Ehecha oĩva pype

Ehecha menú secundario

Ehecha oĩva pype

Testígo de Jehová

guarani

¿Mbaʼépa ñanemboʼe la Biblia?

 KAPÍTULO 19

Káda día reñemoag̃uive vaʼerã Jehováre

Káda día reñemoag̃uive vaʼerã Jehováre

1, 2. ¿Mávapa ikatu ñandeprotehe koʼã tiémpo ijetuʼuetévape?

EPENSAMÍNTENA peteĩ tiémpo vai ndejagarraha tapére. Ehecha mbaʼéichapa pe tiémpo iñypytũmbaite, osunu ha overa ape ha pépe, upéi ehecháma katu ou pe ama. Upémarõ eheka peteĩ lugár eike hag̃ua ani hag̃ua nderykuepa ha revyʼaiterei rejuhúvo peteĩ techoʼi reike hag̃ua iguýpe.

2 Koʼág̃a ñaime avei peteĩ situasión peichaguápe. Ko múndo ivai vaive ohóvo, upévare enterovénte jaikuaase mbaʼépa ikatu jajapo jajeprotehe hag̃ua. Peteĩ salmísta oskrivi vaʼekue: “Che haʼéta Jehovápe: ‘Nde hína peteĩ lugár isegúro porãva, upépe ikatu aha ajeprotehe. Nde ningo che Jára, che ajerovia nderehe’” (Salmo 91:2, TNM). Jehová katuete oñangarekóta ñanderehe ha ñanembopyʼaguapýta jahasa jave umi situasión ijetuʼúva. Haʼe omeʼẽ voi ñandéve peteĩ esperánsa iporãitereíva.

3. ¿Mbaʼépa jajapo vaʼerã Jehová ñandeprotehe hag̃ua koʼã tiémpo ijetuʼuetévape?

3 ¿Mbaʼéichapa Jehová ñandeprotehe? Haʼe ikatu ñanepytyvõ ñaaguanta hag̃ua oimeraẽ provléma jarekóva. Haʼe ningo ipoderosove hína oimeraẽ persóna ojaposévagui ñanderehe ivaíva. Oikóramo jepe ñanderehe heta mbaʼe vai, ñande jaikuaa porã Jehová koʼẽrõitéma osolusionambataha umíva. Upévare la Biblia heʼi ñandéve ani hag̃ua ñañemomombyry Jehovágui, síno jaiko hag̃ua “Ñandejára mborayhúpe” (Judas 21). Káda día ñañemoag̃uive vaʼerã Jehováre ikatu hag̃uáicha haʼe ñanepytyvõ koʼã tiémpo  ijetuʼuetévape. Péro, ¿mbaʼépa jajapo vaʼerã ñañemoag̃uive hag̃ua Jehováre?

JAHECHAUKÁKENA JAHAYHUHA JEHOVÁPE

4, 5. ¿Mbaʼéichapa Jehová ohechauka ñanderayhuha?

4 Ñañemoag̃uive hag̃ua Jehováre, jahechakuaa vaʼerã mbaʼeichaitépa haʼe ñanderayhu. Epensamíntena umi mbaʼe porã Jehová ojapómavare ñanderehehápe. Haʼe ningo omeʼẽ ñandéve ko yvy, umi plánta, animalkuéra, avei pe y ha umi hiʼupy hepa jepéva. La Biblia rupive avei Jehová omombeʼu ñandéve mbaʼéichapa héra ha umi kualida porã orekóva. Ha pe kualida iñimportantevéva haʼe orekóva haʼe pe mborayhu. Ñanderayhueterei rupi haʼe ombou vaʼekue Itaʼýra ohayhuetéva omano hag̃ua ñanderehehápe (Juan 3:16). Péicha, Jesús rupive jareko peteĩ esperánsa iporãitereíva.

5 Jehová omoĩma Itaʼýra Jesucrístope ogoverna hag̃ua, ha koʼẽrõitéma igoviérno oipeʼapaitéta umi mbaʼe ñanembohasa asýva. Jesús ogoverna vove ko múndo, ojapóta ko yvýgui peteĩ hardín iporãitereíva ha upépe jaikóta vyʼápe ha pyʼaguapýpe opa árare (Salmo 37:29). Jehová ohechauka avei ñandéve ñanderayhuetereiha ñanemboʼévo mbaʼépa ikatu jajapo jaiko hag̃ua vyʼápe koʼág̃ama voi. Haʼe heʼi avei ñandéve ñañemboʼe hag̃ua chupe ha haʼe ohendutaha ñane ñemboʼe. Jehová ohechauka porãiterei mbaʼeichaitépa ñanderayhu káda únope.

6. ¿Mbaʼépa jajapo vaʼerã ñande avei jahechauka hag̃ua jahayhuha Jehovápe?

6 ¿Mbaʼépa jajapo vaʼerã ñande avei jahechauka hag̃ua jahayhuha Jehovápe? Jaagradese vaʼerã chupe opaite mbaʼe ojapóvare ñanderehehápe. Péro ñambyasýramo jepe, koʼã tiémpope la hénte imalagradesidoiterei. Ymaite guive voi upéicha, peteĩ okasiónpe Jesús omonguera 10 leprósope, péro peteĩnte oñemboja oagradese hag̃ua chupe upévare  (Lucas 17:12-17). Ha ñande jajoguase upe kuimbaʼe ijagradesídovape. Upévare siémpre jaagradese vaʼerã Jehovápe opaite mbaʼe omeʼẽvare ñandéve.

7. ¿Mbaʼeichaite pevépa jahayhu vaʼerã Jehovápe?

7 ¿Mbaʼeichaite pevépa jahayhu vaʼerã Jehovápe? Jesús heʼi vaʼekue idisipulokuérape ohayhu vaʼerãha Jehovápe ipyʼaite guive, hiʼálma rugua guive ha opa iñarandukue reheve (elee Mateo 22:37). ¿Mbaʼépa heʼise upéva?

8, 9. ¿Mbaʼéichapa ikatu jahechauka Jehovápe jahayhuha chupe?

8 Ndahaʼéi vaʼerã jaʼénteva jahayhuha Jehovápe. Jahayhúramo chupe ñande pyʼaite guive, ñane álma rugua guive ha opa ñanearandukue reheve, jahechaukáta upéva umi mbaʼe jajapóvare (Mateo 7:16-20). La Biblia heʼi voi jahayhúramo Ñandejárape jajapotaha umi mbaʼe haʼe omandáva ñandéve. ¿Ijetuʼúpa jajapo hag̃ua upéva? Nahániri. Pórke Ñandejára mandamientokuéra ndaipohýiri (elee 1 Juan 5:3).

9 Ñaneñeʼẽrendúramo Jehovápe, javyʼa ha ñañeñandu porãta (Isaías 48:17, 18). Péro, ¿mbaʼépa jajapo vaʼerã akóinte ñaime hag̃ua Jehová ykére? Jahechamína upéva.

KÁDA DÍA REÑEMOAG̃UIVE VAʼERÃ JEHOVÁRE

10. ¿Mbaʼérepa resegi vaʼerã reikuaave Jehovápe?

10 Restudia rupi la Biblia, nde reikuaáma Jehovápe ha reñemoag̃uíma hese. Péro, ¿mbaʼépa rejapo vaʼerã siémpre reiko hag̃ua Jehová amígoramo? Ñamoĩmína peteĩ ehémplo, peteĩ tata ani hag̃ua ogue, ñahatapyña meme vaʼerã ha ñamoĩve pype jepeʼa. Upéicha avei, ani hag̃ua opa rei ne amista Jehovándi, resegi vaʼerã reikuaave chupe ikatu hag̃uáicha reñemoag̃uive hese (Proverbios 2:1-5).

Peteĩ tata oikotevẽháicha jepeʼáre ani hag̃ua ogue, ñande avei jasegi vaʼerã ñaaprendeve Jehovágui jahayhuve hag̃ua chupe

11. ¿Mbaʼéichapa nepytyvõta resegíramo restudia la Biblia?

11 Resegívo restudia la Biblia, reaprendevéta heta mbaʼe porã Jehovágui ha umíva opokóta ne korasõre. Emañamína mbaʼéichapa Jesús disipulokuéra oñeñandu vaʼekue  Jesús omyesakãrõ guare chupekuéra umi profesía oĩva la Bíbliape. Haʼekuéra heʼi ojupe: “Ajeve voi ningo ñañandu raʼe pe ñane korasõ hendytarõguáicha ñandehegui, oñemongetávo ñanendive ha omyesakãvo ñandéve opa mbaʼe oĩva Ñandejára Ñeʼẽme” (Lucas 24:32).

12, 13. a) ¿Mbaʼépa nahiʼãi oiko nderehe? b) ¿Mbaʼépa rejapo vaʼerã siémpre rehayhu hag̃ua Jehovápe?

12 Jesús disipulokuérare ningo opokoiterei vaʼekue umi mbaʼe oaprendéva Ñandejára Ñeʼẽgui, ha oiméne nderehe avei oiko upéva reaprende ñepyrũrõ guare umi mbaʼe la Biblia omboʼéva. Péro ani hag̃ua reñemomombyry Jehovágui, resegi vaʼerã reikuaave chupe ha reñemoag̃uive hese (Mateo 24:12).

13 Siémpre ereko hag̃ua Jehovápe ne amígoramo, reñehaʼã vaʼerã rejapo umi mbaʼe nepytyvõtava káda día rehayhuve hag̃ua chupe. Upearã resegi vaʼerã reikuaave chupe ha Jesúspe, ejepyʼamongeta umi mbaʼe reaprendévare la Bíbliagui ha epensa mbaʼéichapa ikatu remoĩ en práktika umíva  (Juan 17:3). Relee térã restudia jave la Biblia, repensa vaʼerã: “¿Mbaʼépa chemboʼe Jehovágui? ¿Mbaʼéichapa koʼã mbaʼe aaprendéva chemomýi ahayhu hag̃ua chupe che pyʼaite guive ha che álma rugua guive?” (1 Timoteo 4:15).

14. ¿Mbaʼérepa jaʼekuaa ñañemboʼe pyʼỹiramo Jehovápe jahayhuvetaha chupe?

14 Siémpre ñañeʼẽramo peteĩ persónandi, kon el tiémpo upe persóna ñaneamigoitéta ha jahayhuvéta chupe. Upéicha avei siémpre ñañemboʼéramo Jehovápe, katuete jahayhuvéta chupe (elee 1 Tesalonicenses 5:17). Jaagradeseterei ningo Jehovápe ikatu haguére ñañemboʼe chupe. Péicha ikatu ñamombeʼu chupe umi mbaʼe ñapensáva ha ñañandúva (Salmo 62:8). Ñañemboʼe jave Jehovápe ndovaléi jarrepetipánte de memória umi mbaʼe jaʼéva, síno ñañemboʼe vaʼerã ñande pyʼaite guive. Jasegíramo jastudia la Biblia ha ñañemboʼéramo Jehovápe ñande pyʼaite guive, katuete jahayhuvéta chupe.

ÑAÑEʼẼ VAʼERÃ JEHOVÁRE ÑANDE RAPICHAKUÉRAPE

15, 16. ¿Mbaʼépa nde repensa pe predikasiónre?

15 Jehová omeʼẽ avei ñandéve peteĩ priviléhio ijojahaʼỹva, ñande ikatu ñamombeʼu ñande rapichakuérape umi mbaʼe ñaaprendéva la Bíbliagui. Ha jajapóvo upéva ñamombaʼeguasu hína Jehovápe ha ñañemoag̃uive hese (Lucas 1:74). Jesús heʼi vaʼekue voi idisipulokuéra opredika vaʼerãha umi “marandu porã oñeʼẽva Ñandejára Rréinore”. ¿Rejapómapa nde upéva? (Mateo 24:14; 28:19, 20.)

16 Apóstol Páblope g̃uarã iñimportanteterei vaʼekue pe predikasión (2 Corintios 4:7). Jehová ningo oipota ñamombeʼu umi héntepe mávapa haʼe ha mbaʼépa ojapóta koʼẽrõite, upévare ndaipóri ótra kósa iñimportantevéva pe predikasióngui. Jajapóvo ko tembiapo jahechauka hína jaserviha Jehovápe ha haʼe omombaʼeterei upéva (Hebreos 6:10). Japredikávo ñaipytyvõ avei hína umi héntepe  oñemoag̃ui hag̃ua Jehováre ha ojesalva hag̃ua. Péro ndahaʼéi upévante, ñande voi ñañemoag̃uive Jehováre, ha jajapo hína peteĩ mbaʼe ñanepytyvõva jajesalva hag̃ua (elee 1 Corintios 15:58). ¿Oĩnepa ótro tembiapo ñanembovyʼavéva upévagui?

17. ¿Mbaʼérepa koʼág̃a mas ke núnka tekotevẽ japredika?

17 Koʼág̃a ningo mas ke núnka tekotevẽ japredika. La Biblia heʼi voi: “Epredikáke kyreʼỹme Ñandejára Ñeʼẽ tahaʼe iporã térã ivai jave” (2 Timoteo 4:2). Umi hénte ningo tekotevẽ oikuaa umi mbaʼe porã ojapótava Ñandejára Rréino. La Biblia heʼi: “Hiʼag̃uimbaitéma ningo Jehová ára guasu. Hiʼag̃uíma hína ha pyaʼe ou”. Ha heʼi avei: “Upe día nog̃uahẽmoʼãi tárde” (Sofonías 1:14, TNM; Habacuc 2:3, TNM). Jehová koʼẽrõitéma ohundíta umi hénte añáme ha opaite mbaʼe oĩva Satanás poguýpe. Ha upéva oiko mboyve, ñaipytyvõ vaʼerã umi héntepe oikuaa hag̃ua Jehovápe ha oservi hag̃ua chupe.

18. ¿Mbaʼépa oipota avei Jehová jajapo?

18 Jehová oipota avei ñamombaʼeguasu chupe isiervokuéra ndive. La Biblia heʼi voi: “Jajepyʼapýkena ojuehe ñande pyʼaite guive, ha ñañomokyreʼỹ japorohayhu ha jajapo hag̃ua iporãva. Ani jafalta meme rreunionhápe, oĩramo jepe ojepokuaáva ojapo upéicha. Upéva rangue, ñañomokyreʼỹ vaʼerã, koʼýte koʼág̃a jahechávo pe ára hiʼag̃uimbaitemaha” (Hebreos 10:24, 25). Jajapo vaʼerã opa ikatúva ani hag̃ua jajavy ni peteĩ rreunión. Umi rreunión ningo ñanepytyvõ ñañomokyreʼỹ ha ñañomombarete hag̃ua.

19. ¿Mbaʼépa ikatu nepytyvõ rehayhu hag̃ua ermanokuérape?

19 Rreunionhápe ningo retopáta neamigorã umi nepytyvõtava reservi porãve hag̃ua Jehovápe. Umi rreuniónpe oho heta ermáno ha ermána oñehaʼãmbaitéva avei ndéicha oservi porã hag̃ua Jehovápe. Enterove ningo ñaneimperfékto, upévare umi ermáno ikatúnte avei ojavy mimi.  Upévare reporoperdonakuaa vaʼerã (elee Colosenses 3:13). Reñehaʼã vaʼerã siémpre rehecha iporãvante umi ermáno ha ermanakuérare. Upéva nepytyvõta rehayhuve hag̃ua chupekuéra ha reñemoag̃uive hag̃ua Jehováre.

JAIKOVÉTA PÁRA SIÉMPRE

20, 21. ¿Mbaʼéichapa jaikóta Ñandejára goviérno poguýpe?

20 Jehová oipota enterove iñamígo oiko vyʼa ha pyʼaguapýpe, ha la Biblia omboʼe koʼẽrõitéma jaikotaha upéicha.

Jehová oipota reikove pára siémpre peteĩ hardín iporãitereívape. ¿Reñehaʼãtapa rehupyty upéva?

21 Ñandejára Rréino ogoverna vove ko yvy, ndajaikomoʼãvéima 70 térã 80 áñonte, síno jaikovéta pára siémpre peteĩ hardín iporãitereívape, upépe ñaneresãita ha jaikóta vyʼa ha pyʼaguapýpe opa árare. La Biblia heʼi ñandéve ñañakãrama hatã hag̃ua “pe jeikove añeteguávare”. Jehová oprometéma omeʼẽtaha ñandéve vída etérna, péro ñañehaʼã vaʼerã jahupyty hag̃ua upéva (1 Timoteo 6:12, 19).

22. a) ¿Mbaʼépa jajapo vaʼerã jaikove hag̃ua pára siémpre? b) ¿Mbaʼéicha rupípa jahupytýta pe vída etérna?

22 Jaikove hag̃ua pára siémpre jajapo vaʼerã “heta mbaʼe porã” (1 Timoteo 6:18). Upéva heʼise ñamoĩ vaʼerãha en práktika umi mbaʼe ñaaprendéva la Bíbliagui. Ñande ningo añetehápe nañamereséi jaikove opa árare ha ñandejehegui reínte ndajahupytymoʼãi voi upéva. Péro Jehová imbaʼeporãiterei rupi omeʼẽta upe rregálo porãite entéro umi iñeʼẽrendúvape chupe (Romanos 5:15). Haʼe oipotaiterei jaikove pára siémpre.

23. ¿Mbaʼérepa koʼág̃ama redesidi vaʼerã reservi Jehovápe?

23 Eñeporandumína: “¿Amombaʼeguasúpa hína Jehovápe haʼe oipotaháicha?”. Rehechakuaáramo tekotevẽha rekambia algúna kósape remombaʼeguasu hag̃ua chupe haʼe oipotaháicha, pyaʼe rekambia vaʼerã. Koʼã tiémpo ijetuʼuetévape Jehová oprotehe hína umi iñeʼẽrendu ha ojeroviávape hese ipyʼaite guive. Ha amo gotyove okumplíta pe opromete vaʼekue omeʼẽvo isiervokuérape pe  oportunida oikove hag̃ua opa árare peteĩ hardín iporãitereívape. Nde avei rejedesidíramo reservi Jehovápe, ikatúta reikove pára siémpre.