Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 50

Mokõi kuña ipyʼaguasúva

Mokõi kuña ipyʼaguasúva

UMI isrraelíta iprovléma jave, ojerure asy Jehovápe oipytyvõ hag̃ua chupekuéra. Haʼe okontesta omeʼẽvo umi líder ipyʼaguasúva oipytyvõtava chupekuéra. La Biblia ohenói koʼãvape hués. Josué haʼe pe primer hués, ha upe rire oĩ Otniel, Ehúd ha Samgar. Péro mokõi oipytyvõvaʼekue Israélpe kuña vaʼekue, héra Débora ha Jael.

Débora haʼe peteĩ profetísa. Jehová heʼi chupe mbaʼépa oikóta, ha haʼe omombeʼu umi héntepe Jehová heʼíva. Débora haʼe avei hués. Oguapy peteĩ palméra guýpe umi montáña oĩhápe, ha umi hénte ou hendápe ikatu hag̃ua haʼe oipytyvõ chupekuéra osolusiona hag̃ua iprovlemakuéra.

Kóva ko tiémpope Jabín haʼe rréi Canaánpe. Oguereko 900 kárro oñorairõ hag̃ua. Imbareteterei rupi ijehérsito heta isrraelíta oñemoĩ oservi Jabínpe. Jabín ehérsito omoakãva héra Sísara.

Peteĩ árape, Débora ohenói hués Barácpe ha heʼi chupe: ‘Jehová heʼi: “Ejagarra 10.000 kuimbaʼe ha egueraha mónte Tabórpe. Upépe aguerúta ndéve Sísarape. Ha che roipytyvõta regana hag̃ua chupe ha ijehérsitope”’.

Barac heʼi Déborape: ‘Aháta rehóramo chendive’. Débora oho hendive, péro heʼi Barácpe: ‘Ndereguerekomoʼãi ónrra reganahaguére, pórke Jehová omeʼẽta Sísarape peteĩ kuña pópe’. Ha upéicha oiko.

Barac oguejy mónte Tabórgui ojotopa hag̃ua Sísara soldadokuéra ndive. Upeichaháguinte, Jehová ogueru peteĩ inundasión, ha heta umi isrraelíta enemígo ojahoga. Péro Sísara oguejy ikárrogui ha okañy.

Upe riremínte Sísara og̃uahẽ Jael róga kárpape. Jael heʼi chupe oike hag̃ua, ha omeʼẽ chupe kamby hoʼu hag̃ua. Upéva ombohopehýi Sísarape, ha opyta oke. Upémaramo Jael oipeʼa peteĩ yvyra akua pe óga kárpagui ha omoingepaite iñakãre. Upéi, ou Barac ha ohechauka chupe Sísara reʼongue! Débora heʼihagueichaite oiko.

Ipahápe ojejuka avei rréi Jabínpe; ha aremi oiko pyʼaguapýpe umi isrraelíta.

Jueces 2:14-22; 4:1-24; 5:1-31.