Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 53

Jehoiadá ohechauka ipyʼaguasuha

Jehoiadá ohechauka ipyʼaguasuha

Jezabel oreko vaʼekue peteĩ imembykuña hérava Atalía ha iñaña vaʼekue avei haʼéicha. Atalía omenda pe rréi de Judá rehe. Ha pe rréi omano rire, itaʼýra ogoverna vaʼekue hendaguépe ha haʼe omano rire katu Atalía opyta ogoverna Judápe. Atalía ndoipotái vaʼekue avave oipeʼa chugui pe goviérno, upévare ojukapasemoʼã pe rréi familiarépe ha entéro umi orekóvape derécho ogoverna hag̃ua. Inietokuérape jepe ojuka vaʼekue. Upévare, enterovénte okyhyje vaʼekue Atalíagui.

Pe saserdóte prinsipál hérava Jehoiadá ha hembireko Jehoseba oikuaa porã ivaietereiha la Atalía ojapóva. Upévare haʼekuéra oraha pe rréi raʼyʼi héravape Jehoás ha omokañy pe témplope ani hag̃ua Atalía ojuka chupe. Jehoiadá ha hembireko omongakuaa pe mitãme pe témplope oikuaáramo jepe ikatuha ojejuka chupekuéra upévare.

Upéi, Jehoás orekórõ guare siete áño, Jehoiadá ohenoika umi kuimbaʼe omoakãvape pe rréi guardiakuérape ha umi levítape ou hag̃ua hendápe ha heʼi chupekuéra: “Pepyta pevihila ñandéve pe témplo entrádape ani hag̃ua avave oike”. Upéi Jehoiadá omoĩ pe koróna Jehoás akãre ha onombra chupe rréi de Judá. Upéi osapukái hikuái ha heʼi: “¡Toñevendesi pe rréipe!”.

Atalía ohendúvo umi hénte osapukaipáva, odipara oho pe témplope ha ohechávo pe rréi pyahúpe heʼi: “¡Traisión! ¡Traisión!”. Upémarõ umi kuimbaʼe omoakãva pe rréi guardiakuérape ojagarra Atalíape ha oraha ojuka chupe. Haʼe ningo ogueraha vaipa vaʼekue umi héntepe, ¿mbaʼépa oikóta koʼág̃a haʼe omano rire?

Jehoiadá oipytyvõ umi oikóvape Judápe ojapo hag̃ua peteĩ kompromíso Jehovándi. Upérõ haʼekuéra opromete Jehovápe omombaʼeguasutaha chupe añoite. Upéi Jehoiadá omondo umi héntepe oitypa hag̃ua Baal témplo ha omonguʼi hag̃ua umi Baal raʼanga. Upéi  omoĩ umi saserdóte ha umi levítape ombaʼapo hag̃ua Jehová rógape ikatu hag̃uáicha umi hénte oho jey oadora Jehovápe upépe. Omoĩ avei umi guárdia oñatende hag̃ua pe témplo entrádape ani hag̃ua oike umi hénte naiñeʼẽrendúiva Jehovápe. Upéi Jehoiadá ha umi kuimbaʼe omoakãva pe rréi guardiakuérape ogueraha Jehoáspe pe palásiope ha omboguapy chupe pe trónope. Umi hénte oĩva Judápe ovyʼaiterei, hasypeve oadora jeýta hikuái Jehovápe pyʼaguapýpe porã. Ndaiporivéima pe rréina ñañaite Atalía ni umi oadoráva Baálpe. ¿Rehechakuaápa Jehoiadá ipyʼaguasu rupi oipytyvõ hague hetaiterei héntepe?

“Ani pekyhyje umi ikatúvagui pendejuka, peẽngo peikove jeýta upe rire, ha upéva haʼekuéra ndaikatumoʼãi ojoko; pekyhyje guei upe ikatúvagui penerundi Gehénape” (Mateo 10:28).