Michĩete guive Samuel oiko tavernákulope ha ombaʼapo upépe. Upe lugárpe umi hénte oho omombaʼeguasu hag̃ua Jehovápe. ¿Ndépa reikuaa mbaʼérepa Samuel oho oiko upépe? Jahechami raẽna mbaʼépa ojapo isy. Haʼe ningo héra Ana.

Heta tiémpore Ana imembyse vaʼekue péro ndaikatúi imemby. Upémarõ oñemboʼe Jehovápe oipytyvõmi hag̃ua chupe. Ana opromete Jehovápe orahataha imembýpe ombaʼapo hag̃ua itavernákulope. Upéi Jehová okontesta chupe ha haʼe oreko peteĩ mitãʼi. Héra Samuel. Ana ojapo oprometéva ha upévare Samuel orekórõ guare 3 térã 4 áñorupi, isy oraha chupe Ñandejára tavernákulope.

Upe tiémpope Elí haʼe vaʼekue saserdóte guasu pe tavernákulope. Mokõi itaʼýra ombaʼapo avei upépe. Nemanduʼákena pe tavernákulope ojehoha ojeadora hag̃ua Jehovápe. Upévare enterovéva ojeporta porã vaʼerã upépe. Péro Elí raʼykuéra ojapo heta mbaʼe vai, ha Samuel ohechapa la ojapóva hikuái. ¿Ojeporta vaípa avei Samuel ojapoháicha Elí raʼykuéra?... Nahániri, haʼe ojapo meme iporãva. Ituvakuéra omboʼe voi chupe upéicha.

Ohechávo itaʼyrakuéra ojeporta vaiha, ¿mbaʼépa ojapo vaʼerãmoʼã Elí?... Haʼe okastiga vaʼerãmoʼã mokõivépe ha ndohejavéima oservi Ñandejára rógape. Péro Elí ndojapói upéva. Upévare Jehová ipochy hendive ha itaʼyrakuérandi, ha odesidi okastigataha chupekuéra.

Samuel omombeʼu Elípe Jehová heʼi vaʼekue

Peteĩ pyharépe Samuel oke hína. Peichaháguinte ohendu heʼíva chupe: “¡Samuel!”. Haʼe odipara oho Elí rendápe, péro Elí heʼi: “Che norohenóiri”. Péicha oiko tres vése, ha pe tres vesehápe Elí heʼi Samuélpe: “Rehendu jeýrõ pe oñeʼẽva, ere vaʼerã: ‘Jehová, eñeʼẽntema chéve, rohendu ningo hína’”. Samuel ojapo upéicha ha Jehová heʼi chupe: “Ere Elípe akastigataha ifamíliape umi mbaʼe vai  ojapóvare”. ¿Ndépa ere ifásil hague Samuélpe ojapo hag̃ua upéva?... Katuete ijetuʼu. Péro Samuel okyhyjéramo jepe, ojapo Jehová omandáva. Upéi oiko Jehová heʼi hagueichaite: Elí raʼykuéra omano ha Elí omano avei.

Samuel ehémplo iporãiterei ñandéve g̃uarã. ¿Mbaʼérepa? Haʼe ojeporta porã ohecháramo jepe ótro hénte ojapoha ivaíva. Ha, ¿ndépa mbaʼe rejapóne rehecháramo nde rapichakuéra ojeporta vai? ¿Rejoguátapa Samuélpe ha resegíta rejapo meme iporãva? Rejapóramo upéicha rembovyʼaitereíta Jehovápe ha nde tuvakuérape.

ELEE NDE BÍBLIAPE

  • 1 Samuel 2:22-26; 3:1-21