Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 52

Gedeón ha umi 300 kuimbaʼe

Gedeón ha umi 300 kuimbaʼe

NDÉPA rehecha mbaʼépa oikohína koʼápe? Koʼãva haʼe Israel soldadokuéra. Umi kuimbaʼe ojayvýva hoyʼuhína. Pe hués Gedeón oñemboʼy ijypypekuéra. Haʼe oñatendehína mbaʼéichapa hoyʼu hikuái.

Emaña porãmi mbaʼéichapa umi kuimbaʼe hoyʼuhína. Oĩ ombojáva hova pe ýre voi. Péro peteĩ ohupi pe y ipópe hoyʼu hag̃ua ikatu hag̃uáicha ohecha pe oikóva ijerére. Kóva iñimportánte, pórke Jehová heʼi Gedeónpe oiporavo hag̃ua umi hoyʼu aja oñatendévape añoite. Ñandejára heʼi umi ndojapóiva upéicha oho jey vaʼerãha hógape. Jahechami mbaʼérepa.

Umi isrraelíta iprovléma heta jeýma naiñeʼẽrendúigui Jehovápe. Umi madianíta imbaretevéma chuguikuéra ha ojapo hesekuéra heta mbaʼe vai. Upévare isrraelitakuéra ojerure Jehovápe oipytyvõ hag̃ua chupekuéra, ha Jehová ohendu pe ojerure asýva hikuái.

Jehová heʼi Gedeónpe ombyaty hag̃ua peteĩ ehérsito, ha upéicha oguereko 32.000 soldádo. Péro peteĩ ehérsito oguerekóva 135.000 soldádo oĩ Israel kóntrape. Upéicharamo jepe, Jehová heʼi Gedeónpe: ‘Hetaiterei soldádoma reguereko’. Mbaʼérepa heʼi upéva?

Pórke umi isrraelitakuéra oganárõ pe ñorairõ, ikatúta oimoʼã oganahague ijeheguínte, noikotevẽihague oipytyvõ chupekuéra Jehová ogana hag̃ua. Upévare Jehová heʼi Gedeónpe: ‘Ere entéro okyhyjévape toho jey hógape’. Ojapóvo Gedeón upéva, 22.000 soldádo osẽ oho. Ha upéicha opyta chupe 10.000 soldádonte oñorairõ hag̃ua umi 135.000 soldádo kóntrape.

Péro, ehendumi! Jehová heʼi: ‘Reguereko gueteri hetaiterei soldádo’. Upévare heʼi Gedeónpe ogueraha hag̃ua omboyʼu umi kuimbaʼe ko ysyrýpe, ha omondo hag̃ua hógape umi ombojavaʼekue hova pe ýre hoyʼu hag̃ua. Jehová heʼi: ‘Romoganáta umi 300 kuimbaʼe reheve, umi osegivaʼekue oñatende hoyʼukuévo’.

Og̃uahẽma pe tiémpo oñeñorairõ hag̃ua. Gedeón ojapo mbohapy aty umi 300 soldádogui. Enterovépe omeʼẽ peteĩ turu, ha peteĩ hárra oguerekóva ipype peteĩ antórcha. Pe pyhare pyte rupi, oñembyaty hikuái iñenemigokuéra kampaménto jerére. Upépe, ombopu hikuái ojojapaite umi turu ha ojoka iharrokuéra, ha osapukái: ‘Jehová ha Gedeón espáda!’. Opáyvo iñenemigokuéra, ojesarea ha oñemondyipa hikuái. Enterove osẽ odispara, ha umi isrraelíta ogana pe ñorairõ.

Jueces, kapítulo 6 guive 8 peve.