Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Che lívro omombeʼúva istória oĩva Ñandejára Ñeʼẽme

 ISTÓRIA 21

José ermanokuéra ndaijaʼéi hese

José ermanokuéra ndaijaʼéi hese

EMAʼẼMI mbaʼeichaitépa ko mitãrusu ndovyʼái ha ndaikatúi ojapo mbaʼeve! Pévaniko José. Iñermanokuéra ovenderamoite chupe koʼã kuimbaʼépe, ohovahína Egíptope. Upépe Joségui oikóta esklávo. Mbaʼérepa iñermanokuéra ojapo hese ko mbaʼe vai? Oenvidiágui chupe.

Ituvakuéra, Jacob, ohayhuetereivaʼekue Josépe. Ohechauka upéva ojapóvo chupe peteĩ ao puku iporãva. Umi 10 iñermanokuéra ohechávo Jacob ohayhuveha Josépe, oñepyrũ oenvidia chupe ha ndaijaʼéi hese. Péro ndahaʼéi upévare añónte ndaijaʼéiva hese.

José oguereko mokõi suéño. Koʼã mokõi suéñope José ohecha iñermanokuéra ojayvyha henondépe. Omombeʼúvo José pe ohechavaʼekue iképe, koʼýte iñermanokuéra ndaijaʼéi hese.

Peteĩ árape, José ermanokuéra oñangareko jave itúva ovechakuérare, Jacob heʼi Josépe oho hag̃ua ohecha oĩ porãpa hikuái. Ohechávo iñermanokuéra José ouha, oĩ heʼíva: ‘Jaha jajuka!’. Péro iñermáno ypykue, Rubén, heʼi: ‘Ani, ani pejapo upéva!’. Upéva rangue, opoi hikuái Josépe peteĩ póso hypavaʼekuépe. Upe rire oguapy hikuái ohecha hag̃ua mbaʼépa ojapóta iñermáno Joségui.

Upe jave ou heta ismaelíta. Judá heʼi iñermanokuérape: ‘Ñavende umi ismaelítape’. Ha upéicha ojapo hikuái. Ovende Josépe 20 monéda de plátare! Mbaʼeichaitépa hembiapo vai ha ipyʼahatã hikuái!

Mbaʼépa heʼíta itúvape iñermanokuéra? Ojuka hikuái peteĩ kavara ha omoinge jey jey José ao porãite pe kavara ruguýpe. Upémaramo ogueraha pe ao itúva Jacóbpe ha heʼi chupe: ‘Rotopa kóva. Ehechami ndahaʼéipa José ao’.

Jacob ohecha haʼeha José ao. ‘Oiméne peteĩ mymba ñarõ ojukáraʼe Josépe’, heʼi ojaheʼóvo. Ha upéva voi José ermanokuéra oipotavaʼekue itúva opensa. Jacob ombyasyeterei. Heta día hasẽ. Péro José nomanóikuri. Jahechami mbaʼépa oiko hese pe ojeguerahahaguépe.

Génesis 37:1-35.