Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 62

Heta provléma David rógape

Heta provléma David rógape

OÑEPYRŨ rire David ogoverna Jerusalénpe, Jehová omeʼẽ ijehérsitope heta viktória. Ñandejára Jehová oprometevaʼekue omeʼẽtaha Canaán umi isrraelítape. Ha koʼág̃a, Jehová oipytyvõgui chupekuéra, haʼekuéra oguerekóma pe yvy oñeprometevaʼekue.

David haʼe peteĩ governánte ipyʼaporãva. Haʼe ohayhu Jehovápe. Upévare, ojagarra riremi Jerusalén, pe Jehová árka pákto rehegua raẽvete oguerova upépe. Haʼe ojapose peteĩ témplo omoĩ hag̃ua pe árka.

Heta áño ohasa rire, David ojapo peteĩ mbaʼe ivaietereíva. Haʼe oikuaa ivaiha jajagarra pe ndahaʼéiva ñanembaʼe. Péro peteĩ pyhare, oĩ jave yvate ipalásiope, omaʼẽ yvy gotyo ha ohecha peteĩ kuña iporãitereíva. Héra Bat-seba, ha iména haʼe peteĩ soldádo hérava Urías.

David oipotaiterei Bat-sébape ha ogueruka ipalásiope. Iména oĩ mombyry ñorairõhápe. David oñeno Bat-seba ndive, ha upe rire oikuaa Bat-seba oguerekotaha peteĩ mitã. David ojepyʼapyeterei ha heʼi Joábpe, pe ehérsito omoakãva, omoĩ hag̃ua Uríaspe pe ñorairõ ijetuʼuvehápe omano hag̃ua. Omano rire Urías, David omenda Bat-seba rehe.

Jehová ipochyeterei David ndive. Omondo isiérvo Natánpe oñeʼẽ hag̃ua chupe umi mbaʼe vai ojapovaʼekuére. Koʼápe ikatu rehecha Natánpe oñeʼẽ jave David ndive. David ombyasyeterei pe ojapovaʼekue, ha upévare Jehová ndojukái chupe. Péro Jehová heʼi: ‘Rejapohaguére koʼã mbaʼe vai, hetaiterei neprovlémata nde rogapýpe’. Ha hetaite iprovléma David!

Ñepyrũrã, Bat-seba memby omano. Upe rire Amnón, David raʼy ypykue, omoñeno hendive mbaretépe iñermána Tamárpe. Absalón, David raʼy, ipochyeterei upévare ha ojuka Amnónpe. Upe rire, Absalón ombyaty heta hénte ijehe ha koʼãva ojapo chugui rréi. Ipahápe David ogana pe ñorairõ Absalón kóntrape, ha Absalón omano. Añetehápe, David heta iprovléma.

Koʼã mbaʼe oiko aja, Bat-seba oguereko peteĩ mitã ombohérava Salomón. Ituja ha hasýma David, upévare itaʼýra Adonías oñehaʼã ojupi rréiramo. Upémaramo David heʼi peteĩ saserdótepe, hérava Sadoc, oñohẽ hag̃ua aséite Salomón akã ári, ohechauka hag̃ua Salomón haʼetaha pe rréi pyahu. Upe riremínte David omano oguerekópe 70 áño. Ogoverna 40 áño, ha koʼág̃a Salomóngui oiko rréi.

2 Samuel 11:1-27; 12:1-18; 1 Reyes 1:1-48.