Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 35

Jehová omeʼẽ iléi

Jehová omeʼẽ iléi

DOS mése rupi osẽ rire Egíptogui, umi isrraelíta og̃uahẽ mónte Sinaípe, hérava avei Horeb. Koʼápe Ñandejára oñeʼẽvaʼekue Moiséspe peteĩ ñana máta hendývagui. Umi isrraelíta aremi opyta koʼápe.

Umi hénte ohaʼarõ aja, Moisés ojupi pe montáñape. Upépe Jehová heʼi Moiséspe oipotaha umi isrraelíta iñeʼẽrendu chupe, oiko hag̃ua chuguikuéra peteĩ puévlo espesiál chupe g̃uarã. Oguejy rire Moisés, omombeʼu isrraelitakuérape umi mbaʼe Jehová heʼivaʼekue. Ha umi hénte heʼi iñeʼẽrendutaha Jehovápe, pórke oikose hikuái Jehová puévloramo.

Jehová koʼág̃a ojapo peteĩ mbaʼe ojehechaʼỹva. Pe montáña ruʼãgui omopuʼã tatatĩ, ha pe ára omosunu hatãiterei. Oñeʼẽ avei chupekuéra ha heʼi: ‘Che haʼe Jehová, nde Jára, neguenohẽvaʼekue Egíptogui’. Upéi omanda chupekuéra: ‘Ani readora mbaʼeveichagua diós ndahaʼéiramo chéve’.

Ñandejára omeʼẽve umi isrraelítape nueve mandamiénto, térã léi. Pe puévlo okyhyjeterei. Heʼi hikuái Moiséspe: ‘Ndéna eñeʼẽ oréve, pórke rokyhyje romanórõ g̃uarã oñeʼẽrõ oréve Ñandejára’.

Upe rire, Jehová heʼi Moiséspe: ‘Ejupi koʼápe, ko montáñape. Ameʼẽta ndéve mokõi ita ipéva, amoĩhaguépe umi léi aipotáva ko puévlo okumpli’. Upévare, Moisés ojupi jey pe montáñape. Opyta upépe 40 día aja, ára ha pyhare.

Ñandejára oguereko heta léi ipuévlope g̃uarã. Moisés oskrivi koʼã léi. Ñandejára omeʼẽ avei Moiséspe umi mokõi ita ipéva. Koʼãvape, Ñandejaraite oskrivi umi 10 léi omeʼẽvaʼekue pe puévlope. Umívape oñehenói Diez Mandamientos.

Umi Diez Mandamientos iñimportanteterei. Péro iñimportánte avei umi ótra léi Ñandejára omeʼẽvaʼekue umi isrraelítape. Peteĩ léi heʼi: ‘Rehayhuvaʼerã Jehová nde Járape nde pyʼaite guive, opaite ne apytuʼũ, ne álma ha ne mbarete reheve’. Ha ótro léi katu heʼi: ‘Rehayhuvaʼerã nde rapichápe nde rejehayhuháicha’. Ñandejára Raʼy, Jesucristo, heʼi koʼãva haʼeha umi mokõi léi tuichavéva Ñandejára omeʼẽvaʼekue ipuévlo Israélpe. Upéi ñaaprendéta heta mbaʼe Ñandejára Raʼýgui ha umi mbaʼe omboʼevaʼekuégui.

Éxodo 19:1-25; 20:1-21; 24:12-18; 31:18; Deuteronomio 6:4-6; Levítico 19:18; Mateo 22:36-40.