Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 24

José oprova iñermanokuérape

José oprova iñermanokuérape

JOSÉ oikuaase umi 10 iñermanokuérapa iñaña ha ipyʼahatã gueteri. Upévare heʼi chupekuéra: ‘Peẽningo espía. Oiméne peju pehecha hag̃ua mbaʼépepa ore retã noĩporãi’.

‘Nahániri, ore ndahaʼéi upéva’, heʼi hikuái. ‘Ore kuimbaʼe hekoporãva. Enterove ore oñoermáno. Roĩvaʼekue 12. Péro peteĩ ndaiporivéima, ha pe imitãvéva opyta ore rógape ore ru ndive’.

José ndogueroviái guaʼu chupekuéra. Omoinge iñermáno Simeónpe kárselpe, ha oheja umi ótrope oho hógape hiʼupyrã reheve. Péro heʼi chupekuéra: ‘Peju jey vove, peguerúta chéve pene ermáno imitãvéva’.

Oho jeývo hikuái Canaánpe, José ermanokuéra omombeʼupaite itúva Jacóbpe umi mbaʼe oikovaʼekue. Jacob ndovyʼaieterei. ‘José ndaiporivéima’, ojaheʼo, ‘ha koʼág̃a Simeón avei ndaiporivéima. Ndahejamoʼãi pegueraha Benjamín che raʼy imitãvévape’. Péro opapotávo chuguikuéra hiʼupyrã, Jacob ohejámante chupekuéra ogueraha Benjamínpe ikatu hag̃ua ogueruve hiʼupyrã Egíptogui.

José ohecha ou iñermanokuérape. Haʼe ovyʼaiterei ohechávo Benjamínpe, pe iñermáno imitãvéva. Péro haʼekuéra ndoikuaái ko kuimbaʼe iñimportánteva haʼeha José. Koʼág̃a José ojapo peteĩ mbaʼe oprova hag̃ua umi 10 iñermanokuérape.

José heʼi isiervokuérape omyenyhẽ hag̃ua iñermanokuéra vosa hiʼupyrãgui. Péro haʼekuéra oikuaaʼỹme, heʼi avei isiervokuérape omoĩ hag̃ua peteĩ kópa de pláta Benjamín vosápe. Mombyrymi oho rire hikuái, José omondo umi isiérvope hapykuerikuéra. Ohupytývo chupekuéra, isiervokuéra heʼi: ‘Mbaʼére piko pemonda ore ruvicha kópa de pláta?’.

‘Ore noromondái ikópa’, heʼi iñermanokuéra. ‘Petopáramo ore apytépe pe oguerekóva, pejuka upévape’.

Upévare isiervokuéra oñepyrũ oheka enterove vosápe, ha rehechaháicha ko taʼangápe otopa hikuái pe kópa Benjamín vosápe. José siervokuéra heʼi: ‘Peẽ pehokuaáma, péro Benjamín ouvaʼerã orendive’. Mbaʼépa ojapóta koʼág̃a umi 10 iñermanokuéra?

Oupaite jey hikuái Benjamín ndive José rógape. José heʼi iñermanokuérape: ‘Ikatúma pehopa pende rógape, péro Benjamín opytavaʼerã koʼápe che esklavorã’.

Judá koʼág̃a oñeʼẽ, ha heʼi: ‘Che aha jeýramo amoite ha ndohóiramo chendive ko mitãrusu, che ru omanóta, pórke ohayhueterei chupe. Upévare, tapytána che nde esklavorã, péro ehejántena toho ko mitãrusu’.

José ohechakuaa iñermanokuéra ndahaʼeveimaha ymaguaréicha. Naiñañavéima ha ndaipyʼahatãvéima hikuái. Jahechami mbaʼépa koʼág̃a ojapo José.

Génesis 42:9-38; 43:1-34; 44:1-34.