Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 40

David ha Goliat

David ha Goliat

Jehová heʼi Samuélpe: “Tereho Jesé rendápe, pórke itaʼyrakuéra apytégui che aiporavo peteĩvape Israel rreirã”. Samuel ojapo la Jehová heʼíva chupe ha ohechávo Jesé raʼy ypykuépe, heʼi: “Katuete kóva hína la Jehová oiporavóva rreirã”. Péro Jehová heʼi Samuélpe ndahaʼeiha upe mitãrusu la haʼe oiporavo vaʼekue. Ha upéi heʼi avei chupe: “Che namañái umi hénte píntarente, che amaña umi hénte korasõme oĩvare”.

Upéi Jesé ogueruve seis itaʼýrape Samuélpe, péro Samuel heʼi chupe: “Jehová ndoiporavói ni peteĩvape koʼãvagui. ¿Koʼãvante piko la nde raʼy?”. Ha Jesé okontesta chupe: “Pe imitãvéva hérava David la neʼĩrava ahenói. Haʼe oime oñangareko hína ore ovechakuérare”. Upéi David og̃uahẽvo hógape, Jehová heʼi Samuélpe: “Pévape la che aiporavo”. Upémarõ Samuel oñohẽ David akãre aséite, upéicha ohechauka Jehová oiporavo hague chupe Israel rreirã.

Tiémpo riremi, umi israelita ha umi filisteo ojeprepara oñorairõ hag̃ua. Umi filisteo oreko ijehérsitope peteĩ higánte ha upe soldádo tuichaitéva héra Goliat. Haʼe tódo el día oñembohory umi israelítare ha heʼi chupekuéra: “¡Pemboúna peteĩ kuimbaʼe oñorairõ hag̃ua chendive! Haʼe cheganáramo, ore ropytáta pende esklavorã. Péro che aganárõ, peẽ pepytáta ore esklavorã”.

David ermanokuéra ningo soldádo kuri avei, ha David oho oraha chupekuéra ikarurã pe kampaméntope. Ha oĩrõ guare hendivekuéra, David ohendu mbaʼéichapa Goliat odesafia hína umi israelítape, upévare heʼi: “Che añorairõta hendive”. Péro Saúl heʼi chupe: “Nde ningo nemitãiterei gueteri”. Ha David heʼi chupe: “Jehová chepytyvõta”.

 Upémarõ Saúl oipuruka Davídpe pe ekípo haʼe oipurúva gerrahápe, péro David heʼi chupe: “Che ningo ndaikatumoʼãi añorairõ koʼã mbaʼe reheve”. Upéi David ojagarra hiʼónda, haʼéva hína peteĩ tíra de kuéro ojepurúva ojepoi hag̃ua ita, ha oho pe rrío kóstare oiporavo 5 ita ijapuʼa ha ifíno asýva ha omoĩ ivosaʼípe. Upéi odipara Goliat oĩha gotyo, ha upépe Goliat heʼi chupe: “¡Ne mitãʼi, eju koʼápe ha reikuaáta! Rojukáta ha ameʼẽta ne reʼongue umi guyra ha animalkuérape hoʼu hag̃ua”. Péro David ndokyhyjéi chugui ha heʼi chupe: “Nde ningo regueru peteĩ espáda ha lánsa reñorairõ hag̃ua chendive. Che katu aju ndéve Jehová rérape, pórke nde chupe la redesafia ha ndahaʼéi oréve. Ha enterove oĩva koʼápe oikuaáta Jehová noikotevẽiha espáda ni lánsare oresalva hag̃ua. Haʼe katuete orepytyvõta rogana hag̃ua”.

Upéi David onohẽ ivosaʼígui peteĩ ita, omoĩ hiʼóndape ha ohaʼã Goliátpe. Jehová oipytyvõ rupi chupe, ojapi Goliátpe isyva mbytetépe, ha pe ita oikete voi hese. Upépe Goliat hoʼa ha omano. Ohechávo la oikóva, umi filisteo odipara oho upégui ani hag̃ua umi israelita ojukapa chupekuéra. ¿Rehechakuaápa mbaʼeichaitépa David ojerovia vaʼekue Jehováre? ¿Ndépa rejerovia avei Jehováre haʼéicha?

“Yvyporakuérape g̃uarã ko mbaʼe ni mbaʼevéicharõ ndaikatumoʼãi oiko, péro Ñandejárape g̃uarã ndaipóri ikatuʼỹva” (Marcos 10:27).