Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 39

Pe yvyra oguerekóva Aarón ipoty

Pe yvyra oguerekóva Aarón ipoty

EMAÑAMÍNA umi yvoty ha umi alméndra aju okakuaáva pe yvyrágui. Pe yvyra Aarón mbaʼe. Koʼã yvoty ha alméndra aju okakuaa peteĩ pyharépente! Jahechami mbaʼérepa.

Umi isrraelíta aréma oguata rei pe desiértore. Oĩ oimoʼãva Moisés ndahaʼeivaʼerãha pe omoakãva chupekuéra, ha Aarón ndahaʼeivaʼerãha pe saserdóte guasu. Coré opensavaʼekue upéicha, ha avei Datán, Abiram ha 250 omoakãva pe puévlo. Enterove koʼãva ou ha heʼi Moiséspe: ‘Mbaʼére piko nde rejúta reñemombaʼeguasu oréve?’.

Moisés heʼi Coré ha umi hendive oĩvape: ‘Koʼẽrõ pyhareve pejagarra pe insiénso ojehapyha, ha pemoĩ pype insiénso. Ha upéi peju Jehová tavernákulope. Jahecháta mávapepa Jehová oiporavo’.

Koʼẽ rire, Coré ha umi 250 oĩva hendive ou pe tavernákulope. Heta hapichakuéra avei ou oĩ hag̃ua hendivekuéra. Jehová ipochyeterei. ‘Peñemomombyrýke koʼã kuimbaʼe aña rogakuéragui’, heʼi Moisés. ‘Aníke pepoko mbaʼeve haʼekuéra oguerekóvare’. Umi hénte iñeʼẽrendu, ha oñemomombyry Coré, Datán ha Abiram rogakuéragui.

Upémaramo Moisés heʼi: ‘Ko mbaʼére peikuaáta mávapepa Jehová oiporavo. Yvy ojeavríta ha omokõta koʼã kuimbaʼe añáme’.

Oñeʼẽmbamívo Moisés, pe yvy ojeavri. Pe óga ha umi mbaʼe oguerekóva Coré, Datán ha Abiram, ha umi oĩva hendivekuéra, hoʼa ipype, ha oñemboty hiʼarikuéra pe yvy. Ohendúvo umi hénte pe ayvu ojapóva umi hoʼáva, osapukaipa hikuái: ‘Jaháke koʼágui! Pe yvy ikatu ñanemokõ ñandéve avei!’.

Coré ha umi 250 oĩva hendive oĩ gueteri pe tavernákulo ypýpe. Upévare Jehová ombou tata, ha okaipaite hikuái. Upéi Jehová heʼi Aarón raʼy Eleazárpe ojagarra hag̃ua umi omanovaʼekue insiénso ojehapyha ha omopererĩ oñemoĩ hag̃ua pe altár rehe. Upéva omomanduʼáta umi isrraelítape, Aarón ha itaʼyrakuéra añoite ikatuha oservi Jehovápe saserdóteramo.

Péro Jehová oipota hesakã porã chupekuéra haʼe oiporavohague Aarón ha itaʼyrakuérape saserdóteramo. Upévare heʼi Moiséspe: ‘Peteĩ omoakãva káda trívu, togueru pe yvyra oguerekóva. Leví trívugui, Aarón togueru pe yvyra oguerekóva. Ha upéi pe tavernákulope emoĩ káda yvyra pe árka pákto rehegua renondépe. Pe yvyra oguerekóva pe kuimbaʼe che aiporavovaʼekue saserdoterã ipotýta’.

Koʼẽ rire, Moisés ohecha koʼã yvoty ha alméndra aju osẽva pe yvyra Aarón oguerekóvagui! Rehechápa koʼág̃a mbaʼérepa Jehová ombopoty pe yvyra Aarón mbaʼéva?

Números 16:1-49; 17:1-11; 26:10.