REJAPÓMAPA peteĩ promésa hasýva upéi rekumpli hag̃ua? Upéva ojehu ko kuimbaʼépe ko taʼangápe oĩvape, ha ombyasyeterei. Héra Jefté, peteĩ hués ipyʼaguasúva oguerekóva Israel.

Jefté oikórõ guare umi isrraelíta ndoadoravéi jeýma Jehovápe. Ojapo jeýma hikuái ivaíva. Upévare Jehová oheja umi amoníta ojapo hesekuéra mbaʼe vai. Umi isrraelíta heʼi Jehovápe: ‘Ropeka. Oresalvamína!’.

Umi hénte ombyasy hembiapo vai hague. Upéva ohechauka hikuái oadora jeývo Jehovápe. Upévare, Jehová oipytyvõ jey chupekuéra.

Pe puévlo oiporavo Jeftépe oñorairõ hag̃ua umi amoníta aña ndive. Jefté oipotaiterei Jehová oipytyvõ chupe oñorairõ vove. Upévare opromete Jehovápe: ‘Chemoganáramo, ameʼẽta ndéve pe osẽ raẽvéva che rógagui cherug̃uaitĩ, aju jeývo aganahaguégui’.

Jehová ohendu pe promésa Jefté ojapóva, ha oipytyvõ chupe ogana hag̃ua. Ou jeývo Jefté, reikuaápa nde máva raẽpa osẽ ohug̃uaitĩ chupe? Itajýra peteĩmi. ‘Áina, che rajy!’, hasẽ Jefté. ‘Tuichaite piko pe vyʼaʼỹ remeʼẽva chéve! Péro chéningo ajapókuri peteĩ promésa Jehovápe, ha koʼág̃a ndaikatumoʼãi aheja rei pe promésa ajapovaʼekue.’

Oikuaávo Jefté rajy pe promésa itúva ojapovaʼekue, haʼe ombyasy avei iñepyrũrã, ohejátagui itúva ha iñamigokuérape. Péro oikove aja oservíta Jehovápe itavernákulope, oĩva Silópe. Upévare heʼi itúvape: ‘Oimérõ rejapo peteĩ promésa Jehovápe, rekumplivaʼerã’.

Upévare Jefté rajy oho Silópe, ha oikove aja oservi Jehovápe itavernákulope. Umi kuña oĩva Israélpe oho hendápe cuatro día káda áño ha ovyʼa hikuái oñondive. Umi hénte ohayhujoa Jefté rajýpe ohechágui oservi porãha Jehovápe.

Jueces 10:6-18; 11:1-40.