Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ikatu revyʼa ne famíliandi

 SEKSIÓN 4

Mbaʼéichapa peipurúta pende pláta

Mbaʼéichapa peipurúta pende pláta

“Ndaiporihápe ñemongeta mbaʼeve nosẽporãi.” (Proverbios 15:22)

Enterovénte ningo ñaikotevẽ pláta ñamoĩ hag̃ua ñane famíliape opa mbaʼe oikotevẽva (Proverbios 30:8). La Biblia heʼi voi pe pláta ikatuha ñanepytyvõ (Eclesiastés 7:12). Sapyʼánte ijetuʼu ména ha tembirekópe oñeʼẽ hag̃ua oñondive mbaʼéichapa oipurúta hikuái ipláta ha koʼýte ofaltapárõ, péro aníkena peheja upéva ombyai pene matrimónio (Efesios 4:32). Pekonfia vaʼerã ojuehe ha peñemongeta mbaʼépepa peipurúta pende pláta.

 1. PEPLANEA PORÃ VAʼERÃ

MBAʼÉPA HEʼI LA BIBLIA: “¿Mávapa pende apytépe omopuʼãsérõ peteĩ tórre ndoguapyraẽi okalkula mboýpa ogastáta, ohecha hag̃ua ikatútapa ojapopa?” (Lucas 14:28). Tekotevẽterei ningo peñemongeta oñondive peikuaa hag̃ua mbaʼéichapa peipurúta pende pláta (Amós 3:3). Pehecha vaʼerã mbaʼépa tekotevẽta pejogua ha mboy pevépa ikatu pegasta (Proverbios 31:16). Peñehaʼã vaʼerã avei ani hag̃ua pedeve, síno pegasta peguerekóvante. Ha ndahaʼéi hemby haguérente peẽme pejogua vaʼerã peteĩ mbaʼe napeikotevẽiva (Proverbios 21:5; 22:7).

EJAPOMÍNA KO MBAʼE:

  • Fin de méspe hembyʼimíramo peẽme pláta, pedesidi oñondive mbaʼéichapa peipurúta

  • Pehechakuaáramo ofaltaha peẽme pláta, pekalkula mbaʼépa ikatu pejapo saʼive pegasta hag̃ua. Por ehémplo, ikatu pekosinánte pende rógape, pejogua rangue tembiʼu ótro ládogui

 2. PENESINSÉRO VAʼERÃ

MBAʼÉPA HEʼI LA BIBLIA: “Ani pendejapu ojupe” (Colosenses 3:9). Emombeʼu porãnte vaʼerã ne ména térã ne rembirekópe mboýpa regana ha mboýpa regasta.

Siémpre reñemongeta raẽ vaʼerã ne rembiayhúndi rejogua mboyve peteĩ mbaʼe hepýva (Proverbios 13:10). Péicha rejapóramo, ndapeikovaimoʼãi umíva káusare ha peikóta pyʼaguapýpe. Oiméramo nde reguereko nde suéldo, ani repensa upéva nembaʼenteha, rehechakuaa vaʼerã upéva haʼeha avei ne família mbaʼe (1 Timoteo 5:8).

EJAPOMÍNA KO MBAʼE:

  • Eñemongeta ne rembiayhúndi mboýpa ikatu pegasta káda uno peporanduʼỹre ojupe

  • Ani pehaʼarõ peneprovléma raẽ pláta káusare peñemongeta hag̃ua upe témare