Ehecha oĩva pype

Ehecha menú secundario

Ehecha oĩva pype

Testígo de Jehová

guarani

¿Mbaʼépa ñanemboʼe la Biblia?

 KAPÍTULO 7

Umi omano vaʼekue oikove jeýta

Umi omano vaʼekue oikove jeýta

1-3. ¿Mbaʼéguipa avave ndaikatúi jajesalva, ha mbaʼépa opromete ñandéve Jehová?

EPENSAMÍNA rehoha préso ótro káusare ha reñekondenaha remano hag̃ua. Nde ndaikatuvéima rejapo mbaʼeve ha reperdetéma voi la esperánsa. Péro upe javete reikuaa oĩha peteĩ persóna orekóva tuicha autorida ha ikatúva neguenohẽ pe kárselgui, ha ndahaʼéi upévante, opromete voi katu ndéve nepytyvõtaha. ¡Ajépa revyʼaiténe!

2 Ñande ningo enterove ñaime kondenádo ñamano hag̃ua ha ñandejehegui reínte ndaikatúi jajesalva upévagui. Péro Jehová oreko podér ñaneguenohẽ hag̃ua pe ñemano poguýgui. Haʼe opromete pe ñane enemígo ipahaite oñehundítava haʼeha pe ñemano (1 Corintios 15:26).

3 Epensamíntena mbaʼeichaitépa ñandepyʼaguapýta ndaiporivéi vove pe ñemano. Péro ndahaʼemoʼãi pe ñemano añónte Jehová oipeʼátava, síno haʼe opromete avei omoingove jeytaha umi omano vaʼekuépe. ¡Ajépa ñanembovyʼaite upéva! (Isaías 26:19).

OMANÓRAMO ÑANE HÉNTE TÉRÃ ÑANE AMÍGO

4. a) ¿Mbaʼépa ikatu ñanekonsola omanóramo ñane hénte térã ñane amígo? b) ¿Máva mávapa Jesús amigoite vaʼekue?

4 Omanóramo ñandehegui peteĩ ñane hénte térã ñane amígo ningo ñañeñandu vaieterei ha yvýre voi japyta. Ñande jaikuaa porã ndaikatuiha jajapo mbaʼeve  pe persóna oikove jey hag̃ua. Péro la Bíbliape heʼi oĩha peteĩ esperánsa iporãitereíva (elee 2 Corintios 1:3, 4). Jahechamína peteĩ ehémplo ohechaukáva Jehová ha Jesús omoingovese jeyha umi omano vaʼekuépe. Jesús oĩrõ guare ko yvy ape ári, ovisitámi vaʼekue Lázaro ha iñermanakuéra Marta ha Maríape. Haʼekuéra ningo oñoamigoite vaʼekue. La Biblia heʼi voi: “Jesús ohayhu Marta, María ha Lázarope” (Juan 11:3-5).

5, 6. a) ¿Mbaʼépa ojapo Jesús ohechávo Lázaro ermanakuéra ha iñamigokuéra hasẽjoa? b) ¿Mbaʼérepa ñandepyʼaguapy jaikuaávo mbaʼéichapa Jesús oñeñandu oĩramo omanóva?

5 Peteĩ día Lázaro omano, ha Jesús oikuaávo upéva oho María ha Marta rendápe. Marta oikuaávo Jesús ouha hína, oho ohug̃uaitĩ chupe. Haʼe ovyʼa ohechávo Jesúspe, péro upéi heʼi chupe: “Reimérire koʼápe, che ermáno nomanói vaʼerãmoʼã”. Marta opensa Jesús ndaikatuveimaha ojapo mbaʼeve Lázaro rehehápe. Jesús ohechávo mbaʼéichapa María ha Marta hasẽ, oguapyeterei hese ha hasẽ avei (Juan 11:21, 33, 35). Upévare ikatu jaʼe haʼe oikuaa porãitereiha mbaʼeichaitépa ñambyasy omanóramo ñandehegui peteĩ persóna jahayhúva.

6 Jesús ningo ojoguaiterei Itúape opa mbaʼépe, ha Jesús ombyasyeterei kuri Lázaro omanórõ guare. Upéva ohechauka ñandéve mbaʼéichapa oñeñandu avei Jehová oĩ jave omanóva (Juan 14:9). Jehová ningo oreko podér oipeʼaite hag̃ua la muérte ha koʼẽrõitéma voi ojapóta upéva.

JESÚS OMOINGOVE JEY LÁZAROPE

7, 8. ¿Mbaʼérepa Marta ndoipotái vaʼekue ojeavri pe sepultúra, ha mbaʼépa ojapo Jesús?

7 Jesús oho pe sepultúra oñemoĩ haguépe Lázaro retekue.  Péro pe sepultúra rokẽ oñemboty kuri peteĩ ita guasúpe. Upéi Jesús heʼi: “Peipeʼa pe ita”. Péro Marta ndoipotái ojeavri pe sepultúra rokẽ pórke ojapóma cuatro día Lázaro omano hague ha oiméne inéma (Juan 11:39). Haʼe ndoikuaaiete kuri mbaʼépa Jesús ojapóta hína Lázaro rehehápe.

Mbaʼeichaitépa ovyʼáne raʼe Lázaro hentekuéra ha iñamigokuéra Jesús omoingove jeýrõ guare chupe Juan 11:38-44

8 Jesús heʼi Lázarope: “¡Lázaro, esẽ!”. Ha upéi oiko peteĩ mbaʼe Marta ha María ni noimoʼãiva. Lázaro “osẽ okápe, ipy ha ipo ojejokuapa, hova katu ojejahoʼi páñope” (Juan 11:43, 44). Lázaro oikove jey ha ikatu jeýma ohasa porã iñermána ha iñamigokuérandi. Haʼekuéra vyʼapópe oañua chupe ha oñemongeta hendive. ¡Ajépa tuichaite mbaʼe pe oiko vaʼekue! Jesús omoingove jey Lázarope.

JESÚS OMOINGOVE JEY PETEĨ MITÃKUÑÁME

9, 10. a) ¿Mávapa omeʼẽ podér Jesúspe omoingove jey hag̃ua umi omanóvape? b) ¿Mbaʼérepa ñanemokyreʼỹ jaleévo umi istória oñeʼẽva pe ñemoingove jeýre?

9 ¿Omoingove jeýpa Jesús ipodér rupive umi omano vaʼekuépe? Nahániri. Jesús oñemboʼe vaʼekue Jehovápe ha haʼe omeʼẽ chupe podér omoingove jey hag̃ua Lázarope (elee Juan 11:41, 42). Péro ndahaʼéi Lázarope añónte la omoingove jey vaʼekue. La Biblia omombeʼu peteĩ mitãkuña orekóva 12 áño hasyete hague. Itúa Jairo ojedesespera ha ojerure asy Jesúspe omongueramínte hag̃ua itajýra peteĩmíme. Péro upe javete og̃uahẽ unos kuánto kuimbaʼe ha heʼi Jáirope: “Nde rajy oime omanóma. ¿Maʼerã piko remolesta reíta Mboʼehárape?”. Péro Jesús heʼi Jáirope: “Ani rekyhyje, ejeroviánte ha haʼe ojesalváta”. Upéi oho Jairo ndive hógape ha og̃uahẽmbotávo hikuái, Jesús ohecha ha ohendu  mbaʼéichapa umi hénte ojaheʼojoa. Upéi haʼe heʼi chupekuéra: “Anivéna penerasẽ, haʼe nomanói, okénte hína”. Oiméne Jairo ha hembireko nontendéi mbaʼérepa Jesús heʼi upéva. Upéi Jesús ojerure umi héntepe osẽ hag̃ua pe kotýgui ha heʼi Jairo ha hembirekópe oike hag̃ua hendive pe mitãkuña oĩháme. Jesús ojagarra pe mitãkuñáme ipógui ha heʼi chupe: “Mitãkuña, ndéve haʼe: ¡Epuʼã!”. Epensamíntena mbaʼeichaitépa oiméne ovyʼa itúa ha isy ohechávo ifamília oikove jeyha ha oguatáma katu oikóvo pérupi (Marcos 5:22-24, 35-42; Lucas 8:49-56). Oiméne upe guive Jairo ha hembireko omañávo ifamíliare siémpre imanduʼa pe Jehová ojapo vaʼekuére hesehapekuéra Jesús rupive. *

10 Umi hénte Jesús omoingove jey vaʼekue kon el tiémpo omano jey kuri. Péro jaleévo koʼã istória tuichaiterei ñanemokyreʼỹ omeʼẽgui ñandéve esperánsa. Jehová omoingovese jey umi omano vaʼekuépe, ha katuete ojapóta upéva.

¿MBAʼÉPA ÑAAPRENDE UMI ISTÓRIAGUI?

Apóstol Pedro omoingove jey peteĩ kuñakarai héravape Dorcas Hechos 9:36-42

Elías omoingove jey peteĩ viúda memby kuimbaʼépe 1 Reyes 17:17-24

11. ¿Mbaʼépa ñanemboʼe Eclesiastés 9:5?

11 La Biblia heʼi porã umi omano vaʼekue ndoikuaaveimaha mbaʼeve. Ha upeichaite oiko vaʼekue Lázaro rehe (Eclesiastés 9:5). Jesús heʼi haguéicha, Lázaro haʼete vaʼekue okénteva (Juan 11:11). Haʼe oĩ aja pe sepultúrape ndoikuaái kuri mbaʼépa oiko.

12. ¿Mbaʼéichapa jaikuaa Lázaro añetehápe oikove jey hague?

12 Heta hénte ohecha vaʼekue Jesús omoingove jeýrõ  guare Lázarope. Umi ndochaʼéiva Jesúsre jepe ohechakuaa haʼe ojapo hague upe milágro, ¡ndaipóri onega vaʼerã oñemoingove jey hague Lázarope! (Juan 11:47). Heta hénte oho ovisita Lázarope ha enterove lénto oñepyrũ oguerovia Ñandejára ombou hague Jesúspe. Upéva ndogustaiete Jesús enemigokuérape ha oñepyrũ ohecha hikuái mbaʼéichapa ojukáta Jesús ha Lázarope (Juan 11:53; 12:9-11).

13. ¿Mbaʼérepa ikatu jaguerovia Jehová omoingove jeytaha umi omano vaʼekuépe?

13 Jesús heʼi vaʼekue “opavave umi oĩva pe sepultúrape” oikove jeytaha (Juan 5:28). Jehová omoingove jeýta umi omano vaʼekuépe. Péro upearã tekotevẽ imanduʼa porã mbaʼeichagua persónapa rakaʼe káda uno. ¿Ikatútapa imanduʼapa enterovére? Jehová ningo ojapo vaʼekue entéro umi estrélla ha la Biblia heʼi haʼe oikuaaha káda estréllape hérarupi (elee Isaías 40:26). Jehová ikatúramo imanduʼapa umi estrélla rérare, ifasilvétantema chupe imanduʼa hag̃ua mbaʼeichagua persónapa rakaʼe umi omano vaʼekue, ha upeichaite omoingove jeýta chupekuéra. Jaikuaa avei Jehová ojapo hague opaite mbaʼe ha upévare ikatu jajerovia haʼe orekoha podér omoingove jey hag̃ua umi omano vaʼekuépe.

14, 15. ¿Mbaʼépa ñanemboʼe Job heʼi vaʼekue?

14 Job ningo ojerovia vaʼekue Jehová omoingove jeytaha umi omano vaʼekuépe. Haʼe oporandu: “Peteĩ persóna omanóramo, ¿ikatu piko oikove jey?”. Upéi haʼete orresponde Jehovápe heʼívo: “Nde cherenóita ha che apuʼã jeýta. Nde katuete rehechagaʼu ha rehechaseterei jeýta upe ne rembiapokuemi”. Job oikuaa porã vaʼekue Jehová ohaʼarõitereimaha og̃uahẽ pe día omoingove jey hag̃ua umi omano vaʼekuépe (Job 14:13-15, TNM).

 15 ¿Revyʼápa reikuaávo Jehová omoingove jeytaha umi omano vaʼekuépe? Ikatu oime reñeporandu hína: “¿Mbaʼépa oikóta umi che hénte ha che amígo omano vaʼekuégui? ¿Oñemoingove jeýtapa avei chupekuéra?”. Tuichaiterei ñanekonsola jaikuaávo Jehová añetehápe omoingovese jeyha umi omano vaʼekuépe. La Biblia omombeʼu ñandéve mbaʼeichagua persónapepa oñemoingove jeýta ha moõpa oikóta hikuái.

UMI OMANO VAʼEKUE OHENDÚTA IÑEʼẼ HA OSẼTA

16. ¿Mbaʼépa ikatu ohupyty umi oikove jeýva ha mbaʼéichatapa ko múndo upérõ g̃uarã?

16 Yma, umi orresusitáva oiko jey vaʼekue ko yvy ape ári ihénte ha iñamigokuéra apytépe. Péicha avei oikóta umi oñemoingove jeýtava amo gotyove, péro haʼekuéra orekótama oportunida oikovévo pára siémpre. Haʼekuéra oikove jey vove, ko múndope ndaiporimoʼãvéima gérra, mbaʼasy ni hénte ojapóva mbaʼe vai.

17. ¿Mbaʼeichagua persónapepa oñemoingove jeýta?

17 ¿Mbaʼeichagua persónapepa oñemoingove jeýta? Jesús heʼi vaʼekue “opavave umi oĩva pe sepultúrape ohendutaha iñeʼẽ ha osẽta” (Juan 5:28, 29). Ha Apocalipsis 20:13 heʼi: “Pe mar omeʼẽ umi omanóva oĩva ipype, ha pe ñemano ha pe Sepultúra omeʼẽ umi omanóva oĩva ipypekuéra”. Jahechaháicha, hetaiterei persónape oñemoingove jeýta. Apóstol Pablo heʼi vaʼekue avei oñemoingove jeytaha umi persóna hekojojáva ha hekojojaʼỹvape (elee Hechos 24:15). ¿Mbaʼépa heʼise upéva?

Jesús omoingove jeýta umi ñane hénte ha ñane amigokuéra omano vaʼekuépe ha jahecha jeýta chupekuéra

18. ¿Máva mávapa hína “umi hekojojáva” oikove jeýtava?

18 “Umi hekojojáva” oikove jeýtava apytépe oĩ hína Jehová siervokuéra yma guare. Por ehémplo umi oiko vaʼekue Jesús ou mboyve ko yvy ape ári. Umíva apytépe  oĩ Noé, Abrahán, Sara, Moisés, Rut, Ester ha hetave persóna. Chupekuéra oñemoingove jeýta oiko hag̃ua ko yvy ape ári. Reikuaave hag̃ua koʼã persónape, ikatu relee la Bíbliape Hebreos kapítulo 11. ¿Péro mbaʼépa oikóta Jehová siervokuéra omanóvagui koʼág̃arupi? Haʼekuéra oĩ avei “umi hekojojáva” apytépe ha katuete oñemoingove jeýta chupekuéra.

19. ¿Máva mávapa hína “umi hekojojaʼỹva” oikove jeýtava, ha mbaʼe oportunidápa omeʼẽta chupekuéra Jehová?

 19 Umi “hekojojaʼỹva” oikove jeýtava haʼe hína umi persóna ndoikuaajepéi vaʼekue Jehovápe. Haʼekuéra omanóramo jepe, Jehová ndahesaráiri chuguikuéra. Haʼe omoingove jeýta umívape ha omeʼẽta chupekuéra oportunida oikuaa ha oservi hag̃ua chupe.

20. ¿Oñemoingove jeýtapa enterove umi omano vaʼekuépe?

20 ¿Upéicharõ piko oñemoingove jeýta enterove umi omano vaʼekuépe? Nahániri. Jesús heʼi vaʼekue naentéroi umi omano vaʼekue oikove jeytaha (Lucas 12:5). ¿Mávapa odesidíta mávapepa oñemoingove jeýta? Jehová, pe Hués tuichavéva, omeʼẽ Jesúspe autorida “ohusga hag̃ua oikovéva ha omanóvape” (Hechos 10:42). Umi persóna nokambiaséiva ha Jesús heʼíva iñañaha, ndorresusitamoʼãi (ehecha nóta 19).

UMI OÑEMOINGOVE JEÝVA OIKO HAG̃UA YVÁGAPE

21, 22. a) ¿Mbaʼeichagua kuérpopa orekóta umi oñemoingove jeýva oiko hag̃ua yvágape? b) ¿Mávape raẽpa oñemoingove jey vaʼekue oiko hag̃ua yvágape?

21 La Biblia heʼi oĩtaha oñemoingove jeýva oiko hag̃ua yvágape. Péro umi orresusitáva oho hag̃ua yvágape ndorekomoʼãi peteĩ kuérpo ñande yvypóra jarekovaichagua, síno orekóta peteĩ kuérpo espirituál.

22 Jesúspe raẽvete ningo oñemoingove jey vaʼekue péicha (Juan 3:13). Tres día Jesús omano haguépe, Jehová omoingove jey kuri chupe (Salmo 16:10; Hechos 13:34, 35). Jesús ndorresusitavéima kuri peteĩ yvypóraicha. Apóstol Pedro heʼi Jesús omano hague yvypóraicha, péro oikove jeyha espírituicha (1 Pedro 3:18). Péicha  Jesúsgui oiko jey peteĩ ánhel ipoderosoitereíva (1 Corintios 15:3-6). Péro la Biblia heʼi ndahaʼemoʼãiha Jesús añónte la ohótava kuri yvágape.

23, 24. ¿Mávapa hína umi “ovechakuéra mbovymi” oñeʼẽha Jesús, ha mboýpa oĩ hikuái?

23 Omano mboyvemi, Jesús heʼi ijapostolkuéra iñeʼẽrendúvape: “Aháta aprepara pene rendag̃ua” (Juan 14:2). Upéva heʼise oĩtaha idisípulo oñemoingove jeýtava oiko hag̃ua hendive yvágape. ¿Mboýpa oĩ la ohótava yvágape? Jesús oñeʼẽvo hesekuéra heʼi: “Che ovechakuéra mbovymi”. Upéva heʼise saʼitaha la ohótava (Lucas 12:32). Apóstol Juan omombeʼu porã mboýpa la ohótava yvágape heʼírõ guare ohechaha Jesúspe oñemboʼyha yvágape pe Sérro Sión ári, ha hendive oĩha 144.000 (Apocalipsis 14:1).

24 ¿Arakaʼépa oñemoingove jeýta umi 144.000-pe? La Biblia heʼi oñemoingove jeytaha chupekuéra Jesús oñepyrũ rire ogoverna yvágape (1 Corintios 15:23). Ha koʼág̃a Jesús ogovernáma, upéicha rupi umi omanóma vaʼekue umi 144.000 apytégui, oñemoingove jeýma ha oikóma hikuái yvágape. Ñane tiémpope, umi ohótava yvágape, omanóre voi oñemoingove jeýma chupekuéra yvágape. Péro hetaitereive persónape oñemoingove jeýta oiko hag̃ua ko yvy ape ári peteĩ hardín iporãitereívape.

25. ¿Mbaʼépa jahecháta kapítulo 8-pe?

25 Koʼẽrõitéma Jehová ñandepeʼaitéta ñemano poguýgui ha ndaiporimoʼãvéima omanóva (elee Apocalipsis 21:4). ¿Ha mbaʼépa ojapóta umi oñemoingove jeýva yvágape? La Biblia omombeʼu ñandéve ogovernataha hikuái Jesús ndive Ñandejára Rréino. Kapítulo 8-pe oñeñeʼẽvéta upe goviérnore.

^ párr. 9 La Biblia omombeʼu oñemoingove jey hague hetave persónape. Umíva apytépe oĩ vaʼekue mitã, kakuaa, kuña, kuimbaʼe, isrraelíta ha extranhéro. Nde ikatu relee umi istória koʼã téxtope: 1 Reyes 17:17-24; 2 Reyes 4:32-37; 13:20, 21; Mateo 28:5-7; Lucas 7:11-17; 8:40-56; Hechos 9:36-42; 20:7-12.