Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 51

Naamán ha pe mitãkuñaʼi oadoráva Jehovápe

Naamán ha pe mitãkuñaʼi oadoráva Jehovápe

Pe ehérsito sirio ogueraha vaʼekue peteĩ mitãkuñaʼi israelítape Síriape, mombyry hógagui ha iparientekuéragui. Pe kuimbaʼe omoakãva pe ehérsito sirio héra vaʼekue Naamán ha pe mitãkuñaʼi opyta vaʼekue Naamán rembireko sirvientarã. Ko mitãkuñaʼi oadora vaʼekue Jehovápe oikóramo jepe umi hénte ndoadoráivandi Jehovápe.

Naamán oreko vaʼekue peteĩ mbaʼasy ivaietereíva osẽva ipirére ha hasyetereíva chupe. Pe mitãkuñaʼi israelita oipytyvõse chupe ha upévare heʼi Naamán rembirekópe: “Che aikuaa mávapa ikatu omonguera ne ménape. Israélpe oĩ Jehová proféta hérava Eliseo. Haʼe ikatu omonguera chupe”.

Naamán rembireko omombeʼu iménape mbaʼépa heʼi chupe pe mitãkuñaʼi. Naamán oĩ vaʼekue dispuésto ojapóvo oimeraẽ mbaʼe okuera hag̃ua, upévare oho Israélpe Eliseo rendápe. Naamán opensa kuri Eliseo osẽtaha orresivi chupe oikuaágui haʼeha peteĩ kuimbaʼe iñimportánteva, péro Eliseo nosẽi hendápe. Haʼe omondónte peteĩ isirviéntepe orresivi  hag̃ua Naamánpe ha heʼi hag̃ua chupe: “Tereho eñapymi 7 vése pe rrío Jordánpe ha rekueráta”.

Naamánpe ndogustaiete upéva ha heʼi: “Che aimoʼã kuri ko proféta oñemboʼetaha Ijára Jehovápe ha ojapotaha peteĩ milágro chemonguera hag̃ua. Péro upéva rangue haʼe heʼi chéve aha hag̃ua añapymi pe rrío oĩvape Israélpe. Mboy rrío iporãvéva piko ore roreko Síriape, mbaʼére piko ndeʼírinte chéve aha hag̃ua upépe”. Naamán ipochyeterei ha osẽ ohopa hese upégui.

Upéi isirvientekuéra heʼi chupe: “Nde ningo reime kuri dispuésto rejapóvo oimeraẽ mbaʼe rekuera hag̃ua. Ndahasyiete ningo la ojeruréva ndéve rejapo hag̃ua. Etanteamína ejapo la heʼíva ndéve”. Naamán ojapo la isirvientekuéra heʼíva ha oho oñapymi siete vése pe rrío Jordánpe. Oñapymívo pe siete veseha, okueraitéma osẽvo. Ovyʼaiterei la okuera haguére ha oho jey Eliseo rendápe oagradese hag̃ua chupe. Haʼe heʼi Eliséope: “Koʼág̃a ahechakuaáma Jehová haʼeha pe Dios verdadéro”. Naamán oho jey hógape ha okueraitéma imbaʼasýgui. ¿Mbaʼéichapa nde ere oñeñandúne hague pe mitãkuñaʼi israelita ohechávo chupe?

“Umi mitãnguéra ha mitãraʼy jepe nemombaʼe” (Mateo 21:16).