Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 45

Ohasa hikuái rrío Jordán

Ohasa hikuái rrío Jordán

EMAÑAMI! Isrraelitakuéra ohasahína pe rrío Jordán! Péro mbaʼe piko oikopa pe ýgui? Upe tiémpope okymante, ha ramoiténte pe rrío Jordán henyhẽtékuri. Péro koʼág̃a ndaipóri pe y! Ha umi isrraelíta ohasa yvy isékovare ojapohaguéicha pe már Rojo ohasárõ guare! Mbaʼe piko oikopa pe ýgui? Jahechami.

Og̃uahẽrõ guare pe tiémpo isrraelitakuéra ohasa hag̃ua pe rrío Jordán, Jehová omondo Josuépe heʼi hag̃ua pe puévlope: ‘Umi saserdóte ohupivaʼerã pe árka pákto rehegua ha oguatavaʼerã ñane renonderã. Opyrũvo hikuái rrío Jordánpe, pe y osyryvahína opytáta’.

Upévare umi saserdóte ohupi pe árka pákto rehegua ha ogueraha umi hénte renonderã. Og̃uahẽvo rrío Jordánpe, umi saserdóte oike pe ýpe. Pe rrío osyry hatã ha ipypuku. Péro opyrũvo hikuái pe ýpe, pe y oñepyrũ opyta! Kóva peteĩ milágro! Yvate gotyo, Jehová ojoko pe y. Upe riremínte, pe rrío hypa!

Umi saserdóte ogueraháva pe árka pákto rehegua oho oñemoĩ pe rrío hypáva mbytépe. Rehechápa chupekuéra ko taʼangápe? Oĩ aja haʼekuéra upépe, enterove umi isrraelíta oñepyrũ ohasa rrío Jordán pe yvy isekohárupi!

Enterove ohasapa rire, Jehová omondo Josuépe heʼi hag̃ua 12 kuimbaʼe imbaretévape: ‘Tapeho pe rríope, oĩhápe umi saserdóte oguerekóva pe árka pákto rehegua. Pembyaty upégui 12 ita ha pemoĩ pe lugár ojepytatahápe ko pyharépe. Upéicha, tiémpo ohasa rire, pende raʼykuéra oporandu vove mbaʼépa heʼise koʼã ita, pejevaʼerã chupekuéra pe y opytahague pe árka Ñandejára pákto rehegua ohasárõ guare rrío Jordán. Umi ita omomanduʼáta chupekuéra ko milágrore!’. Josué avei omoĩ 12 ita pe rríope, umi saserdóte oĩhaguépe.

Upe rire Josué heʼi umi saserdóte pe árka pákto rehegua oguerahávape: ‘Pesẽ pe rrío Jordángui’. Ojapóvo hikuái upéva, pe rrío oñepyrũ osyry jey.

Josué 3:1-17; 4:1-18.