendive. Ko kuñakarai upe rire oguereko peteĩ mitãkuimbaʼe.

Peteĩ pyhareve, tuichave rire pe mitã, oho kokuépe itúva ombaʼapohápe. Upeichahágui osapukái sapyʼa: ‘Áina, che akãrasyetéiko!’. Ojegueraha rire pe mitã hógape, omano. Mbaʼeichaitépa pe isy ombyasy! Ha pyaʼe porã oho Eliseo rekávo.

Og̃uahẽvo Eliseo, oike kotýpe oĩhápe pe mitã omanovaʼekue. Oñemboʼe Jehovápe, ha oñeno pe teʼõngue ári. Ha pe mitã rete mbeguekatúpe haku jey, ha iñatĩa siete vése. Mbaʼeichaitépa ovyʼa isy oikévo pe kotýpe ha ohecha imemby oikoveha!

Hetaiterei ñande rapicháma omano. Ha upéva ombyasyeterei umi hogaygua ha iñamigokuéra. Ñande ndaikatúi ñamoingove jey umi omanovaʼekuépe. Péro Jehová ikatu. Upe rire jahecháta haʼe omoingove jeytaha hetaiterei millón ñande rapichápe.

1 Reyes 17:8-24; 2 Reyes 4:8-37.