Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Emboʼékena ne famíliape

 LEKSIÓN 6

David ndokyhyjéi vaʼekue

David ndokyhyjéi vaʼekue

¿Mbaʼépa rejapo jepi rekyhyje jave?... Oiméne redipara reho nde sy térã nde túva rendápe ha rejerure chupekuéra tanedefende. Péro oĩve ótro ikatúva nepytyvõ avei. Haʼe ipoderosove oimeraẽvagui. ¿Ndépa reikuaa mávapa?... Si, haʼe Jehová. Koʼág̃a ñañeʼẽmi peteĩ mitãrusúre hérava David. La Bíbliape jatopa ijistória. David oikuaa vaʼekue Jehová siémpre oĩha hendive, upévare ndokyhyjéi.

David michĩmi guive itúva ha isy omboʼe chupe ohayhu vaʼerãha Jehovápe. Upéva oipytyvõ Davídpe ani hag̃ua okyhyje mbaʼeve ivaívagui. Haʼe oikuaa Jehová haʼeha iñamígo ha oipytyvõtaha chupe. Peteĩ jey David oñangarekórõ guare ovechakuérare, ou peteĩ león tuicháva ha ojagarra peteĩ ovecha ijurúpe oraha hag̃ua. ¿Reikuaápa mbaʼépa ojapo David? Oho pe león rapykuéri ha amalisia ipópente ojuka. Ha peteĩ óso oúrõ guare umi ovechápe, David ojuka avei. ¿Mávapa oipytyvõ raʼe Davídpe?... Si, Jehová oipytyvõ chupe.

Upe rire David ohechauka jey ndokyhyjeiha. Upérõ umi isrraelíta oñorairõ hína umi filistéo kóntrape. Umi filistéo apytépe oĩ peteĩ soldádo tuichaitereíva hérava Goliat. Ipuku formál, higánte voi. Haʼe osẽ oñembohory umi soldádo isrraelíta ha Jehováre. Goliat odesafia umi soldádope ou hag̃ua oñorairõ hendive. Péro umi isrraelíta okyhyjepa ha noñorairõséi hendive. David oikuaávo la oikóva, heʼi Goliátpe: “Che añorairõta nendive. Jehová chepytyvõta ha aganáta katuete”. ¿Ndépa ere David ipyʼaguasuha?... Si, haʼe ni michĩmi ndokyhyjéi. ¿Reikuaasépa mbaʼe oiko upéi?

David oho ojagarra hiʼónda (peteĩ mbaʼe ojeporúva ojepoi hag̃ua ita), ha cinco ita michĩ ha isỹi asýva. Upéi oho oñemoĩ pe higántere. Goliat ohechávo Davídpe opuka hese. Péro David heʼi chupe: “Nde reju chéve espáda reheve ha che katu aha ndéve Jehová rérape”. Upévo omoĩ peteĩ ita hiʼóndape, odipara Goliat oĩha gotyo ha ojapi chupe isyva  mbytetépe. Upepete pe higánte hoʼa omano. Umi filistéo oñemondyipa ha odipara. ¿Mbaʼérepa peteĩ mitãrusuʼi ikatu ogana peteĩ higántepe?... Jehová oipytyvõ rupi chupe, ha Jehová ipoderosove hína upe higántegui.

David oikuaa Jehová oĩha hendive ha ndokyhyjéi

¿Mbaʼépa nemboʼe David istória?... Jehová ipoderosoveha enterovégui. Ha haʼe hína ne amígo. Upévare ág̃a ótrope reñandúramo rekyhyjeha, nemanduʼákena Jehová ikatuha nepytyvõ ndepyʼaguasu hag̃ua.

ELEE NDE BÍBLIAPE

  • Salmo 56:3, 4

  • 1 Samuel 17:20-54