Ehecha oĩva pype

Ehecha oĩva pype

 ISTÓRIA 69

Peteĩ mitãkuña oipytyvõ peteĩ mburuvichápe

Peteĩ mitãkuña oipytyvõ peteĩ mburuvichápe

REIKUAÁPA nde mbaʼépa heʼihína ko mitãkuña? Oñeʼẽ pe kuñakaraípe Jehová proféta Eliseo rehe, ha omombeʼu umi mbaʼe guasuete Jehová ojapoukáva chupe. Pe kuñakarai ndoikuaái mbaʼeve Jehovágui pórke ndahaʼéi isrraelíta. Upévare, jahechami mbaʼéicha rupípa ko mitãkuña oĩ pe kuñakarai rógape.

Pe kuñakarai Siriaygua. Iména héra Naamán omoakãva pe ehérsito Siriapegua. Umi sírio oguerahavaʼekue ko mitakuña isrraelítape, ha koʼág̃a oservi Naamán rembirekópe.

Naamán oguereko peteĩ mbaʼasy vai hérava lépra. Ko mbaʼasy oipeʼakuaa ñande roʼo jepe. Upévare ko mitãkuña heʼi Naamán rembirekópe: ‘Hiʼãitépa chéve pe karai oho Israélpe Jehová proféta rendápe, haʼe omongueráne chupe ilépragui’. Upe rire, oñemombeʼu upéva pe kuñakarai ménape.

Naamán okuerase; upévare oho Israélpe. Og̃uahẽvo upépe, oho Eliseo rógape. Eliseo omondo isiérvope heʼi hag̃ua Naamánpe ojahuvaʼerãha siete vése rrío Jordánpe. Naamán ipochyeterei, ha heʼi: ‘Umi rrío oĩva che retãme iporãiteve oimeraẽ rrío Israélpe oĩvagui!’. Péicha heʼi rire, Naamán osẽ oho.

Péro peteĩ isiérvo heʼi chupe: ‘Che mburuvicha, Eliseo heʼíramo ndéve rejapo hag̃ua peteĩ mbaʼe hasývaningo rejapóta. Ha, mbaʼére piko ndaikatumoʼãi rejahu heʼihaguéicha ndéve?’. Naamán ohendu isiérvope ha oho ojahu rrío Jordánpe siete vése. Ojapóvo upéicha, pe hoʼo oñembopyahu ha okuera!

Naamán ovyʼaiterei. Oho jey Eliseo rendápe ha heʼi chupe: ‘Koʼág̃a aikuaa porã Ñandejára oĩva Israélpe añoite haʼeha Ñandejára añetegua ko Yvy ape ári. Upévare, ejagarramína chehegui ko rregálo’. Péro Eliseo heʼi: ‘Nahániri, ndajagarramoʼãi’. Eliseo oikuaa noĩporãiha ojagarra pe rregálo, pórke Jehová omongueravaʼekue Naamánpe. Péro Eliseo siérvo Guehazí oipota pe rregálo.

Upévare ojapo kóicha. Oho rire Naamán, Guehazí odispara hapykuéri ha ohupytývo chupe heʼi: ‘Eliseo chembou haʼe hag̃ua ndéve oipotaha michĩmi pe rregálo iñamigokuéra og̃uahẽramóvape g̃uarã’. Guehazí ijapu chupe. Péro Naamán ndoikuaái, ha upévare omeʼẽ Guehazípe michĩmi umi rregálogui.

Ou jeývo Guehazí, Eliseo oikuaáma mbaʼépa ojapókuri. Jehová oikuaaukáma chupe. Upévare heʼi: ‘Rejapohaguére ko mbaʼe vai, pe lépra oguerekovaʼekue Naamán ováta nderehe’. Ha upeichaite oiko!

Mbaʼépa ikatu ñaaprende koʼã mbaʼégui? Primero, ñañeʼẽvaʼerãha Jehovágui, ojapohaguéicha pe mitãkuña. Upéva ikatu ogueru heta mbaʼe porã. Segundo, ñaaprende naiporãiha ñañemombaʼeguasu Naamán ojapohaguéicha iñepyrũrã, upéva rangue ñaneñeʼẽrenduvaʼerã Jehová siervokuérape. Ha tercero, nañandejapuivaʼerã Guehazí ijapuhaguéicha. Ajépa heta mbaʼe ikatu ñaaprende la Bíbliagui?

2 Reyes 5:1-27.