Ehecha oĩva pype

Ehecha menú secundario

Ehecha oĩva pype

Testígo de Jehová

guarani

¿Mbaʼépa ñanemboʼe la Biblia?

 KAPÍTULO 11

¿Mbaʼérepa Ñandejára oheja oiko hetaite mbaʼe vai?

¿Mbaʼérepa Ñandejára oheja oiko hetaite mbaʼe vai?

1, 2. ¿Mbaʼépa oikuaase jepi heta hénte?

KÁDA día oiko hetaiterei mbaʼe vai ko múndope. Por ehémplo, pyʼỹi ñahendu koʼãichagua notísia: umi torménta ha ama guasu ojapo sarambi heta hendápe, peteĩ kuimbaʼe oike peteĩ tupaópe, ojapi ha ojuka heta héntepe. Peteĩ kuñakarai omano kánsergui ha cinco mitã opyta tyreʼỹ.

2 Ohechávo koʼã mbaʼe, heta hénte oikuaase mbaʼérepa oiko hetaite mbaʼe vai ha mbaʼérepa la hénte peichaite peve iñaña. ¿Ndépa reikuaase avei upéva?

3, 4. a) ¿Mbaʼépa Habacuc oporandu vaʼekue Jehovápe? b) ¿Mbaʼépa orresponde chupe Jehová?

3 La Biblia omombeʼu umi persóna ojerovia mbaretéva Ñandejárare oikuaase hague avei upéva. Por ehémplo, proféta Habacuc oporandu vaʼekue Jehovápe: “¿Mbaʼéreiko repermiti ahecha umi mbaʼe vaiete oikóva? ¿Mbaʼéreiko reheja péicha rohasa asy? ¿Mbaʼére piko oĩ heta violénsia ha oiko sarambi opárupi? ¿Mbaʼéreiko umi hénte oiko vaipa ha opuʼãmba ojuehe?” (Habacuc 1:3, TNM).

4 Habacuc 2:2 ha 3 omombeʼu mbaʼéichapa Ñandejára orresponde Habacúcpe umi mbaʼe oporandu vaʼekue. Upépe heʼi Ñandejára oprometeha chupe osolusionambaitetaha umi mbaʼe vai oikóva. Jehová ningo ñanderayhueterei. La Biblia heʼi voi haʼe ojepyʼapyha ñanderehe (1 Pedro 5:7). Jehovápe ningo hasy asy avei ohechávo mbaʼéichapa jasufri (Isaías 55:8, 9). ¿Mbaʼérepa upéicharõ  oheja oiko hetaite mbaʼe vai ko múndope? Jahechamína mbaʼépa heʼi la Biblia.

¿MBAʼÉREPA OĨ HETAITE SUFRIMIÉNTO?

5. ¿Mbaʼépa heʼi la héntepe umi rrelihión omoakãva, ha mbaʼépa heʼi la Biblia?

5 Heta rrelihión omoakãva heʼi la héntepe umi mbaʼe vai oikóva haʼeha Ñandejára volunta. Algúno heʼi opa mbaʼe oikóva ñanderehe, tahaʼe umi mbaʼe ivaivéva jepe, oikoha Ñandejára oipotáguinte ha hasyha ñantende hag̃ua mbaʼérepa haʼe oheja oiko umíva. Oĩ jave omanóva, tahaʼe mitã térã kakuaa, oĩ heʼíva Ñandejára oguerahaha chupekuéra yvágape. Péro japu umíva. Jehová arakaʼeve ndojapói ni ndojapomoʼãi mbaʼeve ivaíva. La Biblia heʼi voi: “Ni mbaʼevéicharõ Ñandejára ndojapomoʼãi ivaíva, Ñandejára Todopoderóso ndaikatúi hembiapo vai” (Job 34:10, TNM).

6. ¿Mbaʼérepa heta hénte okulpa Ñandejárape umi mbaʼe vai oikóvare ko múndope?

6 Heta hénte opensa Ñandejára ogovernaha ko múndo ha upévare okulpa chupe umi mbaʼe vai oikóvare. Péro kapítulo 3-pe ñaaprende kuri Satanás ogovernaha ko múndo.

7, 8. ¿Mbaʼérepa oĩ hetaite sufrimiénto ko múndope?

7 ¿Mbaʼérepa oĩ hetaite sufrimiénto ko múndope? Primero, pórke heʼiháicha la Biblia, “ko múndo kompletoite oĩ pe aña poguýpe” (1 Juan 5:19). Ko múndo ruvicha ningo iñaña ha ipyʼahatãiterei. Haʼe ombotavy hína ko múndo kompletoitépe (Apocalipsis 12:9). Ha heta hénte ojapo Satanás oipotáva. Upéicha rupi ko múndope henyhẽte umi hénte ijapu, iñaña ha ipyʼahatãva.

8 Segundo, pe pekádo káusare. Adán ha Eva ningo tuichaiterei opeka odesovedesérõ guare Ñandejárape ha upévare ñande ñanaséma avei pekadór. Ha pe pekádo  káusare yvyporakuéra ombohasa asy avei ótrope. Hetaiterei hénte oñembotuicha ha opensa voi iñimportanteveha ótrogui. Upéicha rupi oĩ oiko vaíva, oñorairõva ha oapoʼíva ótrope (Eclesiastés 4:1; 8:9). Tercero, sapyʼánte “oiko umi mbaʼe ñahaʼarõʼỹva” (Eclesiastés 9:11, TNM). Sapyʼánte oikónte umi aksidénte térã ótra kósa ivaitereíva ha hústo ñande ñaime upépe ha ñanderupyty avei.

9. ¿Mbaʼépa omombeʼu ñandéve Jehová ha mbaʼérepa?

9 Ndahaʼéi ningo Jehová pe ombohasa asýva la héntepe. Ndaikatúi jaʼe ikúlpare oikoha umi gérra, oĩha heta mondaha ha hénte oporomaltratáva. Ndahaʼéi avei Ñandejára la omboúva umi ama guasu, yvytu atã ha yvyryrýi. Péro ikatu oime reñeporandu: “Oiméramo Jehová haʼe pe ipoderosovéva ko univérsope, ¿mbaʼépa ohaʼarõ osolusionáma hag̃ua umi mbaʼe vaiete oikóva ko múndope?”. Jehová ningo ñanderayhueterei ha oñeinteresa ñanderehe, upévare omombeʼu porã ñandéve mbaʼérepa opermiti koʼág̃a peve jasufri (1 Juan 4:8).

¿MBAʼÉREPA ÑANDEJÁRA OHEJA JASUFRI?

10. ¿Mbaʼépa Satanás heʼi Jehováre?

10 Hardín de Edénpe, Satanás ijapu kuri Adán ha Évape. Satanás heʼi Ñandejára nogovernaporãiha ha omokañyha heta mbaʼe iporãva Adán ha Évagui. Satanás oipota haʼekuéra opensa haʼe ogoverna porãvetaha chupekuéra Jehovágui ha noikotevẽiha voi hikuái Ñandejárare (Génesis 3:2-5; ehecha nóta 27).

11. ¿Mbaʼe pregúntapa tekotevẽ ñambohovái?

11 Adán ha Eva odesovedese Jehovápe ha oñemoĩ ikóntrape. Haʼekuéra opensa ikatuha odesidi ijeheguínte mbaʼépa oĩ porã ha mbaʼépa oĩ vai. ¿Mbaʼéichapa Jehová ohechaukáta tuichaiterei ojavyha umi opuʼãva hese, ha haʼe añoite oikuaaha mbaʼépa iporãve ñandéve g̃uarã?

12, 13. a) ¿Mbaʼérepa Jehová nohundíri kuri upepete voi Adán ha Évape? b) ¿Mbaʼérepa Jehová oheja Satanáspe ha yvyporakuérape ogoverna?

 12 Jehová nohundíri kuri upepete voi Adán ha Évape naiñeʼẽrendúi haguére chupe, síno oheja ifamília raẽ hikuái. Upéi Jehová omeʼẽ oportunida Adán familiakuérape odesidi hag̃ua ohejátapa haʼe ogoverna chupekuéra. Jehová oipota kuri ko yvy henyhẽ yvypóra perféktogui ha haʼe okumplíta upéva Satanás oñemoĩramo jepe hese (Génesis 1:28; Isaías 55:10, 11).

13 Satanás oñeʼẽ vai kuri Jehováre hetaiterei ánhel renondépe (Job 38:7; Daniel 7:10). Upévare Jehová omeʼẽ tiémpo Satanáspe ohechauka hag̃ua siértopa la heʼi vaʼekue hese. Jehová oheja avei yvyporakuérape ogoverna Satanás poguýpe ohecha hag̃ua hikuái añetehápepa oiko porãvéta heseʼỹ.

14. ¿Mbaʼépa jahechakuaa yvyporakuéra goviérnore?

14 Heta tiémporema yvyporakuéra ogoverna, péro ni peteĩ goviérno nosẽporãi. Ojekuaa porãiterei Satanás ijapu hague. Ñande ningo ñaikotevẽ Ñandejárare. Proféta Jeremías heʼi vaʼekue voi: “Jehová, che aikuaa porã yvyporakuéra ndorekoiha autorida ogoverna hag̃ua. Avave ningo ndaikatúi ni un páso oho ijehegui rei” (Jeremías 10:23, TNM).

¿MBAʼÉREPA JEHOVÁ OPERMITI HETAITE TIÉMPOREMA JASUFRI?

15, 16. a) ¿Mbaʼérepa Jehová opermiti hetaite tiémpoma jasufri? b) ¿Mbaʼérepa Jehová nosolusionái umi provléma oĩva Satanás goviérno poguýpe?

15 ¿Mbaʼérepa Jehová opermiti hetaite tiémporema jasufri? ¿Mbaʼére piko nosolusionáima umi mbaʼe vai oikóva? Haʼe oheja ohasa pe tiémpo ohechauka hag̃ua Satanás goviérno arakaʼeve nosẽporãmoʼãiha. Yvyporakuéra ningo otanteáma opaichagua goviérno, péro ni  peteĩva nosẽporãi. Ojapo ha odeskuvríramo jepe hikuái heta mbaʼe ideprovéchova, káda día oiko hetave mbaʼe vai. Por ehémplo, hetave oĩ violénsia, inhustísia, gérra, ha povrésa. Koʼã mbaʼe ohechauka porãiterei yvyporakuéra ndaikatuiha ogoverna porã Ñandejára reheʼỹ.

16 Jehová nosolusionái umi provléma oĩva Satanás goviérno poguýpe, pórke ojapóramo upéva haʼetéta oipytyvõva hína Satanáspe ogoverna porã hag̃ua. Yvyporakuéra ikatu avei opensa haʼekuérante ikatuha ogoverna ha noikotevẽiha Ñandejárare. Péro upéva ningo japu ha Jehovápe ndogustaiete upéva. Haʼe arakaʼeve voi ndaijapúiva (Hebreos 6:18).

17, 18. ¿Mbaʼéichapa Jehová osolusionáta umi mbaʼe vai ojapóva Satanás?

17 ¿Ikatúpa Jehová osolusiona umi provléma oĩva ko múndope Satanás ha yvyporakuéra káusare? Si ikatu. Ndaipóri ningo mbaʼeve Jehová ikatuʼỹva ojapo. Haʼe opermitíta oiko umi mbaʼe vai ojekuaa porã meve japu hague opa mbaʼe Satanás heʼi vaʼekue. Upéi Jehová ojapóta ko yvýgui peteĩ hardín iporãitereíva oipota haguéicha voi ymaite guive. Upépe “opavave umi oĩva pe sepultúrape” oñemoingove jeýta (Juan 5:28, 29). Ndaiporimoʼãvéima avei mbaʼeveichagua mbaʼasy, ni omanóva. Jesús osolusionambaitéta opa mbaʼe vai jahasáva Satanás káusare. Jehová oipurúta Jesúspe “ohundi hag̃ua pe Aña rembiapokue” (1 Juan 3:8). Jaagradese vaʼerã Jehovápe ipasiensiaite haguére ñanderehe ha omeʼẽ haguére ñandéve tiémpo jaikuaa hag̃ua chupe ha jaapoja hag̃ua Igoviérno (elee 2 Pedro 3:9, 10). Koʼág̃ama voi, jahasa jave peteĩ mbaʼe ijetuʼúva, Jehová ñanepytyvõ jagueropuʼaka hag̃ua (Juan 4:23; elee 1 Corintios 10:13).

18 Jehová ningo nañandeovligái jaapoja hag̃ua Igoviérno. Haʼe omeʼẽ ñandéve liverta jadesidi hag̃ua mbaʼépa jajapóta.  Jahechamína mbaʼéichapa jaipuru vaʼerã pe liverta haʼe omeʼẽva ñandéve.

¿MBAʼÉICHAPA REIPURÚTA PE LIVERTA JEHOVÁ OMEʼẼVA NDÉVE?

19. ¿Mbaʼépepa ñanediferénte umi animálgui, ha mbaʼérepa jaagradese vaʼerã Jehovápe ñandeapo haguére péicha?

19 Jehová ñandeapo vaʼekue diferentete umi animálgui. Umi animál ningo ndoikuaái mbaʼépa oĩ porã ni mbaʼépa oĩ vai (Proverbios 30:24-28). Ñande katu jareko pe liverta jaiporavo hag̃ua mbaʼépa jajapóta. Ñandete ikatu jadesidi jajapótapa Jehová oipotáva térãpa nahániri. Jehová nañandeapói peteĩ rrovóicha. Ñandete ikatu jadesidi mbaʼeichagua persónapa jaipota oiko ñandehegui, ikatu jaiporavo ñane amigorã ha mbaʼépa jajapóta ñande rekovégui. Jehová ningo oipota javyʼa.

20, 21. ¿Mbaʼépa redesidi vaʼerã?

20 Jehová oipota jahayhu chupe (Mateo 22:37, 38). Umi túa ningo ovyʼaiterei ifamília heʼíramo ohayhuha chupe ipyʼaite guive, ha Jehová upeichaiténte avei. Haʼe ndoipotái jaservi chupe por ovligasión, upévare omeʼẽ ñandéve liverta jadesidi hag̃ua jaservítapa chupe térãpa nahániri. Satanás, Adán ha Eva odesidi omboyke Jehovápe. Ha nde, ¿mbaʼéichapa reipurúta pe liverta Jehová omeʼẽva ndéve?

21 Iporãitereíta ningo redesidíramo reservi Jehovápe. Hetaiterei persóna odesidíma ojapo Jehová oipotáva ha omboyke Satanáspe (Proverbios 27:11). Koʼẽrõitéma ningo Jehová ogovernáta ha oipeʼaitéta opa mbaʼe ñanembosufríva. ¿Mbaʼépa rejapo vaʼerã reime hag̃ua Jehová goviérno poguýpe? Kapítulo 12-pe oñerrespondéta ko pregúnta.