Ehecha oĩva pype

Ehecha menú secundario

Ehecha oĩva pype

Testígo de Jehová

guarani

¿Mbaʼépa ñanemboʼe la Biblia?

 KAPÍTULO 9

Ko múndo aña oñehundipotaitéma

Ko múndo aña oñehundipotaitéma

1. ¿Mbaʼéichapa ikatu jaikuaa mbaʼépa oikóta amo gotyove?

REHECHA térã rehendu jave umi notísia oiméne ere jepi: “¿Mbaʼéiko oikopáta ñandehegui la péichante jahárõ hese?”. Hetaiterei mbaʼe vai ningo oiko, upévare la hénte opensa hiʼag̃uimbaitemaha pe fin del múndo. Péro, ¿ikatúne piko jaikuaa mbaʼépa oikóta ñandehegui? ¿Oñehundítapa añetehápe ko múndo? Yvyporakuéra ningo ndaikatúi oikuaa mbaʼépa oikóta amo gotyove, péro Jehová si oikuaa. La Bíbliape haʼe omombeʼu ñandéve mbaʼépa oikóta ñandehegui ha ko múndogui (Isaías 46:10; Santiago 4:14).

2, 3. ¿Mbaʼépa oporandu Jesúspe ijapostolkuéra, ha mbaʼépa haʼe heʼi chupekuéra?

2 La Biblia oñeʼẽ jave fin del múndore, ndeʼiséi hína ko yvy oñehunditaha síno umi hénte aña la oñehundítava. Jesús omboʼe vaʼekue la héntepe Ñandejára Rréino ogovernataha ko yvy (Lucas 4:43). Umi apóstol oikuaase vaʼekue arakaʼetépa oñepyrũta ogoverna Ñandejára Rréino, ha oporandu hikuái Jesúspe: “¿Arakaʼépa oikóta koʼã mbaʼe? ¿Ha mbaʼépa oikóta ropilla hag̃ua nde reimemaha, ha ko múndo ára pahaite oñemoag̃uimaha?” (Mateo 24:3). Jesús ndeʼíri chupekuéra arakaʼetépa oikóta upéva, péro omombeʼu chupekuéra mbaʼépa oikóta oñehundipotaite vove umi hénte añáme. Umi mbaʼe Jesús heʼi vaʼekue oikotaha oñekumplipaitéma ohóvo koʼág̃a.

3 Ko kapítulope jahecháta mbaʼérepa jaʼekuaa oñehundipotaitemaha ko múndo aña. Péro primero ñañeʼẽmíta peteĩ gérra oiko vaʼekuére yvágape, upéva ñanepytyvõta  ñantende hag̃ua mbaʼérepa oiko hetaite mbaʼe vai ko múndope.

YVÁGAPE OIKO PETEĨ GÉRRA

4, 5. a) ¿Mbaʼépa oiko yvágape Jesúsgui oiko riremi rréi? b) Heʼiháicha Apocalipsis 12:12, ¿mbaʼépa oiko Satanás ou rire ko yvy ape ári?

4 Kapítulo 8-pe jahecha kuri áño 1914-pe oiko hague Jesúsgui rréi (Daniel 7:13, 14). Ha la Biblia omombeʼu ñandéve mbaʼépa oiko upe rire. Lívro de Apocalípsispe heʼi: “Miguel [térã Jesús] ha hiʼanhelkuéra oñorairõ pe dragón kóntrape, ha pe dragón ha hiʼanhelkuéra oñorairõ ikontrapekuéra”. * Satanás ha idemoniokuéra operde pe gérra ha oñemosẽ chupekuéra yvágagui ha ou hikuái ko yvy ape ári. ¡Eñeimahinamína mbaʼeichaitépa oiméne ovyʼa umi ánhel oikórõ guare upéva! Péro, ¿mbaʼépa oiko upe rire ko yvy ape ári? La Biblia omombeʼu Satanás ha idemoniokuéra ou guive ko yvy ape ári oĩha hetave provléma ha ojejapoha hetave mbaʼe vai. Satanás ipochyeterei hína “oikuaágui mbykypaitemaha itiémpo” (Apocalipsis 12:7, 9, 12).

5 Satanás ojapo hína heta mbaʼe vai ko yvy ape ári. Haʼe ipochyeterei pórke Ñandejára koʼẽrõitéma nopermitimoʼãvéi chupe ojapo upéva. Jahechamína mbaʼépa heʼi vaʼekue Jesús oikotaha koʼã ára pahápe (ehecha nóta 24).

¿MBAʼÉPA OIKÓTA OÑEHUNDIPOTAITE VOVE KO MÚNDO AÑA?

6, 7. Jesús heʼi vaʼekue oikotaha gérra ha oĩtaha ñembyahýi, ¿mbaʼéichapa oñekumpli hína upéva?

6 Gérra. Jesús heʼi vaʼekue: “Peteĩ tetã opuʼãta ótro tetãre, ha umi goviérno opuʼãta ojuehe” (Mateo 24:7).  Ñane tiémpope hetaitereive hénte omano umi gérra káusare. Peteĩ organisasión ostudiáva umi mbaʼe oikóva ko múndope heʼi 1914 guive mas de 100 millón de persóna omano hague umi gérra káusare. Áño 1900 mboyve omano kuri hetaiterei hénte umi gérra káusare, péro umi 100 áño ohasa vaʼekuépente, pe áño 1900 guive 2000 peve, hetaitereive oñemano. Ajépa hetaitéma ojesufri ha ojehasa asy umi gérra káusare.

7 Ñembyahýi. Jesús heʼi vaʼekue: “Oĩta ñembyahýi” (Mateo 24:7). Koʼág̃arupi ningo hetaitereive hiʼupy oĩ opárupi, upéicharõ jepe heta oĩ ndorekóiva hoʼu vaʼerã. ¿Mbaʼérepa? Pórke ndorekói pláta ojogua hag̃ua ni yvy oñemitỹ hag̃ua. Hetaiterei oĩ ndohupytýiva hemikotevẽ káda día g̃uarã. Pe Organización Mundial de la Salud heʼi káda áño hetaiterei mitã hasyha ndokaruporãigui ha upévare omano.

8, 9. Jesús heʼi vaʼekue oikotaha terremóto ha oĩtaha heta mbaʼasy, ¿mbaʼérepa ikatu jaʼe oñekumplimaha koʼã mbaʼe?

8 Terremóto. Jesús heʼi vaʼekue: “Oikóta umi yvyryrýi tuicháva” (Lucas 21:11). Káda áño hetaiterei  terremóto oiko. Áño 1900 guive mas de 2 millón de persónama omano upéva káusare. Koʼág̃a oĩramo jepe umi mákina opilláva oikóta jave umi yvyryrýi, lomímonte hetaiterei jey oñemano.

9 Mbaʼasy. Jesús heʼi vaʼekue avei: “Ápe ha pépe isarambíta mbaʼasy” (Lucas 21:11). Ha upeichaite oiko, oĩ heta mbaʼasy pyaʼeterei oñekontahiáva ha ñandejuka. Umi doktór oikuaáramo jepe mbaʼéichapa oñepohanóta heta mbaʼasy, oĩ gueteri mbaʼasy naipohãiva. Peteĩ estúdio ojejapo vaʼekue heʼi káda áño hetaiterei hénte omanoha mbaʼasýgui. Por ehémplo, hetaitereípema ojuka pe mbaʼasypoʼi, kólera ha malária. Ha ndahaʼéi umívante la oĩva, umi cuarenta áño ohasa vaʼekuépe umi doktór odeskuvri 30 mbaʼasy pyahu ha umíva apytégui oĩ naipohãiva gueteri koʼág̃a peve.

¿MBAʼÉICHAPA OÑEKOMPORTA LA HÉNTE KOʼÁG̃ARUPI?

10. ¿Mbaʼéichapa oñekumpli koʼág̃a 2 Timoteo 3:1-5 heʼíva?

10 La Bíbliape, 2 Timoteo 3:1-5-pe heʼi: “Umi ára pahápe pe  situasión ijetuʼúta ha hasýta jagueropuʼaka hag̃ua”. Apóstol Pablo omombeʼu mbaʼéichapa oñekomportáta la hénte koʼã ára pahápe. Haʼe heʼi:

  • umi hénte ijehénte ojepyʼapýta

  • iplatarayhúta

  • naiñeʼẽrendumoʼãi ituakuérape

  • oporombotavýta

  • ndohayhumoʼãi ihéntepe

  • ndojejokokuaamoʼãi

  • oñemboharáita hapicháre

  • oikóta vyʼarã rapykuéri ohayhu rangue Ñandejárape

  • heʼíta guaʼu ohayhuha Ñandejárape, péro umi mbaʼe ojapóvare ndojekuaamoʼãi upéva

11. Ohechaukaháicha Salmo 92:7, ¿mbaʼépa oikóta umi hénte iñañávagui?

11 ¿Oñekumplípa avei nde reikohápe 2 Timoteo 3:1-5 heʼíva? Opárupi jahechakuaa oñekumpliha upéva. Péro Ñandejára koʼẽrõitéma oipeʼapáta umi mbaʼe vai oikóva. Haʼe heʼi voi: “Rehecha vove umi iñañávape oho porãitereiha ha hetaveha hikuái umi ñanáicha, upéva  heʼise oñehundipotaitemaha pára siémpre” (Salmo 92:7, TNM).

UMI MBAʼE PORÃ OJEJAPÓVA HÍNA KOʼÁG̃ARUPI

12, 13. ¿Mbaʼépa ñanemboʼe Jehová koʼã ára pahápe?

12 La Biblia heʼíma vaʼekue voi koʼã ára pahápe oĩtaha heta sufrimiénto ha oikotaha heta mbaʼe vai. Péro heʼi avei oikotaha heta mbaʼe iporãva.

“Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári.” (Mateo 24:14)

13 Oñentende porãve la Biblia. Proféta Daniel oñeʼẽrõ guare koʼã ára paháre, heʼi vaʼekue ko tiémpope oñentende porãvetaha heta mbaʼe (Daniel 12:4). Jehová siémpre oipytyvõ isiervokuérape ontende porãve hag̃ua heta mbaʼe oĩva Iñeʼẽme ha koʼýte ojapo upéva áño 1914 guive. Por ehémplo, ñanemboʼe mbaʼérepa iñimportánte jaikuaa héra, mbaʼépa oipota ñandéve g̃uarã, mbaʼéichapa Jesús sakrifísio rupive ikatúta jajei pekádo ha ñemano poguýgui, mbaʼépa oiko umi omano vaʼekuégui, oñemoingove jeytaha umi omano vaʼekuépe, ha Ñandejára goviérno añoite osolusionataha umi provléma oĩva ko múndope. Jahecháma avei kuri mbaʼépa jajapo vaʼerã javyʼa hag̃ua ha mbaʼépa jajapo vaʼerã Ñandejára ñandeguerohory hag̃ua. Péro ¿mbaʼépa ojapo Ñandejára siervokuéra umi mbaʼe oaprendévagui? Oĩ ótra profesía ohechaukáva upéva (ehecha nóta 21 ha nóta 25).

14. ¿Moõ moõpa ojepredika umi notísia porã oñeʼẽva Ñandejára Rréinore, ha mávapa hína umi ojapóva upéva?

14 Ojepredika opárupi. Jesús oñeʼẽrõ guare umi ára paháre, heʼi vaʼekue: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári” (Mateo 24:3, 14). Umi notísia porã oñeʼẽva Ñandejára Rréinore ojepredika hína mas de 230 paíspe ha mas de 700 idiómape. Oparupiete umi testígo de Jehová oipytyvõ hína  la héntepe ontende hag̃ua mbaʼépa Ñandejára Rréino ha mbaʼépa ojapóta yvyporakuéra rehehápe (Apocalipsis 7:9). Haʼekuéra ndokovrái mbaʼevete la héntepe. Oĩramo jepe ndochaʼéiva hesekuéra opredika haguére, avave ndojokói chupekuéra osegi hag̃ua opredika Jesús heʼi haguéicha (Lucas 21:17).

MBAʼÉPA NDE REJAPÓTA

15. a) ¿Ndépa rekree koʼẽrõitéma oñehunditaha umi hénte iñaña ha ojapóvape mbaʼe vai? b) ¿Mbaʼépa oikóta umi naiñeʼẽrendúivagui Jehovápe ha mbaʼépa ohupytýta umi iñeʼẽrendúva?

15 ¿Ndépa rekree koʼẽrõitéma oñehunditaha umi hénte iñaña ha ojapóvape mbaʼe vai? Heta profesía oñeʼẽva umi ára paháre oñekumplipáma ohóvo. Koʼẽrõitéma Jehová heʼíta anivéma hag̃ua ojepredika umi notísia porã ha upéi “og̃uahẽta pe ára pahaite” térã pe fin (Mateo 24:14). ¿Mbaʼépa hína pe fin? Upéva hína pe Armagedón. Armagedónpe Ñandejára ohundipaitéta umi hénte iñaña ha ojapóvape mbaʼe vai. Jehová omboúta Jesús ha umi ánhel ipoderosoitévape ohundi hag̃ua entéro umi naiñeʼẽrendúivape chupe ha Itaʼýrape (2 Tesalonicenses 1:6-9). Upe rire Satanás ha idemoniokuéra ndaikatumoʼãvéima ombotavy la héntepe. Enterove iñeʼẽrendúva Jehovápe ha oñemoĩva igoviérno poguýpe, ohecháta mbaʼéichapa Ñandejára okumplipaite umi mbaʼe porã oprometéva (Apocalipsis 20:1-3; 21:3-5).

16. ¿Mbaʼépa tekotevẽ rejapo pe fin hiʼag̃uimbaitéma rupi?

16 Umi hénte aña ha opa mbaʼe oĩva Satanás poguýpe oñehundipotaitéma. Upévare iñimportánte reñeporandumi: “¿Mbaʼépa tekotevẽ ajapo?”. Jehová ningo oipota nde reaprende opa ikatúva la Bíbliagui. Upévare tekotevẽ rejagarra en sério la nde estúdio (Juan 17:3).  Káda semána testígo de Jehová ojapo umi rreunión oipytyvõva la héntepe ontende hag̃ua la Biblia. Eñehaʼãkena eho meme umi rreunionhápe (elee Hebreos 10:24, 25). Rehechakuaáramo tekotevẽha rekambia algúna kósape, ani rekyhyje rekambia hag̃ua. Rejapóramo upéicha, katuete reñemoag̃uivéta Jehováre (Santiago 4:8).

17. ¿Mbaʼéicha rupípa pe fin ojagarráta de sorpresaite umi héntepe?

17 Apóstol Pablo heʼi pe fin outaha “peteĩ mondaháicha” umi hénte ohaʼarõʼỹve jave (1 Tesalonicenses 5:2). Jesús oprofetisa vaʼekue umi hénte ohechakuaáramo jepe ñaimemaha umi ára pahápe, nopenamoʼãiha upévare. Jesús heʼi: “Oiko haguéicha Noé tiémpope, upéichata avei pe Yvypóra Raʼy oĩ vove. Upe tiémpope, pe ama guasu mboyve umi hénte okaru ha omboyʼu; kuimbaʼe ha kuñanguéra omendajoa, Noé oike peve pe árkape. Haʼekuéra nopenái mbaʼevére ha upéi ou pe ama guasu ha ohundipaite chupekuéra” (Mateo 24:37-39).

18. ¿Mbaʼépa heʼi porã ñandéve Jesús?

18 Jesús heʼi porã ñandéve: “Peñatendéke ani hag̃ua arakaʼeve peñekevranta peikógui pekarurasa, pemokõrasa térã pejepyʼapyetereígui pene remikotevẽre”. Haʼe heʼi pe fin ñandejagarrataha “peteĩ lásoicha” ñahaʼarõʼỹve jave. Upévare heʼi: “Peñatende porãke peikóvo, ha opa árape pejerure asy Ñandejárape tapenepytyvõ pekañy hag̃ua opa koʼã mbaʼe ojeʼe vaʼekuégui oikotaha, ikatu hag̃uáicha peñemboʼy pe Yvypóra Raʼy renondépe” (Lucas 21:34-36). ¿Mbaʼérepa iñimportánte jajapo Jesús heʼi vaʼekue? Pórke koʼẽrõitéma oñehundíta umi hénte aña ha opa mbaʼe oĩva Satanás poguýpe. Umi persóna Jehová ha Jesús oguerohorýva añoite ojesalváta ou vove pe fin, ha oikovéta opa árare Ñandejára goviérno poguýpe (Juan 3:16; 2 Pedro 3:13).

^ párr. 4 Jesucrístope oñehenói avei Miguel. Ehecha nóta 23.