Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 38

Jehová omombarete Sansónpe

Jehová omombarete Sansónpe

Heta israelita oñepyrũ jey oadora umi dios fálsope, upévare Jehová ontrega chupekuéra umi filisteo poguýpe. Péro oĩ vaʼekue avei israelita ohayhúva Jehovápe, por ehémplo Manóah. Haʼe ha hembireko naifamíliai vaʼekue. Peteĩ día, Jehová omondo peteĩ ánhelpe heʼi hag̃ua Manóah rembirekópe: “Nderyeguasúta ha erekóta peteĩ mitãkuimbaʼe osalvátava umi israelítape umi filistéogui, upe mitã haʼéta peteĩ nazareo”. ¿Reikuaápa mbaʼépa heʼise nazareo? Nazareo ningo haʼe vaʼekue peteĩ persóna ojapóva peteĩ servísio espesiál Jehovápe. Umi nazaréogui ojeproivi vaʼekue oikytĩ iñakãrangue.

Tiémpo rire onase Manóah raʼy ha haʼe ombohéra chupe Sansón. Okakuaa rire, Sansón imbareteterei vaʼekue pórke Jehová voi omombarete chupe. Peteĩ león jepe haʼe ikatu vaʼekue ojuka ipópe. Peteĩ vuéltape haʼeñoite ojuka 30 filistéope. Upévare umi filisteo ndochaʼeiete voi hese ha oñepyrũ okalkula hikuái mbaʼéichapa ojukáta chupe. Peteĩ pyhare, Sansón opyta oke Gázape, ha iñenemigokuéra opyta pe siuda entrádape opeska hese ikatu hag̃uáicha ojuka chupe koʼẽmba rire. Péro pyhare la dócerupi Sansón opuʼã ha oho pe siuda entrádape, oipeʼa pe siuda rokẽ, ohupi ilómore ha ogueraha peteĩ sérro ruʼãme oĩva Hebrón ypýpe.

Upéi umi filisteo oho oñeʼẽ Sansón nóviandi, hérava Dalila, ha heʼi chupe: “Redeskuvri ha remombeʼúramo oréve mbaʼéicha rupípa Sansón imbaretete, romeʼẽta ndéve hetaiterei monéda de pláta. Upéicharõmante ikatúta rojagarra chupe ha romoinge kárselpe”. Dalila oipotaiterei pe pláta ha ojapo hendivekuéra la tráto. Ñepyrũrã Sansón nomombeʼuséi Dalílape mbaʼéicha rupípa la imbaretete, péro haʼe tódo el día oiko hapykuéri ha oporandu jey jey chupe, amo ipahápe ombyajúma Sansónpe ha upémarõ haʼe heʼi chupe: “Che akãrangue ningo núnka noñekytĩriva chehegui, pórke che nazareo. Ha oñekytĩramo chehegui che akãrangue, nachembaretemoʼãvéima”. Ajépa tuichaite ojekivoka Sansón omombeʼúvo upéva Dalílape.

Ensegída Dalila heʼi umi filistéope: “Aikuaáma mbaʼéicha rupípa la imbaretete”. Upe rire Dalila omonge Sansónpe hapypaʼũme ha ohenói peteĩ kuimbaʼépe oikytĩ hag̃ua chugui iñakãrangue. Upéi Dalila osapukái: “¡Cháke  Sansón, umi filisteo oĩ koʼápe!”. Upépe Sansón opáy ha opilla naimbareteveimaha. Umi filisteo ojagarra ha ohesaʼo chupe ha omoinge chupe kárselpe.

Peteĩ día, hetaiterei filisteo oñembyaty idiós Dagón témplope ha heʼi hikuái: “¡Ñande dios ontrega ñandéve ñane enemígo Sansónpe! Peguerúna ñandéve koʼápe jajedivertimi hag̃ua hese”. Upémarõ ogueru hikuái Sansónpe kárselgui, omoñemboʼy chupe mokõi kolúmna mbytépe ha oñembohory hese hikuái. Upépe Sansón ojerure asy Jehovápe: “Ñandejára Jehová chemombaretemi jeýna”. Pe kárselpe oĩ aja ningo okakuaa jeýma kuri la iñakãrangue ha Jehová omombarete jey Sansónpe. Upémarõ haʼe ifuersakue reheve omyaña umi kolúmna ha pe témplo ou yvýpe ha ojukapaite umi oĩvape upépe. Sansón avei omano hendivekuéra.

“Opa mbaʼerã chembarete Ñandejára omeʼẽgui chéve podér” (Filipenses 4:13).