Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 54

Jehová ipasiénsia Jonás rehe

Jehová ipasiénsia Jonás rehe

Asíriape oĩ vaʼekue peteĩ siuda hérava Nínive ha umi hénte oikóva upépe iñaña ha ojapo vaʼekue heta mbaʼe vai. Upévare Jehová heʼi proféta Jonáspe oho hag̃ua Nínivepe ha heʼi hag̃ua umi héntepe okambia vaʼerãha. Péro Jonás ndohoséi Nínivepe ha osẽ oho ótro ládo. Haʼe ojupi peteĩ várko ohóvape peteĩ siuda héravape Tarsis.

Oho jave hikuái pe mar rehe, ou peteĩ torménta ivaipa jepéva ha umi marinéro tuichaiterei oñemondýi. Haʼekuéra oñemboʼe idioskuérape ha heʼi: “¿Mbaʼére piko oiko orerehe péicha?”. Upéi Jonás heʼi sapyʼa chupekuéra: “Che kúlpare la oiko hína koʼã mbaʼe. Che akañy hína ha asẽ aha ótro ládo pono ajapo la Jehová omandáva chéve. Pepoi chehegui pe ýpe ikatu hag̃uáicha oñekalma pe tiémpo”. Umi marinéro ndopoiséi Jonáspe pe márpe, péro haʼe oinsisti chupekuéra ojapo hag̃ua upéva. Upémarõ umi marinéro opoi chupe pe ýpe ha opa la tiémpo vai.

Jonás opensáma kuri omanotaha. Amáske oñapymi pypukuve ohóvo pe márpe, Jonás oñemboʼe Jehovápe. Upémarõ Jehová omondo peteĩ pira tuichaitereíva ha omokõ Jonáspe enteroite, péro ndojukái chupe. Pe pira ryepýpe Jonás oñemboʼe jey Jehovápe ha heʼi: “Apromete siémpre cheñeʼẽrendutaha ndéve”. Jehová oipytyvõ Jonáspe oĩ aja entéro pe pira ryepýpe ani hag̃ua omano. Ha tres día haguépe Jehová omondo pe pirápe pe mar rembeʼýpe opoi hag̃ua Jonásgui.

Péicha Jehová osalva Jonáspe. ¿Péro heʼisépa upéva nomondoveimaha chupe Nínivepe? Nahániri. Jehová heʼi jey chupe oho hag̃ua, ha ko  vuéltape Jonás ojapóma la Jehová heʼíva. Haʼe oho ha heʼi umi hénte iñañaitévape: “Déntro de 40 día Jehová ohundíta ko siuda”. Umi hénte oikóva Nínivepe ohendúvo upéva, okambia hikuái. Pe rréi de Nínive heʼi voi umi héntepe: “Peñarrepenti ha pejerure asýkena Ñandejárape ñandeporiahuverekomi hag̃ua, haʼe ikatu hína ñaneperdona”. Jehová ohechávo umi hénte oñarrepentiha, nohundíri jey chupekuéra.

Jonás ipochy Jehová nohundíri haguére Nínive. Epensamíntena, Jehová heta ipasiénsia kuri Jonás rehe ha oiporiahuvereko chupe, péro Jonás ndoiporiahuverekói umi hénte oikóvape Nínivepe. Upéva rangue haʼe ipochy ha osẽ pe siudágui ha oho oguapy hovasy peteĩ enrramáda guýpe. Upéi pe plánta ipiru ha Jonás ipochyeterei upévare. Upépe Jehová heʼi chupe: “Nde piko remombaʼeve ko plánta umi ninivítagui. Che aiporiahuvereko kuri umi héntepe ha upévare ojesalva hikuái”. ¿Mbaʼépa Jehová omboʼese raʼe Jonáspe? Umi hénte oikóva Nínivepe iñimportanteveha oimeraẽ plántagui.

“Jehová [...] ipasiénsia penderehe ndoipotáigui avave oñehundi; oipota guei enterove oñarrepenti” (2 Pedro 3:9).