Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 70

Jonás ha pe pira guasu

Jonás ha pe pira guasu

EMAÑAMI pe kuimbaʼe pe ýpe oĩvare. Ojejopy vai hína, ajépa? Pe pira omokõta chupe! Ndépa reikuaa mávapa pe kuimbaʼe? Héra Jonás. Jahechami mbaʼéicha rupípa iprovléma vaiete.

Jonás haʼe Jehová proféta. Omano riremi pe proféta Eliseo, Jehová heʼi Jonáspe: ‘Tereho Nínivepe, pe siuda tuichaitéva. Umi hénte hembiapo vaietereíma upépe, ha aipota reñeʼẽ chupekuéra upévare’.

Péro Jonás ndohoséi. Upévare ojupi peteĩ várkope ohóva mombyry Nínivegui. Jehovápe ndogustái pe Jonás ojapóva. Upévare ombou peteĩ torménta guasu. Ha ipochyetereígui pe torménta omoñapymíta katuete pe várko. Umi marinéro oñemondýi tuichaiterei, ha osapukái umi diós oguerekóvape oipytyvõ hag̃ua chupekuéra.

Ipahápe, Jonás heʼi: ‘Che aadora Ñandejára Jehovápe, upe ojapovaʼekue yvága ha Yvy. Che akañyʼaína ndajaposéigui peteĩ mbaʼe Jehová heʼivaʼekue chéve’. Upémaramo umi marinéro oporandu: ‘Mbaʼe piko rojapóta ndehegui opa hag̃ua ko torménta?’.

‘Pechemombo ýpe, ha pe már ndaipochymoʼãvéi’, heʼi Jonás. Umi marinéro ndojaposéi upéva, péro ipochyvévo pe torménta, oity hikuái Jonáspe pe márpe. Upe riremínte ohasa pe torménta, ha pe már ndaipochyvéima.

Oñapymívo Jonás, peteĩ pira guasu omokõ chupe. Péro haʼe nomanói. Tres día aja, ára ha pyhare, oĩ pe pira ryepýpe. Jonás ombyasyeterei ndojapoihaguére Jehová heʼíva ha ndohoihaguére Nínivepe. Upévare, ndépa reikuaa mbaʼépa ojapo?

Jonás oñemboʼe Jehovápe ha ojerure oipytyvõ hag̃ua chupe. Upémaramo Jehová oityuka pe pirágui Jonáspe y rembeʼýpe. Upe rire, Jonás oho Nínivepe. Ajépa upéva ohechauka ñandéve iñimportanteha jajapo opa mbaʼe Jehová heʼíva ñandéve?

Jonás, kapítulo 1 guive 4 peve.