Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 61

Davídgui oiko rréi

Davídgui oiko rréi

SAÚL oñehaʼã jey ojagarra Davídpe. Ogueraha 3.000 soldádo ivalevéva oheka hag̃ua chupe. David oikuaávo upéva, omondo espía oikuaa hag̃ua moõpa opytáraʼe Saúl upe pyharépe. Upe rire, David oporandu mokõi kuimbaʼe hendive oĩvape: ‘Mávapa ohóta chendive Saúl oĩhápe?’.

‘Che aháta’, heʼi Abisai. Abisai haʼe Zeruyá memby, David ermána. Oke aja Saúl ha umi kuimbaʼe oĩva hendive, David ha Abisai oike ñemihápe pe kampaméntope. Ogueraha hikuái Saúlgui ilánsa ha ihárro hoyʼuha oĩva ijypýpe. Okejoa hikuái ha avave ndohechái ni nohendúi chupekuéra.

Emañami koʼápe David ha Abisai rehe. Okañy ha ojupi hikuái peteĩ sérro ári. David osapukái pe Israel ehérsito omoakãvape: ‘Abner, mbaʼére piko nereñangarekói nde ruvicháre? Emañami! Moõpa oime ilánsa ha ihárro hoyʼuha?’.

Saúl opáy. Oikuaa Davídpe iñeʼẽre, ha oporandu: ‘Nde piko David?’. Rehechápa Saúl ha Abner ko taʼanga iguypeguápe?

‘Che haʼehína, che ruvicha guasu’, ombohovái David. Ha oporandu: ‘Mbaʼére piko chejagarrase reikóvo? Mbaʼe piko ajapo vai raʼe? Naʼápe ne lánsa che ruvicha. Tou ipiári peteĩ kuimbaʼe’.

‘Ajapo vai’, heʼi Saúl. ‘Ajapo peteĩ vyrorei.’ Upémaramo David oho, ha Saúl ojevy hógape. Péro David heʼi ipyʼapýpe: ‘Peteĩ árapente Saúl chejukáta. Akañyvaʼerã umi filistéo retãme’. Ha ojapo upéva. David ombotavy ha ogueroviauka umi filistéope oĩha hendivekuéra.

Upe rire, umi filistéo oho oñorairõ Israel ndive. Pe ñorairõhápe, Saúl ha Jonatán omano. Upéva David ombyasyeterei, ha oskrivi peteĩ purahéi neporãva, heʼíva: ‘Añembyasy nderehe, che ermáno, Jonatán. Mbaʼeichaitépa rohayhuvaʼekue!’.

Upéva oiko rire David oho jey Israélpe, táva Hebrónpe. Upépe oiko peteĩ ñorairõ umi oipotáva ndive Is-bóset, Saúl raʼy, ojupi rréiramo, ha umi oipotáva ojupi David. Péro ipahápe umi oĩva David ndive ogana. Davídgui oiko rréi oguerekórõ guare 30 áño. Ogoverna siete áño ha seis mése Hebrónpe. Upépe onase Amnón, Absalón ha Adonías, David raʼykuéra.

Upe rire David ha umi kuimbaʼe oĩva hendive oho ojagarra peteĩ siuda neporãva, hérava Jerusalén. Joab, haʼéva avei David ermána Zeruyá memby, odirihi pe ñorairõ. Upéva omombaʼégui David omoĩ Joábpe omoakã hag̃ua pe ehérsito. Koʼág̃a David oñepyrũ ogoverna Jerusalénpe.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Crónicas 11:1-9.