Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Emboʼékena ne famíliape

 LEKSIÓN 10

Jesús siémpre iñeʼẽrendu

Jesús siémpre iñeʼẽrendu

¿Ndépa ere ifasilha neñeʼẽrendu nde tuvakuérape?... Heta vése ijetuʼu. Péro, ¿ndépa reikuaa Jesús siémpre iñeʼẽrendu hague Jehovápe ha avei ituvakuérape ko yvy ári?... Jesús ehémplo rupive ikatu reaprende neñeʼẽrendu vaʼerãha nde tuvakuérape ijetuʼúramo jepe. Jahechamína ko mbaʼe.

Ou mboyve ko yvy ári Jesús oĩ vaʼekue yvágape Itúva Jehovándi. Péro Jesús oreko avei itúva ha isy ko yvy ape ári. Héra José ha María. ¿Mbaʼépa ojapo raʼe Jehová onase hag̃ua Jesús ko yvy ári?...

Jehová oguerova Jesús rekove yvágagui ha omoĩ María retepýpe. Péicha Jesús onase ha oiko ko yvy ape ári. ¡Tuichaite mbaʼe ningo upéva! Jesús okakuaa María retepýpe umi ótro mitãraʼy okakuaaháicha isykuéra retepýpe. Nueve mése rire onase Jesús. Upéicha rupi oĩ aja ko yvy ári, María haʼe vaʼekue isy ha itúva katu José.

Jesús orekórõ guare doce áño ojapo peteĩ mbaʼe ohechauka porãva ohayhuetereiha Itúva Jehovápe. Upérõ haʼe ha ifamília oho Jerusalénpe Paskuarã. Heta oguata hikuái upearã. Oukuévo upégui, José ha María opilla Jesús ndaiporiveimaha hendivekuéra. ¿Ndépa reikuaa moõpa oĩ raʼe?...

¿Mbaʼérepa Jesús oĩ raʼe témplope?

José ha María pyaʼeterei ojevy Jerusalénpe ha oheka Jesúspe oparupiete. Péro ndotopái hese ha oñekevrantaiterei hikuái upévare. Upéi tres día haguépe otopa chupe témplope. ¿Ndépa reikuaa mbaʼérepa Jesús oĩ pe témplope?... Upépe ikatu oaprendeve Itúva Jehovágui. Jesús ohayhu Jehovápe ha oikuaase mbaʼéichapa ikatu ombovyʼa chupe. Jesús tuicha rire jepe siémpre iñeʼẽrendu Jehovápe. Haʼe ojapo Itúva heʼíva ohasa asýtaramo jepe. ¿Iñeʼẽrendúpa avei Jesús, José ha Maríape?... Si, la Biblia omombeʼu upéicha hague.

¿Mbaʼépa nemboʼe Jesús ehémplo?... Tekotevẽha rejapo nde tuvakuéra heʼíva, ijetuʼúramo jepe ndéve. ¿Rejapótapa upéva?...