Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ikatu revyʼa ne famíliandi

 SEKSIÓN 7

Mbaʼéichapa pehekomboʼe vaʼerã pene família

Mbaʼéichapa pehekomboʼe vaʼerã pene família

“Ani nderesarái arakaʼeve koʼã [mandamiéntogui] che ameʼẽva ndéve koʼág̃a. Ehekomboʼe umíva rehe nde raʼykuérape.” (Deuteronomio 6:6, 7)

Jehová omoñepyrũ vaʼekue pe família, ha haʼe voi onkarga tuvakuérape oñangareko hag̃ua ifamíliare (Colosenses 3:20). Upéicharõ, ne rresponsavilida hína reipytyvõ chupekuéra ikatu hag̃uáicha ohayhu Jehovápe ha osẽ porã hag̃ua (2 Timoteo 1:5; 3:15). Reñehaʼã vaʼerã avei reikuaa mbaʼépa oĩ ne família pyʼapýpe, ha ani nderesarái iñimportanteha remoĩ ehémplo porã chupekuéra. Rehekomboʼe porã hag̃ua ne famíliape, nde raẽ reikuaa vaʼerã Ñandejára Ñeʼẽ ha ereko upéva nde pyʼapýpe (Salmo 40:8).

 1. EIPYTYVÕ NE FAMÍLIAPE OÑEMONGETA HAG̃UA NENDIVE

MBAʼÉPA HEʼI LA BIBLIA: “Opavave tekotevẽ ipyaʼe ohendukuaa hag̃ua ha imbegue oñeʼẽ [hag̃ua]” (Santiago 1:19). Katuete ningo nde reipota ne família oñemongeta nendive. Upévare siémpre rehechauka vaʼerã rehenduseha chupe. Iporã vaʼerã avei reipytyvõ ne famíliape ani hag̃ua otĩ térã okyhyje oñeʼẽ hag̃ua nendive (Santiago 3:18). Haʼe ohecháramo ndaikatuiha voi oñeñeʼẽ nendive térã ndearhelha, hasýta omombeʼu hag̃ua ndéve umi mbaʼe opensáva. Upévare nepasiénsia vaʼerã ha pyʼỹinte ere ne famíliape rehayhuetereiha chupe (Mateo 3:17; 1 Corintios 8:1).

EJAPOMÍNA KO MBAʼE:

  • Eñemotiémpo vaʼerã rehendu hag̃ua ne famíliape oñeʼẽse jave nendive

  • Pyʼỹinte eñemongeta ne famíliandi, ani oĩ jave provlémante

2. EÑEHAʼÃ VAʼERÃ ENTENDE NE FAMÍLIAPE

MBAʼÉPA HEʼI LA BIBLIA: Umi ohechaukáva iñaranduha, ohupytýne heta mbaʼe porã (Proverbios 16:20). Sapyʼánte ne família ndeʼipamoʼãi ndéve umi mbaʼe oñandúva, upévare nearandu vaʼerã rehechakuaa hag̃ua mbaʼépa añetehápe heʼise hína. Umi mitãrusu ha mitãkuña sapyʼánte opensaʼỹre heʼínte peteĩ mbaʼe. Upévare nemanduʼa vaʼerã Proverbios 18:13 heʼívare: “Upe ombohováiva ojapysaka porã mboyve, itavy voi” (ÑÑB). Upéicharõ aníkena ndepochy rei (Proverbios 19:11).

EJAPOMÍNA KO MBAʼE:

  • Tahaʼe haʼéva umi mbaʼe omombeʼúva ndéve ne família, ani reñeʼẽjoko chupe térã repereréma voi hese

  • Epensa mbaʼéichapa nde reñeñandu vaʼekue upe edápe ha mbaʼépa iñimportánte vaʼekue ndéve g̃uarã

 3. PEÑEMOĨ PETEĨ ÑEʼẼME

MBAʼÉPA HEʼI LA BIBLIA: “Ehendúke che raʼy nde ru ñeʼẽ ha ani rejahéi nde sy nemboʼévare” (Proverbios 1:8). Jehová onkarga sy ha túvape ohekomboʼe hag̃ua ifamíliape. Mokõivéva omboʼe vaʼerã ifamíliape irrespetuóso ha iñeʼẽrendu hag̃ua (Efesios 6:1-3). Umi mitã katuete opilláta ituvakuéra noñemoĩriramo “peteĩ ñeʼẽme” (1 Corintios 1:10). Upévare, aníkena pejodiskuti pene família rovake peteĩvape ndogustáiramo pe ótro okorrehi lája chupe. Napeñatendéiramo upe mbaʼére, haʼe ikatu napenderrespetavéi.

EJAPOMÍNA KO MBAʼE:

  • Peñemoĩ peteĩ ñeʼẽme mbaʼéichapa pekorrehíta pene família

  • Oiméramo repensa diferénte ne ména térã ne rembirekógui mbaʼéichapa pehekomboʼéta pene família, eñehaʼã eñemoĩ ilugárpe ha entende chupe

 4. REPENSÁMA VAʼERÃ MBAʼÉICHAPA REHEKOMBOʼÉTA NE FAMÍLIAPE

MBAʼÉPA HEʼI LA BIBLIA: “Mitãme ehechauka michĩ reheve haperã” (Proverbios 22:6). Reipotáramo ne família osẽ porã, nde voi reipytyvõ vaʼerã chupe. Repensáma vaʼerã mbaʼéichapa rehekomboʼe térã rekorrehíta chupe (Salmo 127:4; Proverbios 29:17). Upéva ndeʼiséi katuete rembyepoti vaʼerãha, síno reipytyvõ vaʼerãha chupe okumpli hag̃ua umi mbaʼe rejeruréva (Proverbios 28:7). Remboʼe vaʼerã avei ne famíliape ohayhu hag̃ua Ñandejára Ñeʼẽ ha osegi hag̃ua umi konsého oĩva pype (Salmo 1:2). Péicha reipytyvõta chupe oikuaa hag̃ua mbaʼépa oĩ porã térã oĩ vai (Hebreos 5:14).

EJAPOMÍNA KO MBAʼE:

  • Eipytyvõ ne famíliape ohecha hag̃ua Jehovápe peteĩ persónaicha ha ojerovia mbarete hag̃ua hese

  • Eipytyvõ chupe ohechakuaa ha ojehekýi hag̃ua umi pelígro oĩvagui Internétpe ha umi rred sosiálpe. Emboʼe chupe mbaʼéichapa oñeñangareko vaʼerã ani hag̃ua hoʼa umi tekove tieʼỹ ñuhãme

“Mitãme ehechauka michĩ reheve haperã”