Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 38

Umi 12 espía

Umi 12 espía

EMAÑAMÍNA umi yva oguerúva koʼã kuimbaʼe. Ehechami mbaʼeichaitépa tuicha ha iñapesãmba pe parrál. Mokõi kuimbaʼémante ipuʼaka hese ogueru hag̃ua peteĩ yvyráre. Ha emañami umi ígo ha umi granádare. Moõgui piko ojegueru koʼã yva porãite? Ojegueru Canaángui. Nemanduʼáne upépe oikohague Abrahán, Isaac ha Jacob. Péro pe ñembyahýi upépe ouvaʼekuégui, Jacob ova Egíptope ifamília ndive. Ha 216 áño ohasa rire, Moisés ogueraha jey Canaánpe umi isrraelítape. Koʼág̃a oĩ hikuái Qadéspe, pe desiértope.

Canaánpe oiko hénte iñañáva. Upévare Moisés omondo 12 espía ha heʼi chupekuéra: ‘Pehecha mboy héntepa oiko upépe, ha mbaʼeichaitépa imbarete hikuái. Pehecha iporãpa pe yvy ñañemitỹ hag̃ua. Ha pejukuévo pegueru upégui umi yva’.

Ou jeývo Qadéspe, umi espía heʼi Moiséspe: ‘Iporãko añetehápe pe tetã’. Ha ojehecha hag̃ua upeichaha, ohechauka hikuái umi yva ogueruvaʼekue. Péro 10 espía heʼi: ‘Umi hénte upépe oikóva tuicha ha imbarete. Jaipeʼasérõ chuguikuéra hetã, ñandejukáta’.

Umi isrraelíta oñemondýi ohendúvo upéva. ‘Iporãvevaʼerãmoʼã ñamanórire Egíptope térã ko desiértope’, heʼi hikuái. ‘Ñamanóta ñañorairõhápe, ha ñane rembireko ha ñande raʼykuéra ojejagarrapáta. Jaheka peteĩ líder pyahu Moisés rekovia, ha jaha jey Egíptope!’.

Péro mokõi espía ojerovia Jehováre, ha oñehaʼã otrankilisa pe puévlope. Umi espía héra Josué ha Caleb. Haʼekuéra heʼi: ‘Ani pekyhyjétei. Jehová oĩ ñanendive. Ndahasymoʼãi jajagarra upe yvy’. Péro umi hénte nohenduséi. Ojukase katu Josué ha Calébpe.

Upéva ombopochyeterei Jehovápe, ha heʼi Moiséspe: ‘Ni peteĩ koʼã hénte oguerekóva 20 áño térã itujavéva, ndoikemoʼãi Canaánpe. Ohecháma hikuái umi milágro ajapovaʼekue Egíptope, ha pe desiértope, péro ndojeroviái gueteri cherehe. Upévare, haʼekuéra oguata reíta pe desiértore 40 áño omanomba peve hikuái. Josué ha Caleb añoite oikéta Canaánpe’.

Números 13:1-33; 14:1-38.